Փաստ ինֆո

Ադրբեջանից հայ բնակիչների հեռանալու պատասխանատվությունը կրում է Հայաստանը։ Այս մասին Սկոպյեում ԵԱՀԿ գլխավոր քարտուղար Հելգա Շմիդի հետ հանդիպման ժամանակ ասել է Ադրբեջանի արտգործնախարար Ջեյհուն Բայրամովը։

Ադրբեջանի ԱԳ նախարարը հայտնել է, որ հայկական կողմը տեղեկացված եղել է, որ Ադրբեջանը պատրաստվում է «հակաահաբեկչական» գործողություն» իրականացնել, սակայն զինված ուժերը դուրս չեն բերվել տարածքից։Բայրամովը նշել է, թե իբր ԼՂ բնակչության բռնի տեղահանման ընթացքում խաղաղ բնակիչների հանդեպ «բռնություն չեն կիրառել», ուստի բռնի տեղահանման ողջ պատասխանատուն հայկական կողմն է։

Հիշեցնենք, որ ադրբեջանցիներն ավելի քան 9 ամիս շրջափակման մեջ գտնվող Արցախի նկատմամբ սեպտեմբերի 19-ին սանձազերծեց ռազմական ագրեսիա՝ թիրախավորելով խաղաղ բնակիչներին, որոնց տարհանելու հնարավորություն ուղղակի չկար։ Մեկ օր կատաղի դիմադրություն ցույց տալուց հետո, ունենալով հարյուրավոր զոհեր, Արցախի իշխանությունները պարտադրված ընդունեցին կրակը դադարեցնելու ադրբեջանական պայմանը, այն է՝ լուծարել ՊԲ-ն ու սկսել ինտեգրացիա։ Ավելին, Բաքուն ներկայացրել էր նաեւ ցուցակ՝ Արցախի Հանրապետության կայացման գործում դերակատարում ունեցող անձանցից բաղկացած՝ պահանջել էր նրանց հանձնել, ըստ էության՝ դա սահմանելով խաղաղ բնակչության փրկագինը։

Սեպտեմբերի 27-ին Արցախից ՀՀ տեղափոխվելու ընթացքում ադրբեջանցիների կողմից Լաչինի միջանցքում տեղակայված ապօրինի անցակետից առեւանգվել է Արցախի նախկին պետնախարար Ռուբեն Վարդանյանը և Արցախի Պաշտպանության բանակի նախկին հրամանատարի առաջին տեղակալ, գեներալ-մայոր Դավիթ Մանուկյանը, այնուհետև՝ գեներալ լեյտենանտ Լևոն Մնացականյանը․ Դավիթ Բաբայանը, իսկ հոկտեմբերի 3-ին հայտնի դարձավ Արցախի նախկին նախագահներ Արկադի Ղուկասյանի, Բակո Սահակյանի, Արցախի ԱԺ նախագահ Դավիթ Իշխանյանի, Արայիկ Հարությունյանի առևանգման մասին։ Բաքվում հայ ռազմական-քաղաքական գործիչների դեմ շինծու քրեական հետապնդումներ են հարուցել։

Աղբյուր` Փաստինֆո