Փաստ ինֆո

ՀԿ փոխնախագահ Արմեն Աշոտյանի գործով Մարթա Սիմոնյանի նկատմամբ ընտրված խափանման միջոց բացակայելու արգելքը վերացվեց։

«Փաստինֆո»-ի թղթակցի հաղորդմամբ՝ Հակակոռուպցիոն դատարանում՝ դատավոր Վահե Դոլմազյանի նախագահությամբ, կայացել է ՀՀԿ փոխնախագահ Արմեն Աշոտյանի, ԵՊԲՀ նախկին ռեկտոր Միքայել Նարիմանյանի, ԵՊԲՀ նախկին հաշվապահ Լարիսա Պարսեղյանի, դեղագետ Մարթա Սիմոնյանի, Ռոլան Դավթյանի գործով դատական նիստը։

Նիստի ընթացքում դատարանը նախ քննարկման առարկա դարձրեց գործով տուժողի ներկայացուցիչ Գալինա Հարությունյանի կարգավիճակը դադարեցնելու հարցը։ Մասնավորապես, վերջինս նշեց, որ ցանկանում է հրաժարվել տուժողի կարգավիճակից, քանի որ ինքը աշխատանքից ազատվել է 2013թ., և այն, ինչ այստեղ քննվում է, տեղի է ունեցել դրանից հետո:

«Ինձ, իմ ղեկավարած հիմնարկին որևէ վնաս չի պատճառվել»,- ասաց Գալինա Հարությունյանը:

Մեղադրող դատախազը առարկեց միջնորդության դեմ՝ նշելով, որ դեռևս նախաքննության ընթացքում տուժողի ճանաչման որոշումը ներկայացվել է, այնուհետև՝ նա ճանաչվել է տուժողի օրինական ներկայացուցիչ, դրանից հետո Հարությունյանը որևէ առարկություն չի ներկայացրել, չկան հիմքեր՝ նրա կարգավիճակը դադարեցնելու մասով։ Հարցի վերաբերյալ որոշում այդպես էլ չի կայացվել։ Հաջորդիվ քննության առարկա դարձվեց մեղադրյալների խափանման միջոցի հարցի քննարկումը։ Մարթա Սիմոնյանի պաշտպանը միջնորդեց վերացնել Մարթա Սիմոնյանի նկատմամբ ընտրված խափանման միջոց բացակայելու արգելքը, քանի որ Մարթա Սիմոնյանը առողջական խնդիրներ ունի և պետք է մեկնի արտերկիր, միևնույն ժամանակ, նրա նկատմամբ արդեն իսկ կա ընտրված խափանման միջոց նաև գրավը։ Պաշտպանն ընդգծեց նաև, որ փախուստի հավանականություն չկա։ Պաշտպանության կողմը միացավ միջնորդությանը։ Ռուբեն Մելիքյանը բարձրացրեց նաև անմեղության կանխավարկածի հարցը։ Մեղադրող դատախազն առարկեց միջնորդության դեմ՝ նշելով, որ Մարթա Սիմոնյանը չորս ամիս գտնվել է անազատության մեջ, իսկ այժմ առկա է փախուստի դիմելու ռիսկի հավանականություն, թեև նախաքննության ընթացքում խափանման միջոց կալանավորման կիրառման ժամանակ դատական ակտում չի արձանագրվել փախուստի հավանականությունը, ինչը, ըստ դատախազի, պայմանավորված է նրանով, որ Մարթա Սիմոնյանն արդեն իսկ անազատության մեջ է գտնվել։ Դատախազը պահանջեց մերժել միջնորդությունը։ Դատարանը, լսելով կողմերին, որոշեց բավարարել պաշտպանի միջնորդությունը՝ վերացնելով Մարթա Սիմոնյանի նկատմամբ ընտրված խափանման միջոց բացակայելու արգելքը։

«Փաստինֆո»-ն ավելի վաղ տեղեկացրել էր, որ քրեական գործով առկա են ՕՀՄ-ներ, որոնցում ակնարկում են, թե իբրև մեղադրյալ Մարթա Սիմոնյանի՝ կալանքի տակ գտնվելու ընթացքում նրա ամուսինը և վկաներից մեկը հանդիպել են Արմեն Աշոտյանին, գինովցած զրուցել՝ նշելով, որ Սիմոնյանը կալանքի տակ է, ինչ անեն, Արմեն Աշոտյանն էլ նշել է, որ եթե Մարթա Սիմոնյանին կալանքի տակ պահելով ստիպում են իր դեմ ցուցմունք տալ, ապա ինքը պատրաստ է գնալ և «նստել», ոչ մի խնդիր չկա, թող իր դեմ ցուցմունք տա։ Հենց այս դրվագն է ձևական առումով հիշատակվում նաև Արմեն Աշոտյանին կալանավորելու որոշման հիմքում, մինչդեռ, Աշոտյանի պաշտպանները պնդում են, որ ցուցմունքի փոփոխություն չի եղել, խոչընդոտման հավանականության մասին խոսք գնալ չի կարող։
«Փաստինֆո»-ի թղթակցի հաղորդմամբ՝ հաջորդիվ այսօրվա նիստում քննարկվեց Միքայել Նարիմանյանի խափանման միջոց բացակայելու արգելքը և գրավը վերացնելու մասին միջնորդությունը։ Պաշտպանը վկայակոչեց նաև Միքայել Նարիմանյանի առողջական ծանր վիճակի վերաբերյալ փաստաթղթերը, ինչպես նաև՝ նրան սնանկ ճանաչելու մասին որոշումը։ Միջնորդության քննարկումը կշարունակվի հաջորդ նիստին՝ դեկտեմբերի 19-ին։

Հիշեցնենք, որ քրեական վարույթի շրջանակներում կալանքի տակ է ՀՀԿ փոխնախագահ Արմեն Աշոտյանը։ Արմեն Աշոտյանի նկատմամբ հնարավոր հետապնդում հարուցելու հարցը լայն տարածում ստացավ հատկապես նախորդ տարվա վերջերին, երբ ԵՊԲՀ նախկին ռեկտոր Միքայել Նարիմանյանի նկատմամբ քրեական հետապնդում հարուցվեց՝ դեռեւս 2015 թ. համալսարանից խոշոր չափերի ենթադրյալ հափշտակության առթիվ հարուցված քրեական գործի շրջանակներում։ Դեռևս այդ ժամանակ մամուլը գրել էր, որ Նարիմանյանին ձերբակալելու հիմնական նպատակն Արմեն Աշոտյանի դեմ ցուցմունք կորզելն էր։ 2022թ. նոյեմբերի 16-ի կեսգիշերին Արմեն Աշոտյանին «Զվարթնոց» օդանավակայանում թույլ չեն տվել մեկնել ՀՀ-ից՝ պատճառաբանելով, թե նա մեղադրյալ է։ Նույն օրը երեկոյան Արմեն Աշոտյանը հրավիրվել է ՀՀ ՔԿ, որտեղ նրան մեղադրանք է առաջադրվել պաշտոնեական լիազորությունները չարաշահելու և փողերի լվացման հատկանիշներով։ Նրա նկատմամբ որպես խափանման միջոց է կիրառվել բացակայելու արգելքը։

Հեղինակ՝ Իզաբել Սահակյան

Աղբյուր` Փաստինֆո