Փաստ ինֆո

Երեկվա ասուլիսը փորձ էր վերակենդանացնելու, այսպես ասած, «ժողովրդական վարչապետի» կերպարը։Դեռևս նախորդ օրը նա խոսում էր չագուչի, արդարության մասին , փորձում վերադառնալ այն կերպարին, թե ինչքան հասարակ վարչապետ է, որը սովորական քաղաքացիների հետ երկխոսության մեջ է, նրանց լսում է։ Կարծում եմ, սա էր ասուլիսի մեխը, ամեն դեպքում՝ երեկվա չստացված բեմականացումը սրա համար էր։ Այս մասին «Փաստինֆոյի» հետ զրույցում ասաց քաղաքագետ Սուրեն Սուրենյանցն՝ անդրադառնալով նախօրեին Նիկոլ Փաշինյանի շուջ 8 ժամ եթերում քաղաքացիների հարցերին պատասխանելուն։

Կարևոր է նաև հասկանալ, թե ինչի էր Նիկոլ Փաշինյանը սա անում,- նկատել է գործիչն ու ավելացրել, որ, ամենայն հավանականությամբ, ինչ-որ քաղաքական փոփոխություններ է նախապատրաստում։ «Կարծում եմ՝ նա փորձում է փոխել քաղաքական համակարգը։ Անգամ չեմ բացառում, որ մյուս տարի արտահերթ ընտրությունների կգնա»,- ասել է քաղաքագետը։
Արձանագրենք, որ այս ձեւաչափով քաղաքացիների հարցերին պատասխանելու ավանդույթ ունի ՌԴ նախագահ Վլադիմիր Պուտինը։ Սուրենյանցը նաև նշեց, որ չնայած հայ-ռուսական հարաբերություններում ակնհայտ ճգնաժամին՝ Փաշինյանը կապկում էր ՌԴ նախագահին։

«Փաշինյանի ու նրա թիմի ֆանտազիան, կրեատիվ պոտենցիալը շատ քիչ է, դրա համար նրանք ընտրում են այն մոդելները, որոնք իրենց հասու են։ Այո, իրենք կապկում են այն տեխնոլոգիաները, որոնք սովորաբար կիրառել է Պուտինը, բայց երեկվա միջոցառումը շատ անհաջող էր, քանի որ տեսանք նաև ծանոթ մարդիկ, ովքեր իրենց հարցերն էին ուղղել։ Նրանք ամենևին էլ շարքային քաղաքացիներ չէին, գոնե մի քանիսին ճանաչում էինք, մենք տեսանք նաև գրված տեքստից ընթերցանություն և, վեջապես, այդ կարգի բաները շատ ավելի գրագետ է պետք կազմակերպել, բայց դե իր թիմի պոտենցիալը դա է՝ կապկում են այն, ինչ ու ինչպես կարող են, ի վերջո, եթե քննադատում է Պուտինին՝ դա դեռ չի նշանակում, որ չի փորձում Պուտին դառնալ»,- ասել է Սուրենյանցը։

Անդրադառնալով հարցերի ընտրությանը՝ նա նշեց, որ դրանց ընտրության մեջ որևէ կոնցեպցիա չկար։ «Իրենք, իհարկե, անհրաժեշտ հարցեր առանձնացրել էին, բայց որևէ կոնցեպցիա չկար։

Ավելին, այդ հարցաշարը միանգամայն ոչ ադեկվատ էր այն հարցերի հետ, որոնք մեր հասարակությունն ունի, օրինակ, աղքատությանը վերաբերող հարցերը քիչ էին, մինչդեռ բնակչութան 1/3-ը աղքատության շեմից ցածր է, կամ օրինակ արդարության բացակայությունը միայն նախկիններին չէր վերաբերում։ Մեր հասարակությունը տեսնում է, որ գործող իշխանավորները շատ արագ հարստանում են։ Կամ՝ արտաքին քաղաքականության ձախողումների մասին թեև մեր հասարակությունը խոսում է, բայց դրանք արտացոլված չէին այդ հարցաշարում։

Եւ վերջապես, մի քիչ անբնական է հնչում, երբ Գերմանիայից ու արտերկրի այլ տաք տեղերում նստած մարդիկ արդարության մասին Փաշինյանին հարցեր են տալիս, կարելի էր մի քիչ քթածակ ունենալ և այդ հարցերը Հայաստանից ձևակերպել»,- նկատել է մեր զրուցակիցը։

Աղբյուր` Փաստինֆո