Փաստ ինֆո

Երևանի ընդհանուր իրավասության քրեական դատարանում՝ դատավոր Մանվել Շահվերդյանի նախագահությամբ, այսօր կայացել է ՀՀ նախկին վարչապետ Հրանտ Բագրատյանի գործով դատական նիստը։ Դատարանն այսօր անցավ հիմնական դատալսումների փուլին։ Հանրային մեղադրող Հայկ Ավետյանը հրապարակեց մեղադրական եզրակացությունը։ Պաշտպան Հովհաննես Քոչարյանը հայտարարեց, որ մեղադրական եզրակացության մեջ տեղ չեն գտել Եվրոպական կոնվենցիայի 3 ստանդարտները։

«Միայն այս իրողությունը բավարար է քննվող գործով արձանագրելու պետական միջամտության ոչ իրավաչափությունը»,- նշեց Հովհաննես Քոչարյանը՝ ներկայացնելով նաև ՄԻԵԴ նախադեպային որոշումները։ Անդրադառնալով մեղադրանքին՝ Հովհաննես Քոչարյանը նշեց, որ մեղադրական եզրակացության մեջ բառ անգամ չեն գտնի, թե ինչ բռնություն իրագործելու իրական վտանգ է տեսել մեղադրողը, ինչու մեղադրանքի կողմը չի գրել` ո՞րն է Բագրատյանի ասած բռնություն կիրառելու եղանակը. սա ամենակարևոր բանն է, ո՞ր փաստական հանգամանքներն են հիմքեր տվել պնդելու, որ Հրանտ Բագրատյանի խոսքն անվերապահորեն հանցանք պարունակող կոչ է հանդիսացել՝ ուղղված հավաքի մասնակիցներին։ Բացի այդ, մեղադրանքի կողմը չի նշել, թե որ ապացույցներն են անաչառ դիտորդին համոզում, որ հայտարարությունից հետո առկա է եղել բռնություն իրագործելու իրական վտանգ, ինչից ելնելով է մեղադրանքի կողմը եզրակացրել, որ հավաքի մասնակիցները Բագրատյանի համախոհներն են։

«Այս հարցերի պատասխանները մեղադրական եզրակացությունում չեք տեսնի, բայց մենք պետք է կռահենք։ Մեղադրանքը ոչ մի աղերս չունի Վճռաբեկ դատարանի որոշ իրավական դիրքորոշումների հետ»,- նշեց փաստաբանը՝ արձանագրելով, որ սկզբունքներից շեղումը հանգեցնում է արդար դատաքննության սկզբունքի արժեքի առարկայազրկմանը։ Պաշտպանության կողմը ուշադրություն հրավիրեց մեղադրանքի անորոշությանը, նկատեց՝ փաստական անորոշությունը սպառնալիք է ստեղծում մարցակցային սկզբունքով դատաքննություն իրականացնելու համար, որովհետև դատավարության ընթացքում ստիպված են լինելու հերքել ոչ թե փաստեր, այլ՝ անհեթեթ մեղադրական բնույթի գնահատականներ:

Հաջորդիվ, դատարանում հրապարակվեց գործում առկա ապացույցները։ Մեղադրանքի կողմը հրապարակեց լազերային սկավառակի տեսագրության արձանագրությունը։

«Սկավառակում առկա է 2 ժամ 16 րոպե 35 վայրկյան տևողությամբ տեսաձայնագրություն, որի զննությամբ պարզվել է, որ հեռարձակումը սկսվում է ՀՀ ԱԺ դիմացի հատվածից, որտեղ հավաքված է ամբոխ, իսկ ԱԺ դիմաց կազմված է ոստիկանների կենդանի պատ։ Մայթեզրին առկա է բեռնատար ավտոմեքենա՝հարթակով, որի վրա կախված է «Միասին » հասարակական շարժում գրառմամբ պաստառ, հավաքված անձանց ձեռքին առկա է «Մաքրենք հայրենիքը աղբից», «Հայրենիքը վտանգված է» գրառումներով թղթեր։ 14-րդ րոպեին ավտոքարշակի հարթակ են բարձրանում երեք տղամարդիկ, որոնցից կաշվե պիջակով և շագանակագույն վերնազգեստով տղամարդը ժամը 52,20-ին բեմ է հրավիրում Վոլոդյա Հովհաննիսյանին։ 59-րդ րոպե 11-րդ վայրկյանից սկսած Վոլոդյա Հովհաննիսյանը հայտարարում է՝ «Սիրելի ժողովուրդ, ունենք փրկության երկու տարբերակ, առաջինը՝ միավորվել, երկրորդը՝ պետք է այս քաղաքից գլխիվայր կախվեն բոլոր նիկոլական թուրքերը»։ Տեսաձայնագրության 1 ժամ 29 րոպե 57 վայրկյանին հարթակ է բարձրանում Հրանտ Բագրատյանը» ,- ասաց դատախազ Ավետյանը, ինչին արձագանքելով պաշտպան Հովհաննես Քոչարյանը դատարանի ուշադրության հրավիրեց այն հանգամանքին, որ դատախազն իր խոսքում օգտագործում է «ամբոխ» արտահայտությունը։

Մեղադրանքի կողմի ներկայացրած ապացույց սկավառակը և բոլոր այն ապացույցները, որոնք պետք է հրապարակվեն մեղադրողի կողմից, ըստ պաշտպանության կողմի, հիմնավորում են Հրանտ Բագրատյանի անմեղությունը։

«Եթե, օրինակ, ես որոշեի պարոն Բագրատյանին արդարացնող ապացույցները բերեի դատարան, կբերեի նույն լազերային սկավառակը, որը ներկայացրել է դատախազը »,- նշել է Քոչարյանը։

Հաջորդիվ՝ դատարանում կհարցաքննվեն վկաները։ Դատական հաջորդ նիստը նշանակվել է 2024թ․ հունվարին։

Հրանտ Բագրատյանին, հիշեցնենք, մեղադրում են բռնության կոչեր անելու մեջ, որոնք, ըստ իրավապահների, արվել են ապրիլի 4-ին՝ ԱԺ մոտ «Միասին» շարժման հրավիրած հանրահավաքում ունեցած ելույթի ժամանակ։ Ելույթում Բագրատյանը նշել էր ․ ««Այդ ընթացքում իրենք բաժանել են 200 մլրդ դրամի կամ 500 մլն դոլարի պրեմիա: Ծախսել է 28 մլրդ, արա, 28 մլրդ-ն ի՞նչ ես արել, 1 մլրդ-ը չէի՞ր կարող դնել բանակի վրա… 5 տարում մահանում է 36 հազար մարդ, այդ թվերի մեջ մտած չեն Covid-ն ու զոհվածները: Չենք ծննդաբերում: Եթե 2017-ին ունեցել ենք 18 հազար իրավական հանցագործություն, անցյալ տարի ունեցել ենք 37 հազար: Ինչի՞ եք կոտորվում: Եթե 2017-ին կյանքի միջին տևողությունը Հայաստանում եղել է 76 տարի, իր օրոք 5 տարում դառել է 72 տարի: Արա, ինչի՞ եք մեռնում, վերացրեք էդ մարդուն, վերջացրեք, արա՛: Վերացրե՛ք այդ իշխանությունը ձեր ուժով, թափով: Այս ի՞նչ ինքնասպանություն է, որ ազգը գնում է»։

Քրեական հետապնդումը Բագրատյանն ինքը շինծու է համարում։

Հեղինակ՝ Իզաբել Սահակյան

Աղբյուր` Փաստինֆո