Փաստ ինֆո

Անցած հինգուկես տարիները փաստում են՝ 2018-ի այսպես կոչված՝ հեղափոխությունը, իրականում՝ կոռուպցիայի դեմ պայքարը դրոշ դարձրած՝ գունավոր իշխանազավթումը ոչ միայն կոռուպցիան չվերացրեց Հայաստանում, այլև աճեցրեց նոր կոռուպցիոներներ և կոռուպցիայի նոր դրսևորումներ։

Նախօրեին, կառավարության նիստի շրջանակում անդրադառնալով կոռուպցիայի կանխարգելմանն ու դրա դեմ պայքարին, Փաշինյանն անդրադարձավ կոռուպցիոն գործերի՝ տևական ձգձգվող արդյունքներին։ Ըստ էության, Փաշինյանն իր դժգոհությունն էր հայտնում իրավապահ համակարգից, որ ոչ մի ցնցող կոռուպցիոն գործով չեն կարողանում գոհացնել իրեն և ՀՀ քաղաքացիներին։ Իսկ վերջիններս սպասում են։

Բնականաբար, մարդիկ դեռ հիշում են այն գաղտնազերծված հեռախոսազրույցները, երբ Փաշինյանը իրավապահներին հրահանգավորում էր, թե՝ ինչ պիտի անեն, իսկ վերջիններս էլ ձեռքները ծալած նստում էին՝ սպասելով նրա հրահանգին։ Բայց արդեն նա կառավարության նիստում է ելույթ ունենում ու կալանքի հրահանգ տալիս։
Այսինքն, մտածել, թե այս բնագծում ինքնուրույն կադրեր են հայտնվել, մեղմ ասած՝ սուտ կլինի։ Իհարկե, դատական համակարգում բացառիկություններ լինում են, բայց․․․արդեն շատ բացառիկ են նրանք։

Իսկ իրավապահների՝ միմյանց ուղղությամբ բոչկա գլորելու փաստերին նախօրեին կառավարության նիստում արդեն իսկ ականատես եղանք։ Մեկը մյուսից առաջ ընկնելով իրավապահները զեկուցում էին, թե ինչքան մարդ են կալանավորել, փակի տակ դրել։
Իհարկե, ամեն ինչ սկսվեց հենց գլխավոր շոումենից, որի «դժգոհությունները» փարատելու համար դատախազից, հակակոռուպցիոն կոմիտեի ղեկավարից սկսած՝ դերի մեջ մտած՝ սկսեցին իրենց ղեկավարած համակարգերի պատժիչ «գործունեությունը» ներկայացնել։
Կառավարության նիստ կոչվածն ինքնին շոու է, նախապես դերաբաժանում կատարված։ Դատախազն, օրինակ, պիտի շատ մանրակրկիտ ներկայացներ ԱՕԿՍ-ի գործի հանգամանքները՝ այն տեղավորելով «եթե՝ապա տիրույթ», հակակոռուպցիոն կոմիտեի նախագահն էլ պիտի դժգոհեր դատարան ուղարկված քր․ գործերից, որոնք կարող էին կոռուպցիայի դեմ պայքարի դասական օրինակներ լինել, եթե․․․ գործով անցնող բոլոր մեղադրյալները․․․ կալանքի տակ գտնվեին։ Այսինքն, հակակոռուպցիոնի ղեկավարը «գլորեց» ԲԴԽ նախագահի բոստանը․․․

Վերջինիս «օգնության» հասավ ոլորտի պատասխանատուն, բայց թե որքանով օգնեց, դժվար է ասել․․․
Իսկ այս դեպքում, հակակոռուպցիոն կոմիտեի ղեկավարի խոսքը Հակակոռուպցիոն դատարանում քննվող «Զինվորական համազգեստների» վերաբերյալ քրեական գործի մասին էր, որում ներգրավված են եղել չորս մեղադրյալներ: Նրանցից երկուսի նկատմամբ որպես խափանման միջոց կիրառված է եղել կալանքը, մեկի նկատմամբ՝ տնային կալանքը և գրավը, իսկ վերջինի նկատմամբ՝ բացակայելու արգելքը: Բայց «կալանք»-ը որպես արդարադատության հիմնական միջոց դիտարկող Փաշինյանի պահանջը այս խափանման միջոցի համատարած դարձնելն է։

Որևէ մեկը կհավատա՞, որ սա շոու չէ, մանավանդ, մինչ կառավարության նիստը բոլոր հարցերը նախապես ներկայացված, մշակված և պատասխանված է լինում։

Շոուն՝ շոու, բայց փաստը մնում է փաստ, որ նախկին՝ կոռուպցիոն համակարգի դեմ սուր ճոճողը ինքն է այսօր կոռուպցիայի դեմ անզոր խճճվել՝ իր իսկ հյուսած սարդոստայնի մեջ։ Հակակոռուպցիոն- ԲԴԽ փոխհրաձգությունը նիստի հաջորդ օրն էլ շարունակվեց և դեռ շարունակվելու է։ Եվ որքան էլ ամեն մեկն իր հերթին ջանա և կաշվից դուրս գա, Փաշինյանն էլ շոուներ բեմադրի, մեկ է՝ կոռուպցիան կա և շարունակվում է հենց քպական շրջանակներում, ընդ որում, բավական ցայտուն։ Այնքան ցայտուն, որ միջազգային ատյաններն են նաև արձանագրում։ Այսինքն, կոռուպցիայի դեմ պայքարի դրոշակակիրը տապալել է նաև իր միակ ֆիշկան՝ կոռուպցիայի դեմ պայքարը։

Աղբյուր` Փաստինֆո