Փաստ ինֆո

Տարօրինակ է այն աղմուկը, որը բարձրացել է էդգար Ղազարյանին չհրավիրելու հետ կապված, որովհետև մինչ լսումները նրան բացատրել ենք իրավիճակը և ասել, որ ստիպված ենք հրավիրյալների ցանկը կրճատել։ Այս մասին «Փաստինֆոյի» հետ զրույցում ասաց «Հայաստան» խմբակցության պատգամավոր Գեղամ Մանուկյանն՝ անդրադառնալով հանրային, քաղաքական գործիչ Էդգար Ղազարյանի հայտարարությանը, թե «Հայաստան» խմբակցությունը արգելափակել է իր մասնակցությունը ՀՀ ԱԺ-ում կազմակերպած «Հայաքվե» նախաձեռնության խորհրդարանական լսումներին։

«Շուրջ տարբեր շրջանակներ շուրջ 200 անուն էին ներկայացրել, ստիպված ենք եղել սահմանափակել անվանացանկը՝ դահլիճ մուտք գործելու սահմանափակումների պատճառով։ Այդ թվում՝ նույն «Պատիվ ունեմ» խմբակցության մեր գործընկերներին ենք խնդրել, որ իրենց ներկայացրած ցանկը սահմանափակեն, նույնը Դաշնակցությունից, այսինքն, ցանկից շուրջ 50 անուն ստիպված ենք եղել զեղչել, որոնց մեջ նաև Էդգար Ղազարյանինը։ Ընդ որում՝ Ղազարյանը նախապես էլ տեղյակ է եղել, որ ցանկը ստիպված էինք սահմանափակել։ Գիտեք, նախկինում, երբ «Հայաստան» դաշինքը Էդգար Ղազարյանին հրավիրել է լսումների՝ նա հատուկ գրառմամբ հրապարակային շնորհակալություն չի հայտնել, լսումներին մասնակցելու հնարավորության համար»։

Դիտարկմանը, թե Ղազարյանը հիմնավոր չի համարել տեղերի սահմանափակ լինելու պատճառաբանությունը, քանի որ լսումների օրը դահլիճում բազմաթիվ ազատ տեղեր են եղել՝ Մանուկյանը պատասխանեց. «Դա էլ Ղազարյանի խնդիրն է, որ նա չի տարբերում դատարկ աթոռը և հրավիրյալների մեծ ցանկը։ Օրինակ, քիչ առաջ Հայկ Նահապետյանին եմ հանդիպել, նա ասաց, որ այդ օրը հիվանդության պատճառով չէր եկել, թեև եղել է հրավիրյալ, եղել են նաև մարդիկ, ովքեր որոշ ժամանակ մասնակցել են լսումներին, ապա գնացել են»։

Աղբյուր` Փաստինֆո