Փաստ ինֆո

Հակակոռուպցիոն դատարանը կքննի ՊՆ նախկին նախարար Վիգեն Սարգսյանի վերաբերյալ քրեական գործը՝ առանց Սարգսյանի մասնակցության՝ հեռակա քննությամբ։ «Փաստինֆո»-ն տեղեկացավ, որ ՊՆ նախկին նախարար Վիգեն Սարգսյանի վերաբերյալ քրեական գործը կքննի Հակակոռուպցիոն դատարանի դատավոր Սարգիս Դադոյանը։

Հիշեցնենք, որ քրեական վարույթը, որի շրջանակներում քրեական հետապնդում է հարուցվել ՊՆ նախկին նախարար Վիգեն Սարգսյանի նկատմամբ, հարուցվել է դեռևս 2019թ.-ին։ 2023թ փետրվարի 8-ին քրեական վարույթի օրինականության նկատմամբ հսկողություն իրականացնող դատախազի կողմից որոշումներ են կայացվել ՀՀ պաշտպանության նախկին նախարար Վ.Ս.-ի նկատմամբ 2003 թվականի ապրիլի 18-ին ընդունված ՀՀ քրեական օրենսգրքի 309-րդ հոդվածի 3-րդ մասով (համապատասխանում է գործող ՀՀ քրեական օրենսգրքի 441-րդ հոդվածի 2-րդ մասի 5-րդ կետին), իսկ ՀՀ ՊՆ կենտրոնական բնակարանային հանձնաժողովի 5 անդամի նկատմամբ 2003 թվականի ապրիլի 18-ին ընդունված ՀՀ քրեական օրենսգրքի 308-րդ հոդվածի 2-րդ մասով (համապատասխանում է գործող ՀՀ քրեական օրենսգրքի 441-րդ հոդվածի 2-րդ մասի 5-րդ կետին) հանրային քրեական հետապնդում հարուցելու մասին. վերջիններին ներկայացվել է մեղադրանք: Նրա նկատմամբ որխես խափանման միջոց է ընտրվել կալանավորումը, վերջինս հետախուզման մեջ է։

Ըստ իրավապահների՝ Վիգեն Սարգսյանը հանձնարարել է առաջիկա նիստում բնակարաններ հատկացնել բնակարանային հաշվառման մեջ չգտնվող կամ ցուցակներում ավելի ուշ ընդգրկված իր կողմից նախընտրած 26 զինծառայողների, ինչպես նաև Նախարարության համակարգի զինծառայող չհանդիսացող երեք անձանց: Վիգեն Սարգսյանն ինքը հայտարարությամբ է հանդես եկել՝ նշելով, որ դա նողկալի է և առաջարկելով իրավապահներին՝ հրապարակել բնակարաններ ստացածների ցանկն` յուրաքանչյուրի մարտական ուղին և վաստակը նշելով, և նրանց ցանկը, որոնց իրավունքները հսկող դատախազի կարծիքով խախտվել են։ Վիգեն Սարգսյանը նաև հայտնել է, որ դատախազությունը որևէ ջանք չի գործադրել իր հետ կապ հաստատելու համար, իսկ իր նկատմամբ հետապնդումը գնահատել է քաղաքական։

Դատախազությունը որոշել է քրեական վարույթն ուղարկել դատարան՝ հեռակա դատաքննության։

Հեղինակ՝ Իզաբել Սահակյան

Աղբյուր` Փաստինֆո