Փաստ ինֆո

ՔՊ-ական պատգամավոր Մարիա Կարապետյանը մտահոգություններ ունի, որ դատավորները վստահություն չունեն՝ առաջխաղացման համար ԲԴԽ դիմումներ ներկայացնելու հարցում։

Մասնավորապես, Վճռաբեկ դատարանի հակակոռուպցիոն պալատում դատավորի ընտրության հարցի քննարկման ժամանակ Մարիա Կարապետյանը, դիմելով ԲԴԽ նախագահ Կարեն Անդրեասյանին, նկատեց, որ արդեն երկրորդ անգամ է լսում, որ դիմումներ չկան բավականաչափ։

«Եթե դատավորները չեն ցանկանում դատավոր լինել, նրանք պետք է մասսայաբար դիմումներ գրեին և հեռանային համակարգից, եթե ցանկանում են դատավոր լինել, տրամաբանական և բնական պետք է լինի նաև առաջխաղացման ձգտումը։ Ինչու չեն դատավորները ցանկանում ավելի շատ իրացնել հնարավորությունները։ Ինչ-որ խնդիր կա և ամենայն հավանականությամբ, իմ մտավախությունն այն է, որ չի ստացվում այնպիսի տպավորություն ստեղծել դատական համակարգում, որ իրապես մրցակցային պայմաններում երեք կամ ավել թեկնածուների առաջադրման պայմաններում ԱԺ-ն հնարավորություն ունենա լսելու թեկնածուների և իրականացնել որոշում՝ այդ լսումների հիման վրա»,- ասաց Մարիա Կարապետյանը՝ հավելելով, որ չի կարծում, որ դատավորները չեն ցանկանում առաջխաղացում ունենալ։

Կարեն Անդրեասյանը, արձագանքելով, նշեց, որ դա վտանգավոր թեզ է, կան դատավորներ, որոնց խնդրեն էլ, չեն ցանկանա առաջխաղացում ունենալ, քանի որ կա իրավունքի դատարան և փաստի դատարան։

Աղբյուր` Փաստինֆո