Փաստ ինֆո

Գեներալ Գրիգորի Խաչատուրովի կալանավորման ժամկետը երկարացնելու որոշման դեմ բողոքի վերաբերյալ որոշում կայացնելուց խուսանավում են։ Վերաքննիչ հակակոռուպցիոն դատարանը՝ դատավոր Արմեն Հովհաննիսյանի նախագահությամբ, որոշել է բողոքը քննել բանավոր ընթացակարգով։ Այս մասին «Փաստինֆո»-ի հետ զրույցում ասաց Խաչատուրովի պաշտպան Միհրան Պողոսյանը։

Ինչպես արդեն տեղեկացրել ենք՝ Վերաքննիչ հակակոռուպցիոն դատարանը՝ դատավոր Արմեն Հովհաննիսյանի նախագահությամբ, սեպտեմբերի 20-ին կայացրած որոշմամբ արձանագրել էր, որ հոկտեմբերի 15-ից հետո Գրիգորի Խաչատուրովին կալանքի տակ պահելն իրավաչափ չէ, եթե նոր ծանրակշիռ հանգամանքներ ի հայտ չգան, ընդ որում, պաշտպանության կողմի դիտարկմամբ՝ դատարանն արձանագրել էր, որ այդպիսիք չկան։ Վերաքննիչ դատարանի որոշումից հետո, այդուհանդերձ, Հակակոռուպցիոն դատարանը՝ դատավոր Արամ Գրիգորյանի նախագահությամբ, որոշել է կրկին երկարացնել Գրիգորի Խաչատուրովի կալանավորման ժամկետը՝ ևս երկու ամսով։

Դատարանի այս որոշման դեմ վերաքննիչ բողոք է ներկայացվել, որը կրկին մակագրվել է դատավոր Արմեն Հովհաննիսյանին։ Ի սկզբանե, բողոքը պետք է քննվեր գրավոր ընթացակարգով, որոշումը պետք է հրապարակվեր երեկ՝ նոյեմբերի 27-ին, պաշտպանության կողմը հայտարարել էր, որ «նոյեմբերի 27-ին Խաչատուրովը կամ պետք է ազատ արձակվի, կամ ՀՀ-ում դատական համակարգ գոյություն չունի»։

Դատական ակտը, սակայն, երեկ չի հրապարակվել, Վերաքննիչ դատարանը որոշել է բողոքը քննել բանավոր ընթացակարգով և նիստ հրավիրել դեկտեմբերի 1-ին։ Պաշտպան Միհրան Պողոսյանը, սակայն, ձգձգման միտում է տեսնում, հիշեցնում է, որ նախորդ անգամ, երբ բողոքը մակագրվել էր Ա․ Հովհաննիսյանին, դատարանն ի սկզբանե էր որոշել բողոքը քննել բանավոր ընթացակարգով, իսկ այժմ, թեև որևէ տարբերություն չկա, որոշել է նախ բողոքը քննել գրավոր, ապա՝ բանավոր։

«Մեր գնահատմամբ՝ ժամկետ ձգելու գործողություններ են անում։ Այսինքն՝ տարբերակ չկա բաց չթողնելու, դեռևս համաձայնությունները չեն տեսել»,- ասաց փաստաբանը՝ նշելով, որ կանխատեսելի էր, որ «տարբերակ չկա բաց չթողնելու», քննարկվելու է խուսանավելու և հնարավորինս երկար պահելու հնարավորությունները․ «Մեր պատկերացմամբ՝ իրավիճակը հետևյալն է եղել, դատավորը, որտեղից գալիս է հրահանգը, ասել է՝ տարբերակ չկա բաց չթողնելու, ասել են՝ անցի բանավոր ընթացակարգի, տեսնենք՝ ինչ է »։

Պաշտպանության կողմը նաև չի բացառում, որ անօրինական կարգով կարող են նոր «հանգամանքներ» ներկայացվեն, ինչը թույլատրելի չէ, քանի որ այժմ քննարկվում է մեկ ամիս առաջ կալանքի երկարացման որոշման հարցը։

Հիշեցնենք, որ քրեական գործը վերաբերում է հողատարածքի օտարմանը։ Գրիգորի Խաչատուրովի նկատմամբ քրեական հետապնդում է հարուցվել՝ պաշտոնեական դիրքի օգտագործմամբ հանցավոր ճանապարհով ձեռք բերված առանձնապես խոշոր չափերով անշարժ գույքն օրինականացնելու (փողերի լվացում) հատկանիշներով: Նկատենք, որ ըստ դատախազության, գործարքի առարկան չգործող զորամասի տարածքն է, որը պաշտպանության նախարար Սեյրան Օհանյանի պաշտոնավարման տարիներին, իբր, վաճառվել է Գրիգորի Խաչատուրովին, ինչը ձեւակերպվել է երրորդ անձի անվամբ։ Գործով մեղադրյալները 13-ն են, այդ թվում՝ ՊՆ նախկին նախարար Սեյրան Օհանյանը։

Հեղինակ՝ Իզաբել Սահակյան

Աղբյուր` Փաստինֆո