Փաստ ինֆո

«Սպայկա» ընկերության 30 բեռնատար արդեն 6-րդ օրն է կանգնած են Վերին Լարսում։ Այս մասին «Փաստինֆոյի» հետ զրույցում ասաց ընկերության դիսպետչերական բաժնի ղեկավար Կարեն Աղդայանը։

Նրա փոխանցմամբ՝ իրենց մեքենաներից դեռ հետ չեն վերադարձել, սակայն տեղյակ է, որ կան ընկերություններ, որոնք գերադասել են հետ բերել ապրանքը Լարսից։

«Ունենք նաև մեքենաներ, որոնք Վրաստանում են կանգնած, քանի որ թույլ չեն տալիս բարձրանալ Լարս, եթե գնան էլ՝ այնտեղ այնքան շատ են մեքենաները, որ կանգնելու տեղ չկա»։

Ընկերությունը հիմնականում արտահանում է գյուղմթերք՝ լոլիկ , բիբար, սմբուկ խաղող, պանիր։

Աղդալյանն ասում է, որ Լարսում նախկինում էլ ստուգումներ եղել, են, այդ թվում՝ ուժեղացված, բայց սա միակ դեպքն է, երբ համատարած բոլոր բեռնատարներն են ստուգում։

«Նախկինում ընտրովի են իրականացվել ստուգումները, 10 մեքենայից՝ 1-ն էին ստուգում, իսկ հիմա 10-ից՝ 10-ն էլ ստուգում են։ 5-6 օրվա ընթացքում մեր մեքենաներից միայն 1 մեքենա է կարողացել անցնել։ Այսինքն, Լարս մտած 35 մեքենայից 30-ը դեռ կանգնած են, 1-ը մտել է Ռուսաստան, մնացածը՝ Բելոռուս։

Մեր մեքենաներից ևս ստուգվել են, մի մասին ասել են փաստաթղթային խնդիրներ կան, այսինքն ֆիտոսանիտարական սերտիֆիկատի փոփոխություններ են եղել, նախկինում չեն ներկայացրել այն պահանջները, որոնք հիմա են ներկայացնում, դրանք նոր պահանջներ են, բացի այդ՝ լաբորատոր փորձաքննությունների հարցն է։ Հիմա ուղարկում են լաբորատոր փորձաքննությունների, սպասում ենք պատասխանները գան, որ որոշում կայացվի հետագա գործողությունների համար»։

Նրա խոսքերով՝ դեռ վաղ է վնասների ամբողջական չափը գնահատել, բայց եթե մեքենան կանգնում է՝ դա արդեն վնաս է, քանի որ մեքենայի սառնարանն աշխատում է։ «Մեկ սառնարանը օրական 60 լիտր դիզել է ծախսում, 30 մեքենան 5-6 օրում ծախսել են շուրջ 10 տոննա վառելիք, դա ուղղակի ջուրն է գնացել։ Ստացվում է, մոտ 6 մլն դրամ միայն դիզվառելիքից օգտագործումից ստացած վնասն է։ Բացի դրանից՝ մենք վարորդին ենք օրապահիկ վճարում, դրան գումարվում է նաև այն, որ յուրաքանչյուր կանգնած օրն ազդում է ապրանքի որակի վրա, սա էլ իր հերթին ազդում է գնի վրա»։

Անդրադառնալով Արայիկ Հարությունյանի հայտարարությանը, թե խնդրի լուծումը կարող է լինել այն, որ յուրաքանչյուր հայ հայկական արտադրանք գնի՝ նա պատասխանեց, որ պահանջարկի դեպքում պատրաստ են արտահանել ցանկացած երկիր, սակայն այն ապրանքի համար, որ հիմա կանգնած է Լարսում՝ արդեն ուշ է նոր շուկա գտնելը։

«Մենք հիմա արտահանում ենք մերձբալթյան երկրներ, պատրաստ ենք նաև եվրոպական երկրներ արտահանել, դրա հնարավորությունն ունենք։ Ինչ վերաբերում է ներքին շուկային, ապա այստեղ այդ ծավալի արտադրանք հնարվոր չէ իրացնել»։

Աղդալյանն ասաց նաև, որ օրինակ իրենց ընկերությունն այս պահին մեր արտադրանքի 80-90 տոկոսը արտահանում է հենց Ռուսաստան, ուստի ակնկալում են, որ առաջիկա 1-2 օրերի ընթացքում խնդիրը կհանգուցալուծվի։

Աղբյուր` Փաստինֆո