Փաստ ինֆո

Փաստաբան Նարեկ Ալոյանը ֆեյսբուքյան իր էջում ահազանգել է, որ «Զվարթնոց» օդանավակայանում ԱԱԾ-ն թույլ չի տալիս տեսակցել արգելանքի տակ գտնվող իր վստահորդին։

Նա մասնավորապես գրել է.

«Շտապ.
Հաղորդում հանցագործության մասին

Այսօր ժամը 11։20-ի սահմաններում մոտեցել եմ «Զվարթնոց» օդանավակայանի սահմանապահ ծառայողներին, նրանց կողմից դեռևս ժամը 04։40-ին արգելանքի վերցված Ս.Լ.-ին փաստաբանական օգնություն տրամադրելու նպատակով։

Նկատի ունենալով, որ իմ մուտքը կամ հաղորդակցումը Ս. Լ.-ի հետ չի թույլատրվում, դեպքի մասին իմ 044-44-44-08 հեռախոսահամարից հետևյալ ժամերին ահազանգել եմ հետևյալ կառույցներին.

ՄԻՊ (116) - 11:33, 12:00, 12:25,

ԱԱԾ Սահմանապահ զորքերի թեժ գիծ (015-20-20-20) - 12:03,

ԱԱԾ թեժ գիծ (191) - 12:45։

Արդյունքում, ԱԱԾ-ի կողմից իմ մուտքը վստահորդիս մոտ դեռևս չի թույլատրվել։

Կարծում եմ, որ նշված արարքը պարունակում է ՀՀ քրեական օրենսգրքի 491-րդ հոդվածով նախատեսված հանցագործության առերևույթ հատկանիշներ (փաստաբանի լիազորությունների իրականացումը խոչընդոտելը), ուստի տալիս եմ սույն հաղորդումը հանցագործության մասին»։

Ավելի ուշ նա նաև հայտնել է, որ գտնվելով ՀՀ ԱԱԾ անցագրային բյուրոյում, փորձում է կապ հաստատել ՀՀ ԱԱԾ թեժ գծի հետ, սակայն չի ստացվում։

«Մեղմ ասած մտահոգիչ է...»։

Աղբյուր` Փաստինֆո