Փաստ ինֆո

Փոքր կենտրոնում ավտոկայանատեղիների վարձավճարների բարձրացման հարցն անգամ քննարկման ենթակա էլ չէ, քանի որ դա ակնհայտորեն զայրույթ հարուցող նախագիծ է Այս մասին «Փաստինֆոյի» հետ զրույցում ասաց Երևանի ավագանու «Մայր Հայաստան» խմբակցության ղեկավար Մանուկ Սուքիասյանը։

Ինչպես արդեն տեղեկացրել ենք՝ Երևանի քաղաքապետի մամուլի քարտուղարը նախօրեին հայտնել էր քաղաքացու դեմ ուղղված հերթական նախագծի մասին, այն է՝ բարձրացնել ժողովրդական լեզվով ասած կարմիր գծերի վարձավճարները։ Ա գոտում, որը ներառում է Փոքր Կենտրոնի 40 փողոց, մեկ տարվա համար վարձավճար սահմանել 160 000 դրամը՝ գործող 12 000 դրամի փոխարեն։

«Նման նախագիծ է առաջարկում մի կուսակցություն, որն իշխանության եկավ խոստանալով վերացնել կարմիր գծերն ու արագաչափերը, բայց ոչ միայն դա չարեց, այլ այս ամենի սակագները էլ ավելի բարձրացրեց։ Հիմա էլ Կենտրոնը նախատեսում են դարձնել հատուկ սորտի՝ բարձր վճարունակություն ունեցող մարդկանց գոտի։ Դա անթույլատրելի է, անընդունելի է»,- նշել է ընդդիմադիր խմբակցության ղեկավարը։

Սուքիասյանի համար նախագծի հիմնավորումներն անընդունելի են, քանի որ տրանսպորտային խնդիրները և խցանումների խնդիրները համալիր լուծում են պահանջում։ «Անհրաժեշտ են վերգետնյա, ստորգետնյա ավտոկայանատեղիներ, նաև մետրոյի շարժակազմերի ավելացում է պետք, քանի որ պիկ ժամերի նաև մետրոյում է խայտառակ վիճակ։ Այս ամենը սերտորեն շաղկապված է շինթույլտվությունների խայտառակ քշերթի հետ, որով ավելի են ծանրաբեռնում քաղաքը»։

Նրա դիտարկմամբ՝ այս տրամաբանությամբ մի օր այս իշխանությունները ամբողջ քաղաքն են դարձնելու կարմիր գիծ և փող պահանջեն։

«Օրինակ, եթե մարդիկ Կենտրոնում հանդիպում ունեն, ի՞նչ անեն, շատերը հարկադրված են գործի բերումով ամբողջ օրն անցկացնել Կենտրոնում, իրենց շփումների այցելությունների պատճառով, մյուսներն էլ պարզապես ապրում են այստեղ։

Կարծում եմ, նման բարձր գին են սահմանել, որ քննարկումների արդյունքում մի քիչ նվազեցնեն և ցույց տան, թե կոմպրոմիսին են գնում, բայց իրականում դա դասական խաբեության և շառլատանության դրսևորում է»,- արձանագրել է Սուքիասյանը՝ ավելացնելով, որ սա երևանցիներ համար ապտակ է և ո երևանցիները պետք է հետևություններ անեն սրանից։

«Բառացիորեն 2 ամիս առաջ՝ ընտրությունների ժամանակ ինչու չէին բացահայտում իրենց մտադրությունները, որովհետև պոպուլյար չի չէ՞, ձայներ չէին հավաքի։

Էդ որ ասում էին՝ «Աասեք՝ կանենք», ուզում եմ հասկանալ, ո՞վ է իրենց նման բան ասել, որ որոշել են անել։ Բոլոր առումներով իմ համար անընդունելի նախագիծ է, որը մայրաքաղաքի բնակիչների կյանքը դարձնելու է անտանելի։

Ավելին, եթե անգամ, մարդը անապահով չէ, ունի որոշակի կայուն եկամուտ՝ ոչ մի տրամաբանությամբ չես կարող մարդուն ասել, որ տարեկան 160 000 դրամ պետք է ինքը վճարի, որ իրեն թույլ տանք, որ կենտրոնում քո մեքենան կայանես։ Ակնհայտ է, որ իրենք լրացուցիչ մուտքերի խնդիր են ուզում լուծել, դեմագոգիայի ժանրից է, թե քաղաքի Կենտրոնը կարգավորելու համար են անում։ Անում են՝ լրացուցիչ մուտքերի համար, առաջին հերթին համայնքային միջոցները ծախսելու իրենց գայլային ախորժակը բավարարելու համար է, որպեսզի Ամանորյա զարդարանքների ու սեփական պարգևավճարների վրա ավելի շատ միջոցներ հատկացնեն»,- ասաց Մ. Սուքիասյանը։

Աղբյուր` Փաստինֆո