Փաստ ինֆո

ՀՀ իշխանությունները ՀԱՊԿ ոչ մի միջոցառման չեն մասնակցում եւ դա նշանակում է, որ իրենք դուրս չեն գալի՞ս ՀԱՊԿ-ից: Ասացինք՝ դեմարշ է, ասացին՝ չէ, դեմարշ չէ, ասացինք դուրս եք գալիս, ասացին՝ դուրս չենք գալիս, բա էլ ի՞նչ անուն պետք է այս ամենը ստանա:

Այս մասին ԱԺ-ում լրագրողների հետ զրույցում ասաց «Հայաստան» խմբակցության պատգամավոր Արմեն Ռուստամյանը՝ անդրադառնալով ՀՀ վարչապետ Նիկոլ Փաշինյանի, ԱԺ նախագահ Ալեն Սիմոնյանի, ՊՆ Սուրեն Պապիկյանի, ԱԳ նախարար Արարատ Միրզոյանի՝ ՀԱՊԿ նիստերին չմասնակցելուն։

«Սա ակնհայտ դեմարշ է։ Իրենց կարծիքով՝ իրենք շատ հիմնավոր բացատրություն են գտել՝ ասում են,թե Հայաստանը շարունակում է մերժել, որ ՀԱՊԿ-ը գա՝ ասելով, որ քանի որ իրենք չեն հստակեցնում, թե ուր են գալիս, ապա ինչպե՞ս են գալիս»,- նշել է ընդդիմադիր պատգամավորը։ Ռուստամյանն ընդգծեց, որ կա վեկտորի, անվտանգային համակարգի փոփոխության քաղաքականություն, որը Հայաստանի համար խիստ վտանգավոր է։

«Ճամբարափոխություն իրականացնելն այս պահին՝ տեղին չէ։ Պատկերացրեք՝ կռվի ժամանակ մի խրամատում էիք, հետո պարզում եք, որ այն ձեր դուրը չի գալիս ու անցնեք մյուս խրամատ, այդ ընթացքում, բնականաբար, զոհեր կլինեն: Մենք կռիվը տեղափոխում ենք մեր տարածք։ Միթե մենք չենք տեսնում, թե ինչ է կատարվում, երբ դու այդ կռիվը տեղափոխում ես քո տարածք: Կան նաև օրինակներ. Ուկրաինայի, Վրաստանի օրինակները»,- նշել է Ռուստամյանը՝ ավելացնելով, որ փորձում ենք Հայաստանի անվտանգային համակարգը է փոխել՝ չհասկանալով, թե մյուսը որն է. «Առայժմ միայն խոսքեր են հնչում և սպառազինության փոխանակման շատ թույլ քայլեր են կատարվում, որը, բնականաբար, մեր անվտանգությունը և մարտունակությունը ամբողջությամբ ապահովելու որեւէ երաշխիք չի տալիս»:

Աղբյուր` Փաստինֆո