Փաստ ինֆո

Երեւանի քպական փոխքաղաքապետ Սուրեն Գրիգորյանը հայտարարել է, թե 2018 թվականին իրենք չեն խոստացել հանել գծերը։ Նա այս մասին խոսել է սկանդալային նախագծի վերաբերյալ Երեւանի քաղաքապետարանում տեղի ունեցած լսումների ժամանակ։

Հիշեցնենք, որ Երևանի քաղաքապետարանն առաջարկում է ավելի քան 10 անգամ բարձրացնել փոքր Կենտրոնում ավտոմեքենաների կայանման վճարը։ 2024 թվականի հունվարի 1-ից մայրաքաղաքի կենտրոնում կարմիր գծերում մեքենա կայանելու գինը տարեկան 12 000 դրամի փոխարեն կդառնա 160 000 դրամ։ Նախագծի շուրջ այսօր կազմակերպվել էր հանրային լսում։

Առաջարկվող փոփոխության նպատակը, ըստ փոխքաղաքապետի, բյուջեի հավաքագրումները բարձրացնելը չէ, այլ փոքր Կենտրոնի բեռնաթափումը։

«Եթե մենք այս փոփոխությամբ ունենանք բյուջեի ավելի քիչ մուտքեր, բայց ավելի բեռնաթափված կենտրոն, կհամարենք, որ մեր նպատակին հասել ենք։ Մեր գլխավոր նպատակը սա է»,- պնդել է նա։

Երեւանի ավագանու «Մայր Հայաստան» խմբակցության ղեկավար Մանուկ Սուքիասյանը նշեց, որ 2018 թ-ի հայտնի քայլարշավի ժամանակ խոստում էր հնչում, որ Կարմիր գծերը վերանալու է, մինչդեռ այս նախագիծը տրամագծորեն հակառակն է։

«Կամ դա պոպուլիզմ էր, կամ էլ չեք տիրապետել, որ այնուամենայնիվ պետք են այդ կարմիր գծերը։ Մյուս կողմից էլ, եթե մարդու գործը կենտրոնում է, տրանսպորտը վատ է աշխատում, ինչքա՞ն փող պետք է աշխատի, որ կարողանա գա կենտրոն գործի»,- նշել է ընդդիմադիրը։

Սուրեն Գրիգորյանն էլ պնդեց, որ հեղափոխության օրերին կարմիր գծերի վերացման խոստում չի տրվել՝ ավելացնելով, թե վարչապետը բազմիցս պարզաբանել է։

«Խոսվել է արագաչափերի մասին, կարմիր գծերի համար սահմանված գումարի չափը նրա համար է, որ քաղաքացին խուսափի Կենտրոնում երկար ժամանակով կայանելուց և այլ միջոցով հասնի կենտրոն»,- ասել է Ս.Գրիգորյանը։

«Վարորդի ընկեր» ՀԿ ղեկավար Տիգրան Քեյանը հարցրեց, թե քաղաքապետարանը հաշվի առե՞լ է տվյալ հատվածի բնակիչների իրավունքները։

Սուրեն Գրիգորյանը նշեց, որ այս պահին հարցն ակտիվ քննարկվում է։ «Պետք է հասկանանք, որ հաճախ բակերում կայանման հնարավորություն կա, միաժամանակ, եթե այս որոշումը ընդունվի, ապա ժամը 24:00-9:00-ն անվճար է լինելու կայանումը։ Միգուցե կարելի է քննարկել ժամերը փոփոխելու հարցը։ Կարևոր նպատակը կենտրոնի բեռնաթափումն է։ Չեմ կարծում, որ եթե ես Կենտրոնի բնակիչ եմ, ապրում եմ Աբովյան փողոցում, ապա դա նշանակում է, որ ամբողջ զոնայում ինձ համար անվճար պետք է լինի»,-ասաց նա։

Հասարակական գործիչ Էդգար Ղազարյանն էլ անդրադառնալով հիմնավորմանը նշեց, որ e-draft-ում տեղադրված նախագծում նշված է, որ այն կոչված է Կենտրոնի բեռնաթափմանը, սակայն որևէ այլ հիմնավորող դրույթ կամ հաշվարկ չկա։ «Ինձ համար այս քննարկման արդյունքում ակնհայտ դարձավ, որ որոշումը մշակվել է խիստ հապճեպ, չունի որևէ հիմնավորում, քաղաքապետարանը որևէ լուծում չի առաջարկում բնակիչներին, այն չի բխում երևանցիների շահերից։ Այս քննարկումը վկայում է, որ քաղաքապետարանի աշխատակազմը պետք է դուրս բերի այս նախագիծը շրջանառությունից և չներկայացնի ավագանու քննարկմանը»։
Սուրեն Գրիգորյանն արձագանքեց, որ հիմնավորումն առկա է և որ հնչեցված տեսակետը միայն մասնավոր կարծիք է։

Աղբյուր` Փաստինֆո