Փաստ ինֆո

Այս պահի դրությամբ դեռ ակնհայտ և պարզ չէ, ի վերջո, Ադրբեջանը համաձայն է երեք սկզբունքների շուրջ խաղաղության պայմանագրր կնքել Հայաստանի հետ, թե ոչ։ Ընդ որում, երեք սկզբունքները համաձայնեցված են բանակցությունների ընթացքում և այդ համաձայնեցումն արտահայտվել է մայիսի 14-ին և հուլիսի 15-ին եռակողմ հանդիպումների արդյունքներում։ Այս մասին ուղիղ եթերում քաղաքացիների հարցերին պատասխանելով հայտարարել է ՀՀ վարչապետ Նիկոլ Փաշինյանը։

Փաշինյանը հիշեցրեց, որ սկզբունքներից առաջինն այն է, որ Հայաստանն ու Ադրբեջանը ճանաչում են միմյանց տարածքային ամբողջականությունը, այն ըմբռնմամբ, որ Հայաստանի տարածքը 29 800 քկմ է, Ադրբեջանինը՝ 86 600 քկմ:Երկրորդ սկզբունքը՝ դելիմիտացիայի հիմքը Ալմաթիի հռչակագիրն է:

«Հենց այդ հռչակագիրն է հիմնավորումը, թե ինչու ենք ասում, որ Հայաստանի տիտղոսային տարածքը 29 800 քկմ է: Որովհետև ՀՀ-ն ձևավորվել է Հայկական ԽՍՀ տարածքով: Ձեռք է բերվել ըմբռնում, որ Հայաստանի և Ադրբեջանի սահմանների դելիմիտացիայի համար պետք է օգտագործվեն 1974-1990 թվականի ԽՍՀՄ ԶՈՒ գլխավոր շտաբի քարտեզները: Այս նրբությունները ճշգրտելու անհրաժեշտություն ունեն»,- նշեց նա՝ հավելելով, որ երրորդ սկզբունքն է, որ երկու երկրների կոմունիկացիաները պետք է բացվեն երկրների իրավազորության, սուվերենության հարգմամբ՝ փոխադարձության և հավասարության սկզբունքի հիման վրա:

«Չենք կարող վստահաբար պնդել, որ Ադրբեջանը հրաժարվում է այդ երեք սկզբունքների հիման վրա խաղաղության պայմանագիր կնքել, բայց նաև չենք կարող վստահ ասել, որ Ադրբեջանը վերահաստատում է իր հավատարմությունն այդ սկզբունքներին», - ասաց Փաշինյանը։

Նրա խոսքով՝ անհրաժեշտություն կա բանակցությունների ընթացքում այս հարցերը պարզաբանել։
«Առաջիկայում քարտեզների ու սահմանների մասով նախատեսված է հանդիպում՝ նոյեմբերի 30-ին, այդ քննարկումներց մենք հետևություններ կանենք, եթե այլ բանակցություններ լինեն, այդ բանակցություններից էլ հետևություն կանենք, թե արդյո՞ք Ադրբեջանը պատրաստ է այդ սկզբունքների հիման վրա գնալ խաղաղության, թե՞ հրաժարվում է սկզբունքներից։ Փաստն այն է, որ մենք մինչ այս պահը նման վստահություն չունենք: Չնայած Ադրբեջանի կողմից հնչել է հայտարարություն, որ Ադրբեջանը ճանաչում է ՀՀ տարածքային ամբողջականությունը: Բայց այստեղ կոնկրետություններ են պետք, թե ինչ նկատի ունեն իրենք ՀՀ տրածքային ամբողջականություն ասելով», - հայտարարեց Նիկոլ Փաշինյանը՝ հավելելով, որ այս հարցերի պարզաբանումը առաջիկա բանակցային գործընթացների հիմնական խնդիրն է, որը պետք է փորձենք լուծել։

Աղբյուր` Փաստինֆո