Փաստ ինֆո

Միտինգը, որի ընթացքում հնչեցրած մտքերի համար իմ նկատմամբ քրեական գործ է հարուցվել՝ ապրիլ ամսին էր, այն ժամանակ մենք պահանջում էինք ճանաչել Ղարաբաղի անկախությունը։ Այս մասին լրագրողների հետ զրույցում ասաց ՀՀ նախկին վարչապետ Հրանտ Բագրատյանը։

«2022 թ-ի հոկտեմբերին նա (Նիկոլ Փաշինյանը- խմբ.) ճանաչել էր Ադրբեջանի տարածքային ամբողջականությունը, դրանից հետո Ադրբեջանը փակեց Լաչինի միջանցքը՝ ասելով, որ եթե Ղարաբաղն իմն է՝ ինչու պիտի այստեղ խաղաղապահ լինի, ինչու պիտի միջանցք լինի։ Ըստ էության, ստացվեց, որ դա Ալիևի և Փաշինյանի համագործակցված խաղն էր՝ ընդդեմ ռուսների, նրանց հանելու համար։ Ապրիլին մենք ասում էինք ճանաչի Ղարաբաղը։ Մայիսին նա դրան անդրադարձավ՝ ճանաչելով Ղարաբաղը՝ Ադրբեջանի կազմում։ Ես այն ժամանակ ասում էի, որ պատերազմ է լինելու և Ղարաբաղը դատարկելու են, եղա՞վ այդ պատերազմը։ Եղավ, 4 ամիս հետո»,-ասաց Բագրատյանը։

Անդրադառնալով իր նկատմամբ մեղադրանքի բովանդակությանը՝ նա նշեց, որ մեղադրող դատախազը դատական նիստի ժամանակ հայտնել է, որ իրենց դուր չի եկել «վերացնել» բառը։ «Փորձաքննություն է կատարվելու, լեզվաբաններ ենք ներգրավելու այդ բառի համար։ Օրինակ, Թումանյանը վերացնել բառն օգտագործում էր վսեմացնելու իմաստով։ Այսինքն, այդ բառը բազմիմաստ բառ է։ Ստացվում է, դու կարող եք ասել՝ «ասֆալտ կրծեք», «գրանիտ կրծեք» և այդտեղ բռնություն չկա, և գուցե ճիշտ է՝ բռնություն չկա, որովհետև դա քաղաքական խոսք է, բայց իմ խոսքի մեջ «վերացնել» բառում իրենք բռնության կոչ են տեսնում։ Ինչ մնում է «Ականջ կտրելու», «լեզու կկտրելու» պատգամավորի հայտարարություններին՝ իրենք դրանք առհասարակ չեն տեսել։ Այս ամբողջ դատական պրոցեսը ծաղր է»,- նշել է Բագրատյանը։

Նրա փոխանցմամբ՝ ապրիլին հրավիրված բողոքի ակցիայի ժամանակ ինքն ասել է, որ իշխանությունը պետք է հեռանա։ «Էս մարդը (Նիկոլ Փաշինյանը- խմբ.) եկել է, բոլորին մեղադրում է, ասում ՝ թալանել են, հասկացանք, բայց ինքը 5 տարում ծախսել է 28 մլրդ դոլար և ստացել է ՀՆԱ-ի աճ՝ ընդամենը 4 մլրդ դոլարի, բա 24 մլրդ դոլարն ի՞նչ է եղել։ Մարդ կա, որ 5 տարում դարձել է միլիարդատեր է, 2 մլրդ ունի, ես դրանց անունները չեմ ուզում տալ։ Հաջորդ իշխանությունը, որ գա՝ այս գործերը բացելու է, չէ՞»։

Աղբյուր` Փաստինֆո