Փաստ ինֆո

Գործերը, հա, ուղարկում են դատարան, հետո 20 տարի կքննեն, էդ մարդիկ էլ ամառը արձակուրդ կգնան, կազինոյի սեզոնին՝ կազինո կգնան,․ ձմեռը՝ հարավ կգնան, ամռանը՝ հյուսիս, բայց մարդկանց մոտ անհասկացողություն կառաջանա։ Վիճակագրությունը պետք է փոխենք, շատ լավ՝ ուղարկել ենք դատարան, ուղարկել ենք, պետք է իմանանք քանիսն է մեղադրական դատավճիռով պսակվել, քանիսը՝ արդարացման։ Այստեղից պետք է արդյունք ունենանք։ Այս մասին հայտարարեց Նիկոլ Փաշինյանը՝ դժգոհություն հայտնելով։

Մասնավորապես, ՔԿ նախագահ Արգիշտի Քյարամյանը կառավարության նիստում հայտարարեց, որ ՔԿ-ում ընդհանրապես պատճառված վնասի վերականգնումը համարվում է առաջնայնություն, կապ չունի՝ վնասը պատճառվել է պետությանը, համայնքին, քաղաքացուն, թե իրավաբանական անձին։ Քյարամյանը նշեց, որ այս առումով ընթացիկ տարվա 10-ն ամիսների ընթացքում բավականին լավ ցուցանիշ ունեն, ապահովել են պատճառված վնասի՝ 33,5 մլրդի հատուցում, ընդ որում, թվի՝ 98 տոկոսը վերաբերում է պետությանը պատճառված վնասին։ Քյարամյանը նաև ընդգծեց, որ հիմնականում սա արդեն իսկ պետության բյուջե վճարված թիվ է։ Նախորդ տարվա համեմատ այս տարի 72 տոկոսով ավելի գործեր են ուղարկվել դատարան, ինչը, ՔԿ նախագահի դիտարկմամբ, ևս աննախադեպ ցուցանիշ է։

Նիկոլ Փաշինյանը, սակայն, դժգոհեց՝ նշելով․ «Չպետք է ասել, թե ինչքան գործ ենք ուղարկել դատարան, ուղարկել ենք՝ գնացել է, գնացել է կորցրել ենք, ինչ եղավ այդ գործը։ Պետք է վիճակագրություն վարենք, թե քանի դատավճիռ է կայացվել՝ քանիսը մեղադրական, քանիսը՝ արդարացման, այստղից պետք է հետևություն անենք ՝մենք աշխատան անում ենք, թե ոչ։ Թե չէ՝ հա, գործը գնացել է դատարան, հեսա 20 տարի կքննեն, կպարզվի՝ վաղեմության ժամկետն անցել է, մի հատ էլ մեղադրական դատավճիռ կկայացնեն, որը դե յուրե շատ բան է նշանակում, դե ֆակտո՝ ոչինչ չի նշանակում»։ Փաշինյանը «հիշեց» նաև անմեղության կանխավարկածը։ ՀՀ գլխավոր դատախազ Աննա Վարդապետյանն էլ արձագանքեց՝ նշելով, որ դիտարկումները թիրախային են և տեղին։ Վարդապետյանը նշեց, որ ավարտված գործերի քանակն են ընդունում, ոչ թե՝ ուղարկված, հասարակության շրջանում ուշացած արդարադատությունն անհամեմատելի անարդարություն է։ Վարդապետյանը նշեց, թե խնդիրը դատարաններում ձգձգվող նիստերն են, պետք է նեղացնել և առավելագույնը 10-ը օրը մեկ նիստեր հրավիրել, որ վերդիկտներ լինեն։

Փաշինյանն էլ անդրադարձավ կալանավորումներին, նշեց՝ իմանում են, որ կալանավորվել է, հետո՝ ազատ է արձակվել և պետք է իմանան, թե ինչու է ազատ արձակվել՝ նախաքննության փուլում անհրաժեշտություն չկա, որ կալանքի տակ լինի, թե մեղադրանքը հիմնավորող փաստերը բավարար չեն եղել։

«Երբեմն տպավորություն է՝ մեկը զանգել, ասել է էդ մարդուն կալանքից բաց թողել և բաց են թողել»,- հայտարարեց Փաշինյանը՝ դժգոհություն հայտնելով հատկապես հակակոռուպցիոն գործերի քննությունից։

Աղբյուր` Փաստինֆո