Փաստ ինֆո

Ալիևը հերթական անգամ ի ցույց դրեց իր դիվանագիտական ունակությունները՝ դեռևս 2020թ․ նոյեմբերի 9-ի ստանձնած պարտավորությունը մասամբ կատարելով այս օրերին։ 32 ռազմագերիների վերադարձը (ի դեպ, Ադրբեջանում դեռևս շարունակում են պահվել տասնյակ գերիներ) նա որպես «մարդասիրական» քայլ է ներկայացրել, իսկ Եվրոպան ծափողջյուններով դիմավորել այն՝ չնկատելով, որ Ադրբեջանը 2020թ․ նոյեմբերի 9-ի հայտարարությամբ էր պարտավորվել վերադարձնել գերիներին։ «Փաստինֆո»-ի հետ զրույցում նման դիտարկում արեց միջազգայնագետ Դավիթ Կարապետյանը՝ անդրադառնալով երեկ տարածված հաղորդագրությանը, ըստ որի՝ Ադրբեջանը վերադարձնում է 32 ռազմագերիների, իսկ Հայաստանը՝ ադրբեջանցի երկու մարդասպան դիվերսանտների։

«Իր այս քայլով Ալիևը բռնապետ լինելով հանդերձ՝ Եվրոպայի աչքում «հումանիստ» է ձևանում, իսկ ներքին լսարանում իր հեղինակությունը բարձրացնում․ ադրբեջանական քարոզչամեքենան, շեշտադրելով 32-ը 2-ի դիմաց փաստը, ուզում է ցույց տալ, թե Ալիևի համար, իբր, ամեն մի զինվորի կյանքն արժեք ունի, դրա համար էլ 32 հայ առզմագերի է տվել, որ երկու հոգու վերադարձնի»,-նկատում է մեր զրուցակիցը։

Կարապետյանի գնահատմամբ՝ Ալիևն այն քաղաքական գործիչն է, որ կարող է ԵՄ պատգամավորներին մոլագար անվանել, իսկ հաջորդ օրը սիրաշահել ու իր ուզածը ստանալ։ Առանց կաշկանդվելու՝ Ալիևը հեգնել է նաև Մինսկի խմբի համանախագահներին՝ հայտարարելով, թե իրենց պնդումները՝ ԼՂ հարցի խաղաղ կարգավորմանն այլընտրանք չլինելու մասին, սխալ էին։

«Ադրբեջանի բռնապետը կարողանում է պահը որսալ ու կողմնորոշվել, թե աշխարհաքաղաքական կենտրոնների նկատմամբ ինչպես դիրքավորվի։ Միանշանակ, հիմա շահեկան դիրքում է Ադրբեջանը։ Չի բացառվում, որ, «բարի կամք» դրսևորելով՝ նոր պահանջներ չի առաջ քաշելու։ Ինչ վերաբերում է Ալիևի պահվածքի նկատմամբ Եվրոպայի վերաբերմունքին, զարմանալ պետք չէ․ ո՛չ ադրբեջանական նավթագազային պաշարներից օգտվող Եվրոպայի, ո՛չ էլ վերպետական կառույցների ղեկավարներին խորթ չէ Ալիևին քծնելը»,-նկատեց միջազգայնագետն ու շեշտեց՝ այդուհանդերձ, փակել Արցախի թեման՝ որքան էլ ցանկանան Ալիևը կամ նրան աջակցողները, չի հաջողվելու։

Արցախի հարցը, նրա համոզմամբ, նոր թափ է ստանում․ Ադրբեջանի կողմից Արցախի ամբողջական բռնազավթումը, բնակչության բռնի տեղահանությունն ավելի են բարդացրել հիմնախնդիրը, չնայած Ալիևն արտահերթ ընտրություններով փորձելու է ամրագրել իր հաղթանակը և Արցախում տարածել իր իշխանությունը։

«Արցախյան հիմնախնդրի հանգուցալուծումը իրավաբանորեն վերապահված է ԵԱՀԿ Մինսկի խմբին։ Ու թեկուզ այդ խումբն անգործության է մատնված, համանախագահները, այնուամենայնիվ, պետք է այցելեն տարածաշրջան ու զբաղվեն խնդրով»,-եզրափակեց Կարապետյանը։

Աղբյուր` Փաստինֆո