Փաստ ինֆո

ՀՀ կառավարությունը բազմամիլիարդանոց ծրագրեր է իրականացնում ամբողջ հանրապետությունում, մասնավորապես՝ Սյունիք մարզում։ Վերջին 5 տարիներին մենք ամենամեծ ներդրումներն արել ենք Սյունիքի մարզում, խոսքը 100 մլրդ դրամից ավելի ներդրումների մասին է։
Այսօր նման հայտարարությամբ է հանդես եկել վարչապետ Նիկոլ Փաշինյանը՝ ուղիղ եթերում պատասխանելով Մեղրիի ու Սյունիքի անվտանգությանը վերաբերող քաղաքացու հարցին։

«Մասնավորապես, Մեղրիում վերակառուցվում է Հայաստան-Իրան սահմանին գտնվող մաքսակետը, շուտով կսկսվի Հյուսիս- Հարավ մայրուղու Ագարակ-Քաջարան ճանապարհահատվածի կառուցումը, նաև գիտեք, որ ԵՄ-ն ներդրումների և տնտեսական պլանի շրջանակներում խոշոր հատկացումներ է արել Սյունիքի մարզի դիմակայունությունը բարձրացնելու համար։

Կապանում արդեն գործարկված օդանավակայանն, իհարկե պարբերականության և տեխնիկական հագեցվածության որոշակի խնդիրներ ունի, որովհետև երբեմն չեղարկվում են թռիչքները վատ եղանակի պատճառով։
Այս ամենով հստակ քաղաքական ուղերձ ենք հղում, որ մենք Սյունիքի հետ կապված մեր պլանները կապում ենք ռազմավարական զարգացման, տնտեսական ակտիվության հետ։

Մենք հիմա իրականացնում ենք նաև այսպես կոչված 15 միլիոնի ծրագիրը, որը նաև հավասարապես վերաբերում է Սյունիքին, այդ գումարը մենք տալիս ենք, որպեսզի մարդիկ իրենց համար տներ կառուցեն։

Ես չեմ ընդունում, անգամ երբ Սյունիքը կամ Մեղրին Հայաստանից որևէ կերպ տարանջատում են։ Ես երբեմն միտում եմ տսնում, որ Սյունիքը որպես անվտանգային խոցելի գոտի առանձնացվում է, ոչ մենք չենք առանձնացնում»։

Փաշինյանը նաև ընդգծեց, որ Սյունիքի մարզի զարգացումը և անվտանգությունը իրենց ամենօրյա աշխատանքի մեջ է և բոլոր այն խնդիրները, որ կան Սյունիքում կան և Տավուշում,, և Արարատում, և Վայոց Ձորում։ «Այդ անվտանգային խնդիրնեը կան, ակնհայտ են, բայց դրանք ոչ պետք է թերագնահատենք, ոչ էլ գերագնահատենք, այդ անվտանգային խնդիրները լուծելու համար էլ խաղաղության օրակարգն ենք որդեգրում»։

Աղբյուր` Փաստինֆո