Փաստ ինֆո

Ալավերդիում ավագանու մեծամասնությունը՝ 27 անդամներից 14-ը նախաձեռնել են նիստ՝ համայնքապետին անվստահություն հայտնելու համար։ Ինչ է տեղի ունեցել դրանից հետո. համայնքապետը լկտի, խուլիգանական ձևով փակել է համայնքապետարանի դուռը, հետո փակել են նիստերի դահլիճի դուռը փորձելով թույլ չտալ, որպեսզի նիստը կայանա։ Այս մասին ԱԺ-ում հայտարարեց «Քաղաքացիական պայմանագիր» խմբակցության պատգամավոր Վահագն Ալեքսանյանը՝ անդրադառնալով «Հայաստան» խմբակցության պատգամավոր Գեղամ Նազարյանի հարցին, թե ինչ է կատարվում Ալավերդիում և ինչու է ոստիկանությունը արգելափակում համայնքապետարանի աշխատակիցների և ավագանու մուտքը համայնքապետարան։

«Նիստը գումարվել է օրենք տառին համապատասխան, նիստը ընթանում էր, ավագանիները արդեն քվերակում էին, քվեաթերթիկները գցում էին քվեատուփը՝ մեկն էլ «Ապրելու երկիր» կուսակցության նախագահը, ով ավագանու անդամ չէ՝ մտել է դահլիճ և շուռ է տվել քվեատուփը։ Ոստիկանությունը այստեղ գործողություն պիտի կատարի՞, թե՞ ոչ։ Մարդիկ մտել են խուլիգանական սպառնալիքներով, հայհոյանքներով շուռ են տվել քվեատուփը»,- պնդել է քպական պատգամավորը։

Հիշեցնենք, որ այսօր առավոտից Ալավերդու համայնքապետարանում լարված իրավիճակ էր, համայնքապետարանի դիմաց մեծ թվով ոստիկաններ էին հավաքված։

ՔՊ-ական խմբակցությունը՝ ԱԺ պատգամավոր Արեն Մկրտչյանի, մի քանի մարդկանց և ոստիկանության ուղեկցությամբ ներս էին մտել, և թույլ չեն տվել համայնքապետարանի աշխատակիցներին և ավագանու անդամներին ներս մտնել:
Այնուհետև, գատնի քվեարկության ավարտից հետո միայն նիստերի սենյակ մտան գործող համայնքապետ Արկադի Թամազյանը և

«Ապրելու երկիր» կուսակցության նախագահ Մեսրոպ Առաքելյանը։
Թամազյանը նշեց, որ նիստը սկսել են օրենքի խախտմամբ, քանի որ պետք է 30 րոպե սպասեին, մինչ համայնքապետը կամ տեղակալը գային, և հետո միայն նրանց չգալու դեպքում կարող էր նիստը վարել ավագ անդամը։
Ինչպես արդեն տեղեկացրել ենք՝ քաղաքական իշխանության նախաձեռնությամբ այսօր անվստահություն են հայտնել համայնքի ղեկավար Արկադի Թամազյանին և համայնքապետ ընտրել ավագանու ՔՊ խմբակցության ղեկավար, Շնողի նախկին համայնքապետ Դավիթ Ղումաշյանին։

Ավագանու 27 անդամից 13-ը ՔՊ անդամներն էին, մեկը «Ապրելու երկիր» խմբակցությունից հեռացած և «անկախ» անդամ դարձած Սիմոն Զախարովը:

Աղբյուր` Փաստինֆո