Փաստ ինֆո

ՀՀ ինքնիշխան տարածք ապօրինի ներխուժած ադրբեջանցու կողմից սպանված ԶՊՄԿ պահնորդ Հայրապետ Մելիքսեթյանի իրավահաջորդները մտավախություն ունեն, որ Հուսեյին Ախունդովին ցմահ ազատազրկման դատապարտելուց հետո կարող է բարձրացվել «գերիների փոխանակման» քողի ներքո նրան Ադրբեջանին հանձնելու հարցը։

Ինչպես արդեն տեղեկացրել ենք՝ Վերաքննիչ քրեական դատարանը՝ դատավոր Գրիգոր Հովհաննիսյանի նախագահությամբ, բավարարել է տուժող կողմի բողոքը՝ մասնակիորեն բեկանելով Հուսեյին Ախունդովին 20 տարվա ազատազրկման դատապարտելու մասով դատավճիռը և նրա նկատմամբ որպես պատիժ նշանակելով ցմահ ազատազրկումը։

Տուժող կողմը, թեև համոզված է, որ իրապես Ախունդովը պետք է ցմահ ազատազրկման դատապարտվի, սակայն ԶՊՄԿ պահնորդի դուստրը՝ Անի Մելիքսեթյանը, «Փաստինֆո»-ի հետ զրույցում կիսվեց որոշ կասկածներով և մտավախություններով առ այն, որ բողոքի հապճեպ բավարարմամբ Ախունդովին ցմահ ազատազրկման դատապարտելով՝ կարող են նրան փոխանցել Ադրբեջանին, մինչդեռ, տուժող կողմը պնդում է՝ Ախունդովը ոչ թե գերի է, այլ՝ հանցագործ։

«Արդեն ութ ամիս է՝ դատական պրոցեսների մեջ ենք, միշտ բախվել ենք խնդիրների, մեր դեմ «պատնեշ» է եղել, այսօր առավոտյան՝ 09։30-ին փաստաբանը զանգեց, ասաց, որ Վերաքննիչ դատարանից զանգել և տեղեկացրել են, որ ժամը 10։00-ին դատական նիստն է լինելու։ Կապանից, բնականաբար, 30 րոպեի ընթացքում անգամ շատ մեծ ցանկության դեպքում չէինք կարող 320 կմ անցնել և հասնել Երևան՝ մասնակցելու նիստին։ Մեր բոլոր հնարավոր և անհնարին ջանքերը, որ դատական նիստը չեղարկվի, չի հաջողվել և առանց տուժող կողմի դատական նիստը կայացել է։ Արդեն ավելի ուշ տեղեկացանք, որ տրվել է ցմահ ազատազրկում, այսինքն, այն ինչ պահանջել ենք, մեր բողոքը, այսպես ասած, բավարարվել է, բայց շատ կասկածելի և տարօրինակ է, որ դեկտեմբերի 19-ին նշանակված դատական նիստը տեղափոխել են այսօր, հապճեպ՝ 30 րոպեի ընթացքում դատական նիստ անցկացրել։ Այն, որ պետք է ցմահ լիներ, այո, պետք է լիներ, որ գոնե մի փոքր սրտհովանք լիներ մեզ համար։ Պայքարը դրա համար էր, բայց ոչ թե զուտ բառի համար, որ անունը դնեն ցմահ, այլ՝ որ իսկապես ցմահ պատիժ կրի։ Ես չգիտեմ՝ այս դատավճիռն իսկապես առանց որևէ ենթատեքստի է, առանց որևէ սպասվող քայլերի, թե ինչ-որ բան է ծրագրվում»,- ասաց Մելիքսեթյանը՝ հավելելով, որ խոսակցություններ են գնում գերիների փոխանակման հետ կապված։

Տուժողի դուսրտը պնդում է՝ Ախունդովը ոչ թե գերի է, այլ՝ հանցագործ, տուժող կողմը դեմ է նրա փոխանակմանը Ադրբեջանում պահվող գերիների հետ։

«Ներկայացված վերաքննիչ բողոքով խնդրել էինք նաև այդ մարդասպանին տարանջատել գերու կարգավիճակից, նա դիվերսանտ է, որ հատել է սահմանը և եկել խաղաղ պայմաններում խաղաղ բնակիչ սպանել։ Իմ ընտանիքը դեմ է, որ նրան բերեն, հավասարեցնեն գերու կարգավիճակին։ Իշխանության գլուխ ով էլ լինի՝ ոչ ոք չունի իրավունքը, որ առանց մեր ընտանիքի համաձայնության՝ Ախունդովին գերիների հետ փոխանակման գործընթաց սկսի։ Որևէ երաշխիք չունենք։ Ութ ամիս պայքարել ենք, իրականում ութ ամիս դժոխքի միջով ենք անցել, այսօր կա այն, ինչին փորձել ենք հասնել՝ արդարության, բայց դա ավելի շատ անհանգստացնում է »,- ընդգծեց Անի Մելիքսեթյանը՝ հարց բարձրացնելով, թե այս երկրում կա արդյոք մի տեղ, որտեղ հնարավոր է հասնել արդարության․ «Գիտեք, ութ ամիս է՝ իմ ընտանիքը միայնակ է պայքարում։ Ի սկզբանե պետությունն այս հարցը որակել է որպես պետական, ազգային հարց, բայց պետությունը ոչինչ չի արել։ Արդեն ութ ամիս է անցել, ութ ամսվա մեջ իշխանության որևէ ներկայացուցիչ, պետական որևէ անձ չի հետաքրքրվել, թե արդյո՞ք այս ընտանիքը ապրում է, թե ոչ։ Հիմա գոնե խնդրում եմ, որ մարդ լինեն, գոնե վստահ լինենք, որ իրապես լինելու է ցմահ բանտարկություն։ Իմ խնդրանքը սա է, որ այլ բան չլինի»։

Հիշեցնենք, որ ապրիլի 10-ին ՀՀ ինքնիշխան տարածք են ներխուժել ադրբեջանցի երկու զինծառայող՝ Ագշին Բաբիրովը և Հուսեյին Ախունդովը։ Քաղաքացիների կողմից նախ հայտնաբերվել եւ իրավապահներին էր ներկայացվել Ագշին Բաբիրովը, որը հայտնել էր, որ ՀՀ միայնակ չէր ներխուժել։ Օրեր շարունակ Հայաստանի իրավապահները, ԱԱԾ-ն չէին կարողանում հայտնաբերել դիվերսանտին, որը այդ ընթացքում հասցրեց սպանություն իրականացնել։ Ապրիլի 12-ին սպանվեց ԶՊՄԿ պահնորդ, 57-ամյա Հայրապետ Մելիքսեթյանը՝ պոչատար գնացող խողովակաշարի վրա աշխատանքներ իրականացնելիս։ Դիակի զննությամբ հայտնաբերվել են հրազենային վնասվածքներ՝ գլխի և կրծքավանդակի շրջանում։ Դեպքի վայրից վերցվել են նմուշներ, երկփողանի հրացան, որը հայտնաբերվել է տնակի մեջ, ինչպես նաև քննությանը հետաքրքրող այլ առարկաներ: Դեպքի առթիվ ՔԿ-ում նախաձեռնվել էր քրեական վարույթ՝ ՀՀ քրեական օրենսգրքի 155-րդ հոդվածի 1-ին մասի և 335-րդ հոդվածի 1-ին մասի հատկանիշներով։

Մեր երկրի տարածքում սպանություն իրականացրած ադրբեջանցուն կրկին հայտնաբերել են բնակիչներն ու ներկայացրել իրավապահներին։

Ագշին Բաբիրովը Սյունիքի մարզի ընդհանուր իրավասության դատարանի որոշմամբ մեղավոր է ճանաչվել ՀՀ սահմանն ապօրինի հատելու, ռազմամթերք տեղափոխելու մեղադրանքով և դատապարտվել ազատազրկման՝ 11.5 տարի ժամկետով, իսկ Հուսեյին Ախունդովը մեղավոր է ճանաչվել ՀՀ սահմանն ապօրինի հատելու, ռազմամթերք տեղափոխելու և ԶՊՄԿ պահնորդին սպանելու համար՝ դատապարտվելով ազատազրկման՝ 20 տարի ժամկետով։

Տուժող կողմը համաձայն չէր առաջին ատյանի դատարանի վճռի հետ և բողոք է ներկայացրել՝ պահանջելով ցմահ ազատազրկման դատապարտել Ախունդովին, որը բավարարվել է և Ախունդովը դատապարտվել է ցմահ ազատազրկման։

Հեղինակ՝ Իզաբել Սահակյան

Աղբյուր` Փաստինֆո