Փաստ ինֆո

Օրակարգում ԱԺ արտահերթ ընտրություններ անցկացնելու հարց չկա։ Այս մասին ԱԺ-ում լրագրողների հետ զրույցում ասաց Քաղաքացիական պայմանագիր խմբակցության պատգամավոր Վահագն Ալեքսանյանը։

«Առհասարակ նման հարց չի քննարկվել»,-վստահեցրեց նա։

Անդրադառնալով բանակցային գործընթացն՝ նա ընդգծեց, որ այդ պրոցեսում կա խնդիր։

«Բազմիցս խոսվել է այն մասին, որ Ադրբեջանի նախագահը խուսափում է բանակցություններից և փաստացի մենք խնդիր ունենք, որ Ադրբեջանի նախագահը ներկայանա այդ բանակցություններին, թե Գրանադայում չներկայացավ, թե Բրյուսել չեկավ։ Հայաստանի Հանրապետությունը և պատկան պաշտոնյաները ամեն ինչ անում են, որպեսզի թույլ չտան սահմանային էսկալացիա։ Թե միջազգային գործընկերների հետ երկկողմ բազմակողմ շփումների ընթացքում բազմիցս շեշտվում է անհրաժեշտությունը որտեսզի Ադրբեջանի վրա պատշաճ դիվանագիտական ճնշումներ բանեցնեն, որպեսզի վերջինս վերադառնա բանակցությունների սեղանին և չգնա էսկալացիայի»։
Անդրադառնալով հարցին, թե ինչու է ՔՊ-ն նախընտրական ծրագրից հանել Արցախի երաշխավորը լինելու խոստումը՝ Ալեքսանյանն ասաց, որ նման բան չկա։

«Կներեք, բայց մենք չենք ստորագրել Լեռնային Ղարաբաղի լուծարման մասին փաստաթուղթը»։
Դիտարկմանը, թե տարբեր տարեթվեր են հնչում, թե երբ հանձնվեց Արցախը, ի վերջո, ե՞րբ է հանձնվել՝ նա նշեց, որ բոլոր այդ տարեթվերին էլ այդ հարցը լուծվել է։

Հարցին, թե եթե այդպես է՝ ինչու էր Փաշինյանը Վերածննդիր հրապարակում գոռում՝ «Արցախը՝ Հայաստան է, և վերջ», ինչու էր վարչապետի տղան գնում ծառայության Ադրբեջանի տարածքը պաշտպանելու։

Նա պատասխանեց, թե չեն գիտակցել այն պրոցեսը, որի մեջ գտնվել են։ «Կարծում եմ, դա տեսանելի է։ Մեր խնդիրը եղել է այն, որ մենք չենք համակերպվել այդ իրականության հետ և ամբողջությամբ չենք գիտակցել, թե ինչ է տեղի ունենում մեր շուրջը, որովհետև մենք բոլորս գոռացել ենք՝ «Արցախն՝ Հայաստան է և վերջ», բայց ուշադրություն չենք դարձրել ոչ մի պահի, որ աշխարհի ոչ մի երկիր մեր հետ չի ձայնակցում, երբ մենք դա գոռում ենք, իսկ մեր դաշնակիցը Ադրբեջանի թիվ մեկ մատակարարն է՝ զենքի տեսանկյունից»,- հայտարարեց քպական պատգամավորը։

Աղբյուր` Փաստինֆո