Փաստ ինֆո

Տեսական մակարդակում պետք է արձանագրենք, որ, տնտեսական առումով երբ երկիրը գտնվում է իքս բլոկում, ապա իր անվտանգային համակարգը ևս իքս բլոկի շրջանակում է լինում։ Սա կանոն է, որին հետևում են բոլոր երկրները։ 2014թ․ հունվարի 1-ից Հայաստանը անդամակցում է ԵԱՏՄ-ին, որը Հայաստանին լուրջ հնարավորություններ է տվել։ «ՓաստԻնֆոյի» եթերում ասել է տնտեսագիտության թեկնածու, դոցենտ Սուրեն Պարսյանը։

Բանախոսի դիտարկմամբ՝ Հայաստանը չունի Ռուսաստանին տնտեսական այլընտրանք։ Հայաստանը ցորենի մոտ 70 տոկոսը, էներգակիրների 78 տոկոսը ներկրում է Ռուսաստանից, սրա այլընտրանքը այս պահին չունենք։ Հայաստանը պետք է փորձի դիվերսիֆիկացնել իր տնտեսությունը, բայց չի կարող հրաժարվել Ռուսաստանից, քանի որ ռուսական տնտեսությունը այժմ մրցունակ է։

Անդրադառնալով Հայաստանից արտահանվող գյուղատնտեսական ապրանքներին առնչվող չարաշահումներին, փորձագետը նշեց, որ Հայաստանի գյուղմթերքը կամ վերմշակվող գյուղմթերքը երբեմն ունի բավականին լուրջ կանոնների խախտումներ և ռուսական կողմը դա տարիներ շարունակ անտեսել է, իսկ հիմա չի անտեսում և կոնկրետ պահանջներ է ներկայացնում՝ քաղաքական իրավիճակով պայմանավորված։

Տնտեսագետը նշեց, որ Հայաստանի պետական բյուջեի եկամտային մասը կառավարությունը կարողացել է հավաքագրել, քանի որ նախատեսվածից մեծ տնտեսական աճ է ունեցել, իսկ ծախսային մասը կախված է պետության աշխատանքից։ Սա էլ իր հերթին երկու մասից է բաղկացած՝ կապիտալ ծախսեր և ընթացիկ ծախսեր։ Կառավարությունը շարունակաբար թերակատարում է կապիտալ ծախսերը, ինչի հետևանքով մեր տնտեսության մեջ խնդիրներ են առաջանում։ Ստացվում է, պետությունը տնտեսության միջի գումարները քաշում է, բայց չի կարողանում այդ գումարը վերադարձնել տնտեսություն։

Անվտանգության ոլորտում ծախսերի թերակատարումների առնչությամբ բանախոսը նշեց, որ դրանք երկու ուղղությամբ են թերակատարվել՝ զենքի գնումը և ենթակառուցվածքների շինարարական աշխատանքները։ Երկու ուղղությամբ էլ կառավարությունը ձախողել է։ Մենք պետք է գիտակցենք, որ առանց անվտանգության, տնտեսական զարգացում չենք ունենալու։
Անդրադառնալով անշարժ գույքի շուկային, տնտեսագետը նշեց, որ կառուցապատողներին «թույլ չեն տալիս», որ գները իջեցնեն, սակայն կառուցապատողները այս պահին լուրջ գերշահույթներ են ստանում։ Մեկ քմ․ բնակարանի ինքնարժեքը կազմում է մոտ 700, այն դեպքում, երբ միջինում այն վաճառվում է 1600-1700 դոլարով։

«Ցանկացած սոցիալական քաղաքականության վերջնարդյունքը մարդկանց կենսամակարդակն է։ Սակայն պետք է արձանագրենք, որ 2022թ․ դրությամբ Հայաստանի աղքատությունը կազմում է 24․8 տոկոս, որը ԱՊՀ երկրների շարքում ամենավատ ցուցանիշն է»,- ասել է Ս․ Պարսյանը։

Մանրամասները՝ տեսանյութում։

Աղբյուր` Փաստինֆո