Փաստ ինֆո

Ոստիկանությունը հատուկ գործողություններ է իրականացրել Մոսկվայի ԼԳԲՏ հաստատություններում։ Ըստ ականատեսների՝ իրադարձությունները տեղի են ունեցել ակումբներում և սաունաներում՝ թմրանյութ որոնելու պատրվակով, լուսանկարվել են այցելուների անձնագրերը։ Բացի այդ, Սանկտ Պետերբուրգի ամենահին գեյ-ակումբը հայտարարեց իր փակման մասին։

Այս մասին հայտնում են ռուսական տելեգրամյան ալիքները՝ նշելով, որ նոյեմբերի 30-ին ՌԴ Գերագույն դատարանը արգելել է ԼԳԲՏ շարժման գործունեությունը՝ այն դիտարկելով որպես ծայրահեղական կազմակերպություն։

«Զգույշ, Մոսկվա» տելեգրամյան ալիքը նշում է, որ դեկտեմբերի լույս 2-ի գիշերը ոստիկանությունը ներխուժել է Մոսկվայի Մալայա Յակիմանկայի գիշերային ակումբ՝ ԼԳԲՏ երեկույթի ժամանակ, որին մասնակցել է մոտ 300 մարդ։ Ոստիկանությունը ներխուժել է հաստատություն՝ թմրանյութ որոնելու պատրվակով եւ մի քանի այցելուների բերման ենթարկել։

Ավելի ուշ նրանք ազատ են արձակվել։ «Ես կարծում էի, որ վերջ, ես 12 տարով կազատազրկվեմ. 300 հոգով կանգնել էինք մերկ՝ միայն անդրավարտիքներով, ու սպասում, մինչեւ բերեցին մեր շորերը։ Ոչ ոք չէր հասկանում, թե ինչ էր կատարվում»,- տելեգրամյան ալիքին պատմել է մասնակիցներից մեկը։

Նմանատիպ միջոցառումներ տեղի են ունեցել նաեւ ԼԳԲՏ-ի հետ առնչվող այլ թեմատիկ հաստատություններում։ «Զգույշ, Մոսկվա» տելեգրամյան ալիքի հաղորդմամբ՝ իրավապահների հատուկ գործողություններն սկսվել են դեկտեմբերի 1-ին՝ Մոսկվայի ժամանակով ժամը 22:00-ի սահմաններում: Իրավապահները ստուգել են «Ավտոզավոդսկայա» մետրոյի մոտ գտնվող ակումբը և «Պոլյանկա» կայարանի մոտ տղամարդկանց համար նախատեսված ստրիպտիզ ակումբը։ Հաստատությունների տնօրինությունը այցելուներին նախապես զգուշացրել է ոստիկանական այցի մասին։ Ստուգումը տեղի է ունեցել նաև Չիստոպրուդնի բուլվարի մոտ գտնվող բարում։

ԼԳԲՏ շարժման դեմ հայցը ՌԴ գերագույն դատարան ներկայացրել էր ՌԴ արդարադատության նախարարությունը՝ գնահատելով, որ շարժման գործունեությունը պարունակում է «ծայրահեղական կողմնորոշման տարբեր նշաններ և դրսևորումներ, ներառյալ սոցիալական և կրոնական ատելության հրահրումը»: Դատարանը բավարարել է հայցը ու ԼԳԲՏ-ի գործունեությունն արգելել ՌԴ տարածքում։

Աղբյուր` Փաստինֆո