Փաստ ինֆո

Թյուր կարծիք է, որ պարեկների աչքի առաջ է տեղի ունեցել մահը և նրանք միջամտություն ցույց չեն տվել: Այս մասին լրագրողների հետ զրույցում ասաց ՆԳՆ փոխնախարար Արփինե Սարգսյանը՝ անդրադառնալով Կապանում տեղի ունեցած դժբախտ պատահարին։

Հիշեցնենք, որ օրերս տեղեկություն տարածվեց, որ Կապանում պարեկները մեքենան տևական ժամանակ վարել են քաղաքացի Ռազմիկ Մարտիրոսյանի հետևից, հասել մինչև տան բակ ու կանգնեցրել վարորդին։ Մեքենայի գույքահարկը չվճարելու համար պարեկների ու քաղաքացու միջև վիճաբանություն ու քաշքշուկ է տեղի ունեցել։ Երիտասարդի հայրը՝ Սեյրան Մարտիրոսյանը, պատշգամբից նկատել է, որ պարեկները հարվածում են որդուն։ Տնից դուրս է եկել, մոտեցել պարեկներին ու խնդրել դադարեցնել ծեծկռտուքը։ Պարեկները դադարեցնելու փոխարեն ձեռնաշղթաներ են հագցրել որդուն։ Նույն ժամանակ հոր ինքնազգացողությունը վատացել է և տեղում ինֆարկտից մահացել է։

Արփինե Սարգսյանը, սակայն, հերքում է։

«Ըստ էության, պարեկները ձերբակալել են քաղաքացուն՝ իրավաչափ նպատակներով, այնուհետև, քանի որ բակում է տեղի ունեցել, հայրն է մոտեցել քաղաքացու: Պարեկները բացատրել են հորը, թե ինչ նպատակով է իրականացվում ձերբակալումը: Այնուհետև տղային ներկայացրել են բաժին, հայրը բարձրացել է վերև: Հետո բաժնում արդեն քաղաքացին տեղեկացել է, որ տանը հայրը մահացել է: Իրավաչափության մասով ասեմ, որ ՆԳՆ ներքին անվտանգության և հակակոռուպցիոն վարչությունում արդեն իսկ դեպքի մանրամասներն ամբողջությամբ ուսումնասիրվել են, այդ թվում պարեկների կրծքին ամրակցված տեսախցիկների ձայնագրությունները: Դրանով որևէ խախտում պարեկային ծառայողների կողմից չի արձանագրվել»,-ասաց փոխնախարարը:

Աղբյուր` Փաստինֆո