Փաստ ինֆո

ԱԺ-ն ամեն դեպքում իրավունք ունի քվեարկելու այնպես, ինչպես ճիշտ կհամարի։ Այստեղ ամենակարևորն այն է, թե ով, ի վերջո, կդառնա ԿԿՀ անդամ և կախված դրանից՝ կկարողանանք գնահատել՝ ՔՊ-ն ուզում է ԿԿՀ-ն իրենով անել, թե ընդամենը դժգոհ է Հայկուհի Հարությունյանի պաշտոնավարումից։ Այս մասին «Փաստինֆո»-ի հետ զրույցում ասաց «Իրազեկ քաղաքացիների միավորում» ՀԿ ծրագրերի ղեկավար Դանիել Իոաննիսյանը։

Հիշեցնենք, որ ԱԺ-ի իշխող խմբակցության կողմից այսօր տապալվել է ԿԸՀ անդամի ընտրության գործընթացը։ ԿԿՀ անդամի պաշտոնում պաշտոնի համար առաջադրվել էր երկու թեկնածու՝ նախկին նախագահ Հայկուհի Հարությունյանը և վարչության պետ Նարինե Ավետիսյանը, սակայան ՔՊ-ն չի մասնակցել քվեարկությանը։ Նշենք, որ արդեն տևական ժամանակ բավականին լարված հարաբերություններ են եղել ԿԿՀ նախագահ Հայկուհի Հարությունյանի և իշխող ուժի միջև։ Պատճառներից մեկը, ամենայն հավանականությամբ, ՔՊ-ականների նկատմամբ ԿԿՀ-ի կողմից հարուցված վարույթներն են։ Բացի այդ, բազմիցս ԿԿՀ-ն բարեվարքության բացասական եզրակացություններ է ներկայացրել՝ արձանագրելով, որ տարբեր պաշտոններում թեկնածուների, այդ թվում՝ ԲԴԽ, ՍԴ անդամների, գլխավոր դատախազի թեկնածու Աննա Վարդապետյանի և մի շարք այլ գործիչների առնչությամբ, որոնք իշխանությունները հաշվի չեն առել և տվյալ անձանց նշանակել են պաշտոններում։

Ավելին, Հայկուհի Հարությունյանը բարձրաձայնել է իշխանությունների կողմից ճնշումների մասին՝ հայտնելով, որ ԱԱԾ-ից զանգ է ստացել։

Դանիել Իոաննիսյանը, անդրադառնալով իշխող ուժի կողմից ԿԿՀ նախկին նախագահ Հայկուհի Հարությունյանի նկատմամբ ակնհայտ դժգոհությանը, չբացառեց, որ որոշ պատգամավորների մոտիվացիան պայմանավորված է ԿԿՀ-ի կողմից պատգամավորների նկատմամբ հարուցված վարույթներով, սակայն պնդել, որ բոլոր պատգամավորների մոտիվացիան է դա, չի կարող ասել։ «Իրենք պարզ տեքստով ասացին, որ դժգոհ են Հայկուհի Հարությունյանի պաշտոնավարումից։ Մարդիկ ուղիղ, բաց, աներկբա ասացին դա»,- ասաց նա։

Իսկ թե ԿԿՀ և ԿԿՀ նախագահի աշխատանքն ինչպես է գնահատում՝ Իոաննիսյանը նշում է, որ թեև ԿԿՀ-ից կան շատ դժգոհություններ, բայց, միևնույն ժամանակ, չի կարող չընդգծել այն հանգամանքը, որ Հայկուհի Հարությունյանը չմտավ «այս ինչը մեր եղբայրն է, այն ինչը՝մեր ընկերը» տրամաբանության մեջ։

«Նույնիսկ, երբ իրեն ԱԱԾ-ից հորդորեցին, խնդրեցին, առաջարկեցին և ենթադրում եմ, որ դրա դիմաց, եթե իրեն պետք լիներ, ԱԱԾ-ն էլ հետո իրեն այդ լավությունը կաներ, բայց նա այդ առևտրի մեջ չմտավ։ Դա եզակի երևույթ է՝ այսօր ՀՀ-ում բարձրաստիճան պաշտոն զբաղեցնող անձանց շրջանակներում և Հայկուհի Հարությունյանի՝ այդ երևույթի գայթակղությանը չտրվելը գնահատելի է»,- ասաց Իոաննիսյանը։
Հեղինակ՝ Իզաբել Սահակյան

Աղբյուր` Փաստինֆո