Փաստ ինֆո

Վարչական դատարանում այսօր կայացել է Մուրադ Փափազյանին անցանկալի անձանց ցուցակում ներառելու մասին ԱԱԾ որոշումը վիճարկելու հարցով գործի քննությունը՝ դռնփակ ռեժիմով։ Նշենք, որ նախկինում գործը քննվում էր դռնբաց ռեժիմով՝ դատավոր Մհեր Պետրոսյանի նախագահությամբ, սակայն ինչպես պարզվեց՝ դատական կազմի փոփոխություն է եղել, քանի որ գործը պարունակում է հույժ գաղտնի պարունակող տեղեկություններ։ Դատավորները հավասարաչափ հասանելություն չունեն հույժ գաղտնի տեղեկություններին, ըստ այդմ, գործը վերամակագրվել է դատավոր Ռուզաննա Ազրոյանին։

«Բնականաբար հարցադրում ենք դրել, թե ինչու է դատական կազմը փոխվել, վկայակոչվեցին հիմքեր, որոնք մեզ համար ընդունելի չեն։ Ես հիմա չեմ կարող բարձրաձայնել, քանի որ դա էլ է համարվում պետական գաղտնիք, բայց մեզ համար ընկալելի չէր, մյուս կողմից էլ՝ չունեինք հիմքեր դատավորին բացարկ հայտնելու հետ կապված։ Ստացվում է այնպես, որ միայն դատավոր Ազրոյանն ունի ԱԱԾ կողմից վկայակոչված գաղտնիության համապատասխան աստիճանի թույլտվություն, որ կարողանա ծանոթանալ նյութերին, թեև դրանք դեռևս ներկայացված չեն»,- նշեց Արծվիկ Մինասյանը՝ ընդգծելով, որ ԱԱԾ-ն չունի որևէ հիմք՝ Մուրադ Փափազյանին, Սյունե Աբրահամյանին, Մասիս Աբրահամյանին և մյուսների մուտքը ՀՀ արգելելու վերաբերյալ, սա բացարձակապես քաղաքական հաշվեհարդար է Մինասյանը վստահ է՝ դատավարությունն էլ է բացահայտելու, եթե ոչ այս ատյանում, ապա՝ միջազգային ատյանում։

«Վաղ, թե ուշ՝ բացահայտվելու է, հուսամ՝ այստեղ կբացահայտվի, որովհետև այլ բան է, երբ քաղաքական հանձնարարությունը տալիս է կոնկրետ մարմինների անձանց, ինչ-որ հակաօրինական գործողություն է ձեռնարկվում, այլ բան է, որ հետո պետք է հիմնավորես։ Մուրադ Փափազյանի, Ասլան Ասլանյանի, Նժդեհ Կարակովորյանի, Սյունե, Մասիս Աբրահամյանների դեպքերով, որով արդեն ունենք գործերը, ակնհայտ է դառնում, որ սա նրանց ազգանպաստ գործունեության վերաբերյալ ՀՀ գործող իշխանությունների վարքագիծն է, այսինքն՝ պատժել բոլոր ազգային դաշտում գործող անձանց»,- արձանագրեց Մինասյանը՝ հավելելով, որ ոչ մեկին չի ներկայացվել պատճառաբանություն, հիմք, թե ինչու է արգելված նրանց մուտքը ՀՀ, ավելին, Մուրադ Փափազյանի գործով առկա է ԱՆ Անձնական տվյալների պաշտպանության գործակալության որոշումը, որով գործակալությունն ԱԱԾ-ին պարտադրել է տեղեկություններ տրամադրել։ Այդ որոշումն ԱԱԾ-ն բողոքարկել է։

«ԱԱԾ վկայակոչումը և փաստարկն աբսուրդ է, ասում են՝ եթե տեղեկություն տանք, որտեղ մեզ հետ համագործակցող անձանց անուններն են լինելու, ապա դա բացահայտելու է նրանց։ Մենք ոչ էլ ուզում ենք այդ անձանց անունները»,- նշեց Մինասյանը։
Այսօրվա նիստը հետաձգվեց, քանի որ ԱԱԾ-ն դեռևս դատարանին չի ներկայացրել ապացույցները։

Հիշեցնենք, որ Մուրադ Փափազյանը ընտանիքի հետ 2022թ հուլիսի 14-ին ժամանել է ՀՀ, սակայն «Զվարթնոց» օդանավակայանի սահմանային անցման կետում իրավասու աշխատակիցները նրանց թույլ չեն տվել մուտք գործել ՀՀ՝ միայն պատճառաբանելով, թե ինքն ընդգրկված է ՀՀ համար անցանկալի անձանց ցուցակում։

Մուրադ Փափազյանը ստիպված նույն օրն ընտանիքի հետ վերադարձել է Ֆրանսիա։ Ընդ որում, Մուրադ Փափազյանի մուտքը մինչ այդ արգելված էր միայն Թուրքիայում և Ադրբեջանում։ Իրավապահների և պատկան մարմինների կողմից որևէ հոդաբաշխ պարզաբանում այդպես էլ չի տրվել, թե որն է պատճառը Փափազյանի մուքտը ՀՀ արգելելու համար։ ԱԱԾ-ն անգամ հրաժարվել է պատասխանել Մուրադ Փափազյանին և պարզաբանում ներկայացնել, թե որն էր իրեն անցանկալի անձանց ցուցակում ներառելու հիմքը։ Թեև վարչապետի աշխատակազմը պարզաբանում էր ներկայացրել՝ «Արմենպրես» գործակալությանը, համաձայն որի՝ մուտքը Հայաստանի Հանրապետություն արգելվել է՝ հիմք ընդունելով «Օտարերկրացիների մասին» ՀՀ օրենքի 8-րդ հոդվածի «գ» և «զ» կետերը:

«Տվյալ անձը հանդիսանում է նախորդ տարվա հունիսի 1-ին Ֆրանսիայում ՀՀ դեսպանության մոտ վարչապետի գլխավորած կառավարական պատվիրակության՝ ՀՀ պետական դրոշակիր ավտոշարասյան դեմ հարձակում կազմակերպած անձանցից մեկը: Ավտոշարասյան ուղղությամբ նետվել են տարբեր իրեր, առարկաներ: Վարչապետի ՀՀ պետական դրոշակիր ավտոմեքենան ենթարկվել է հարձակման և ստեղծված իրավիճակը հաղթահարվել է միայն ֆրանսիական ոստիկանության և անվտանգության ուժերի ջանքերի արդյունքում: Այդ մասին վկայող տվյալներ հրապարակվել են տարբեր լրատվամիջոցների կողմից, իսկ տեսանյութերն առկա են նաև համացանցում: Ոչ միայն Ձեր կողմից նշված անձի, այլեւ հարձակման ակտիվ մասնակիցների մուտքը Հայաստանի Հանրապետություն արգելվել է: Ընդ որում, Հայաստանի Հանրապետությունը որեւէ վերապահում չունի խաղաղ ակցիաների որեւէ մասնակցի նկատմամբ: Իսկ հարձակումների կազմակերպիչների եւ մասնակիցների մուտքը Հայաստանի Հանրապետություն՝ օրենքով սահմանված կարգով արգելվել է»,- նշել են վարչապետի աշխատակազմից։

Մուրադ Փափազյանն այժմ դատական կարգով պահանջում է պարտավորեցնել ԱԱԾ-ին հանել ՀՀ տարածքում անցանկալի համարվող օտարերկրացիների տվյալների բանկից Փափազյանի տվյալները։

Հեղինակ՝ Իզաբել Սահակյան

Աղբյուր` Փաստինֆո