Փաստ ինֆո

Երբ հարցը տալիս էիք՝ մենք քննարկում էինք, թե տիկին Խամոյանը կոկաինի շարժի պրոտոկոլները որտեղի՞ց գիտի այսքան մանրամասն։ Այս մասին կառավարության հետ հարցուպատասխանի ժամանակ ասաց Նիկոլ Փաշինյանն՝ անդրադառնալով «Հայաստան» խմբակցության պատգամավոր Ագնեսա Խամոյանի հարցին, թե քանի անձ կա ձերբակալված 1 տոննա թմրանյութի՝ Հայաստան ներթափանցման գործով, ինչպես կարող էր այդ բեռը սահմանային մաքսակետը հատել, մաքսայինի քանի աշխատակից մեղադրյալի կարգավիճակ ունի, ինչպես կարող էր 250 մլն դոլար արժողությամբ բեռը 4 երկրի սահմանն հատել և հասնել ՀՀ՝ առանց իշխանությանհովանավորության։

«Բա որ այդ ամենը առանց իշխանության չի լինում, իսկ բռնելը ո՞նց է լինում։ Այսինքն, ընդդիմությո՞ւնը գնաց էդ բեռը բռնեց, ասեց՝ դավադիր իշխանությունն ուզում էր անցկացնել, մենք էլ բռնեցի՞նք»,- արձագանքել է Փաշինյանը։

Նա նշեց, որ գործի նոր մանրամասների չի տիրապետում։ «Եթե իմանայի, որ այս հարցը տալու եք՝ գուցե մանրամասները ճշտեի։ Կոկաինի շարժերի պրոտոկոլներով չեմ հետաքրքրվում»։

Խամոյանն արձագանքեց, որ Փաշինյանն ինքն է հնչեցրել ընկերության անունը, որը կամ լոգիստիկ խնդիր է ապահովել, կամ իրեն է պատկանել բեռը։

«Դուք եք մարդու անուն-ազգանուն տվել՝ խախտելով մարդու անմեղության կանխավարկածը։ 6 ամիս անց՝ դուք ուզում եք մեզ հավաստիացնել, որ ի պաշտոնե, մասնագիտության բերումով տեղեկատվություն չե՞ք փորձել ստանալ, չե՞ք փորձել հասկանալ, թե ինչ եղավ էդ գործը, անկեղծորեն չեմ հավատում»։

Փաշինյանը պատասխանեց. «Հավատաք-չհավատաք, ձեր իրավունքն է, չեմ հետաքրքրվել, որովհետև նախաքննության մարմինը, դատախազությունը, դատարանները պետք է իրենց գործն անեն։ Չեմ հետաքրքրվել, բայց որ ասեցիք՝ կհետաքրքրվեմ»։

Նշենք, որ 1 տոննա կոկաինը ոչ թե իրավապահներն են հայտնաբերել, այլ այն անցել էր մաքսային հսկողությունը, հայտնվել Հայաստանում։ ԴԱՀԿ նախկին ղեկավար Միհրան Պողոսյանը տեսանյութ էր հրապարակել, որում երևում է, թե ինչպես է «Մրգենի» ՍՊԸ աշխատակիցը բանանի արկղի մեջ թմրամիջոց հայտնաբերում, ինչի մասին ԱԱԾ-ին հայտնել է հենց ինքը՝ Միհրան Պողոսյանը։

Աղբյուր` Փաստինֆո