Փաստ ինֆո

Ռուսական կողմը շանս ունի ցույց տալու, որ, այնուամենայնիվ, ինքը շարունակում է հավատարիմ մնալ իր հայտարարած սկզբունքներին ու ստորագրած փաստաթղթերին, բայց սա ոչ մի ձև չի ազդելու Հայաստանի որոշման վրա` ապահովել Հայաստանի անվտանգությունը։ Այս մասին Աժ-ում լրագրողների հետ զրույցում ասաց Ալեն Սիմոնյանն՝ անդրադառնալով հարցին, թե հնարավո՞ր է, որ Ռուսաստանի կողմից Հայաստանին զենք չմատակարարելու հարցը լուծվի գործընկերային ձևով:

«Փաստ է, որ Ռուսաստանը չի կատարում իր պարտավորությունները, իսկ Հայաստանը պետք է պաշտպանի իր շահերը»,- ասել է Ալեն Սիմոնյանը:

Հարցին, թե ինչպես են պատճառաբանել ՀԱՊԿ նիստին չմասնակցելու որոշումը՝ Սիմոնյանն ասաց, որ այդ նիստին մասնակցելու իմաստ չի տեսնում:

«Կան չլուծված հարցեր, մարդիկ չեն կատարում իրենց պարտավորությունները, մենք լսում ենք, որ միայն Հայաստանի ուղղությամբ են հոխորտանքներ հնչում, մինչդեռ եթե նայենք 2020 թ-ի նոյեմբերի 9-ից այս կողմ՝ Ադրբեջանը բազմաթիվ անգամ շատ վատ է իրեն դրսևորել իր դաշնակցի նկատմամբ՝ սկսած ռուս զինվորներին սպանելուց մինչև պայմանավորվածությունները խախտելը։ Ադրբեջանն ինչ ուզել` մեր տարածաշրջանում արել է, ու Ռուսաստանը կա՛մ չի կարողացել, կա՛մ չի արձագանքել:

Հիշո՞ւմ եք՝ ինչ աղմուկ բարձրացրեց Ռուսաստանը, երբ Հայաստանը հումանիտար օգնություն ուղարկեց Ուկրաինա, երբ մի քանի տարի էր` պատերազմ էր: Ադրբեջանը բազմաթիվ անգամ նման օգնություն է ուղարկել, բայց ոչ մի ծպտուն Ռուսաստանի «արդարացի» ԱԳՆ-ից»։

Նա նաև նշեց, որ Ռուսաստանը շատ ցավոտ է արձագանքում Հայաստանի պարագայում, իսկ Ադրբեջանի պարագայում ձև է անում, թե չի նկատել:

Աղբյուր` Փաստինֆո