Փաստ ինֆո

Դուք ասում եք, որ 2010 թ-ի «Վարչատարածքային բաժանման մասին» ՀՀ օրենքը ներքին սպառման համար է, բայց դուք և ձեզ սատարող ռուսական որոշ պրոպագանդիստներ , ձեր քաղաքական թիմը 2-3 ամիս է, ինչ ասում է, որ Արցախում վերջին դեպքերը տեղի են ունեցել Պրահայի հայտարարության բերումով, որը հայտարարություն է միայն։ Այսինքն, ՀՀ ԱԺ-ում քվեարկությամբ ընդունված օրենքն ավելի քիչ արժեք ունի, քան հայտարարությունը, որն արվել է երկրի ղեկավարի կողմից։ Այս մասին ԱԺ պետաիրավական հարցերով հանձնաժողովի արտահերթ նիստում ասաց «Քաղացաքացիական պայմանագիր» խմբակցության պատգամավոր Վահագն Ալեքսանյանը։
«Դուք այս տրամաբանությունը տրամաբանակա՞ն եք համարում, կիսո՞ւմ եք ռուս պրոպագանդիստների տեսակետը, որ Արցախում վերջին իրադարձությունները Պրահայի հայտարարության հետևանք են։ Չեք գտնում, որ այն, ինչ անում եք՝ մանիպուլիացիա է, հաշվի առնելով, թե 2010-ի վարչատարածքային օրենքը, թե Ստամբուլյան խարտիան։ Մի հարց էլ, եթե «Հայաքվեն» ընդունվի, ապա արդյո՞ք Ստամբուլյան Խարտիայի տակ ստորագրելը պետք է պատժելի համարվի»։

«Հայաստան» խմբակցության քարտուղար Արծվիկ Մինասյանը պատասխանեց, որ որևէ պրոպագանդիստի կարծիք կամ տեսակետ իր համար անվերապահ չէ։

«Մեր տեսակետը մնում է այն, որ Արցախի միջազգային ճանաչման գործընթացը սկզբունքային նշանակության հարց է մեր ժողովրդի անվտանգության տեսակետից։ Հետևաբար, ցանկացած հայտարարություն, որը դեմ է դրան՝ մերժելի է և պետք է արժանանա քրեաիրավական գնահատկանի»։

Ինչ վերաբերում է Վարչատարածքային բաժանման մասին օրենքին, ապա նա ընդգծեց, որ պետք է հասկանալ, թե ովքեր են այդ օրենքի նախաձեռնողները և ինչն է ստիպել, որ առանձին դրվագներում ապօրինի ձևակերպումներ լինեն։ «Ամեն դեպքում՝ ձեզանից բացի որևէ մեկն, անգամ Ալիևը չի վկայակոչում այդ օրենքը, չեմ հասկանում, թե ինչի ենք մենք անընդհատ սա առաջ բերում։

Անդրադառնալով Ստամբուլյան Խարտիային՝ չի կարելի վիճարկել այն, որ տարածքային ամբողջականությունը միջազգայնորեն ընդունված սկզբունք է։ Հարցն այն է, թե արդյոք տարածքային ամբողջականությունը կապ ունի՞ Արցախի պատկանելության հետ։ Մենք պնդում ենք, որ դրա իրավական, քաղաքական , պրակտիկ հիմքերն ակնհայտ են։ Երբ Ադրբեջանը հայտարարում էր անկախության մասին, այդ ժամանակ Արցախն այլևս որևէ առնչություն չուներ Արցախի հետ, Արցախն արդեն անկախություն հռչակած պետություն էր, առանձին սուբյեկտ»։

Աղբյուր` Փաստինֆո