Փաստ ինֆո

Երուսաղեմում անցորդների վրա կրակոցների զոհերի թիվը հասել է երեքի, գրում է Jerusalem Post-ը՝ վկայակոչելով արտակարգ իրավիճակների ծառայությունները։

24-ամյա մի կին տեղում սպանվել է, ապա ևս երկու տարեց տուժածներ ստացած վերքերից հիվանդանոցում մահացել են։ Եվս երեք հոգի ծանր վնասվածքներով հիվանդանոցում են, իսկ երեքի վիճակը՝ թեթևից միջին ծանրության։

Երուսաղեմի շրջանի ոստիկանապետ Դորոն Թուգերմանը հայտնել է, որ հարձակումն իրականացրել են Արևելյան Երուսաղեմի երկու բնակիչներ։ Նրանք մեքենայով բարձրացել են կանգառ, իջել և սկսել կրակել մարդկանց վրա M-16 ինքնաձիգից և ատրճանակից։ Իսրայելի պաշտպանության բանակի զինվորները և անցորդներից մեկը կրակել են հարձակվողների վրա, երկուսն էլ սպանվել են։ Նրանց մեքենաներում հայտնաբերվել է զինամթերքի մեծ քանակություն։

«Շին Բեթ» հետախուզական ծառայությունը հայտնել է, որ հարձակումն իրականացրել են «Համաս» խմբավորման հետ կապված եղբայրներ Մուրադ և Իբրահիմ Նամերները։ Երկուսն էլ նախկինում պատիժ են կրել իսրայելական բանտերում ահաբեկչության հետ կապված մեղադրանքներով:

Իսրայելում ԱՄՆ դեսպան Ջեք Լյուն դատապարտել է կրակոցները՝ այն անվանելով «զզվելի ահաբեկչություն» և ցավակցություն հայտնել զոհերի ընտանիքներին և վիրավորներին։

Աղբյուր` Փաստինֆո