Փաստ ինֆո

Բաքվում գերության մեջ պահվում են 55 հայեր։ Այս մասին հրավիրված ասուլիսում հայտնեց իրավապաշտպան, ՄԻԵԴ-ում հայ գերիների ներկայացուցիչ Սիրանուշ Սահակյանը՝ նշելով, որ կա 6 քաղաքացիական գերի, 41 ռազմագերի և 8 քաղաքական հետապնդման ենթարկվող բանտարկյալ։

« Սա պաշտոնականացված թվաքանակ է, սրանից զատ Ադրբեջանում գերեվարվել են առնվազն 80 ռազմագերիներ և քաղաքացիական անձինք, որոնց ճակատագրերի պարզման ուղղությամբ քայլեր չեն իրականացվում»,- նշեց իրավապաշտպանը։

Սիրանուշ Սահակյանի դիտարկմամբ՝ 44-օրյա պատերազմի առնչությամբ գերեվարված քաղաքացիները դեռ Ադրբեջանում են, ինչն արդեն խոսում է ձախողումների մասին։

«Որպես կանոն ակտիվ ռազմական գործողություններից հետո տեղի է ունենում գերիների փոխանակում, այս առումով մենք տեսանք, որ նոյեմբերի 9-ի դրույթները չկատարվեցին»,- նշեց նա։

Անդրադառնալով ՀՀ-ի բացթողումներին՝ Սահակյանն ընդգծեց, որ Հայաստանը փորձ չարեց ինքնուրույնաբար մոտենալ ռազմագերիների խնդրին, Հայաստանն ընդունեց Ադրբեջանի խաղի այն կանոնները, որ գերիների ազատ արձակումը պետք է կապված լինի քաղաքական օրակարգում ներառված հարցերի հանգուցալուծման հետ․ «Բոլոր դեպքերում, երբ ունեցանք գերիների ազատ արձակում, դրանք կապցված էին որոշ քաղաքական գործոնների հետ, օրինակ, ականապատ տարածքների քարտեզների տրամադրումը»։

Աղբյուր` Փաստինֆո