Փաստ ինֆո

Ադրբեջանը մինչև պայմանագիր կնքելը փորձելու է առավելագույնը ստանալ Հայաստանից։ Առավել ևս, որ զիջումների վերաբերյալ Ն․ Փաշինյանը խոստացել է գործնականում 2022թ․ հոկտեմբերի 6-ին՝ Պրահայում։ Խոստումների մեջ նաև տարածքային ամբողջականության ճանաչման խնդիրն է, անկլավների, Հայաստանից ազգությամբ ադրբեջանցիների՝ 1988-90 թվականներին դուրս եկածների և նրանց սերունդների մասին, փոխհատուցման և այլն։ «ՓաստԻնֆոյի» եթերում ասել է ռազմական փորձագետ, պահեստազորի գնդապետ Հայկ Նահապետյանը։

Բանախոսի դիտարկմամբ, Ալիևը ցույց է տալիս Ռուսաստանին և Իրանին, որ ինքը պատրաստակամ է ստորագրել, այսինքն չի ուզում պատերազմ։ Բայց Ալիևը երբեք առիթը բաց չի թողնի, եթե կարող է ռազմական առումով շահեկան դիրքեր նվաճել, անպայման կդիմի այդ քայլին։

Անդրադառնալով Ադրբեջանի հայտարարություններին, փորձագետը նշեց, որ իրենք բազմիցս նշել են, որ Արևմուտքը այստեղ ներգրավված չի լինի։ Քանի որ այն, ինչը կարող է բաժանել, ենթադրենք 3-ի միջև, ավելի շահեկան է, քան բաժանել 4-ի միջև։ Երկրորդ, Ադրբեջանը ռազմավարական-դաշնակցային հարաբերություններ ունի Թուրքիայի հետ, կարողանում է և կարողացել է հարաբերություն ստեղծել Իրանի հետ՝ ակնհայտ առկա հակասությունների ֆոնին։ Վրաստանի վրա ունի լծակներ և նորմալ հարաբերություններ։ Եթե Արևմուտքը մտնում է այստեղ, ապա չի գալիս Հայաստանի շահերը պաշտպանելու, այլ իր շահերն ունի։ Այստեղ Ադրբեջանը ինչ-որ բան պետք է զիջի, բայց չի ցանկանում զիջել։

«Ադրբեջանը շահեկան է Արևմուտքին՝ տնտեսական և էներգակիրների առումով այնպես, ինչպես ինքը կա, բայց շահեկան չէ, երբ Ադրբեջանը փորձում է տարածաշրջանում կայունության ապահովման սյուներից մեկը լինել։ Մեծ հաշվով, Միացյալ Նահանգներին պետք է, որպեսզի Իրանը խնդիրներ ունենա, իսկ Իրանի՝ խնդիրներ առաջացնող կարևոր պետություններից մեկը Ադրբեջանն է։ Արևմուտքը ամեն ինչ արեց, որպեսզի Հայաստանում իրավիճակ փոխվի, և այդ իրավիճակը փոխվեց 2018թ․։ Պարտված Հայաստանն էր հնարավորություն տալու հաղթած Ադրբեջանին՝ մոտիվացված բանակ ու ժողովուրդ ունենալ՝ Իրանի դեմ պատերազմում։ Ալիևը հասկանում է, որ, եթե Արևմուտքի ձեռքին ամբողջովին գործիք դառնա՝ կարող է կորցնել այն, ինչ շահել է։ Ընդ որում, ոչ թե Հայաստանի կողմից քայլերի արդյունքում կկորցնի, այլ Իրանի և Ռուսաստանի»,- ասել է Հ․ Նահապետյանը։

Անդրադառնալով Հայաստանին, բանախոսը նշեց, որ Հայաստանը հասկանում է, որ, եթե մնա «3+3» ձևաչափի մեջ՝ մեծ հաշվով Արևմուտքը այստեղ ոչինչ չի անելու, այս իշխանության օրերը հաշված են լինելու։

Մանրամասները՝ տեսանյութում։

Աղբյուր` Փաստինֆո