Փաստ ինֆո

Երևանի ընդհանուր իրավասության քաղաքացիական դատարանում՝ դատավոր Դանիել Մխեյանի նախագահությամբ, այսօր կայացել է «Քաղաքացիական պայմանագիր» կուսակցությունն ընդդեմ «Իրազեկ քաղաքացիների միավորում» ՀԿ գործով դատական նիստը։

Հիշեցնենք, որ գոստոսին «Քաղաքացիական պայմանագիր» կուսակցությունը հայցադիմում է ներկայացրել «Իրազեկ քաղաքացիների միավորման» դեմ՝ զրպարտչական համարելով «Անհայտ ծագման հազարավոր դոլարներ՝ Ավինյանի հակառակորդներին «սևացնելու» համար․ ինչպես են ՔՊ-ական կեղծ էջերն աշխատում Ֆեյսբուքում» նյութը: «ՔՊ»-ի միջնորդության հիման վրա դատարանը որոշել էր նաև հայցի ապահովման միջոց կիրառել՝ կալանք դնելով ՀԿ-ի հաշիվների վրա։

Այսօրվա դատական նիստի ընթացքում ՀԿ ներկայացուցիչները միջնորդեցին վերացնել հայցի ապահովման միջոց կիրառելու մասին դատարանի որոշումը՝ արձանագրելով, որ նման որոշում է կայացվել՝ առանց պատասխանողի դիրքորոշումը լսելու։ Պատասխանողի ներկայացուցիչը նշեց, որ պատասխանողն ունի բավարար դրամական միջոցներ և հայցի բավարարման դեպքում վճռով սահմանված գումարը, թեև դժվարությամբ, բայց կկարողանան վճարել, ինչպես նաև, գումարը թաքցնելու խնդիր չի կարող լինել, քանի որ ՀԿ է և այդ դեպքում խնդիրներ կունենան նաև դոնորների հետ։ Պատասխանողի հաշիվներին դրված կալանքը նաև խոչընդոտում է կազմակերպության աշխատանքներին, քանի որ դոլարի կուրսը մշտապես տատանվում է։ Բացի այդ, պատասխանող կողմն արձանագրում է նաև, որ հայցվոր կողմն անմիջապես դիմել է դատարան՝ առանց օգտվելու արտադատական կարգով հերքում պահանջելու իրավունքից, ինչը, ըստ պատասխանողի, քաղաքական հետապնդում է։ Հայցվոր կողմի ներկայացուցիչը նշեց, որ ոչ մի քաղաքական հետապնդում չկա, ըստ այդմ, ոչ միայն չեն առարկում, այլև՝ ևս միջնորդում են վերացնել հայցի ապահովման միջոցը։ Դատարանը որոշեց բավարարել միջնորդությունը՝ վերացնելով «ԻՔՄ» հաշիվների վրա դրված արգելանքը։

Հեղինակ՝ Իզաբել Սահակյան

Աղբյուր` Փաստինֆո