Փաստ ինֆո

Ես նույնպես չեմ մասնակցելու ՀԱՊԿ-ի նիստերին։ Այս մասին Ազգային Ժողովում ասաց ՀՀ ԱԺ նախագահ Ալեն Սիմոնյանը։

«Ինչ է եղել ՀԱՊԿ-ին... դեկտեմբերին ՀԱՊԿ-ում միջոցառում կա, ես նույնպես չեմ մասնակցելու դրան։ Հայաստանը ՀԱՊԿ-ից դուրս գալու որոշում չունի, բայց, կարծում եմ, իմ մասնակցությունը ստեղծված իրավիճակում տեղին չէ։ ՀԱՊԿ-ն իր պարտականությունները չի կատարում, գնամ՝ ինչ անեմ»,- ասել է ԱԺ նախագահը։

Նա նշեց, որ իրենք այդպիսով փորձում են ՀԱՊԿ մեխանիզմն աշխատեցնել։

«Ես ՀԱՊԿ-ի իմ գործընկերներին հայտնել եմ իմ որոշման մասին։ Դեռ արձագանք չկա, կարծում եմ, չի էլի լինի, քանի որ իրենց համար էլ է հասկանալի, թե որոնք են չմասնակցելու պատճառները։ ՀԱՊԿ-ը կառույց է, որը պետք է պաշտպանի ՀԱՊԿ անդամ երկրներին։ ՀՀ ինքնիշխան տարածք ներխուժել են երրորդ երկրի ուժեր և ՀԱՊԿ-ը նույնիսկ քաղաքական գնահատական չի տվել դրան»։

Դիտարկմանը, թե գնացեք՝ բարձրացրեք այդ հարցերը՝ Սիմոնյանն արձագանքեց. «Մեռանք բարձրացնելով, և բանավոր ենք բարձրաձայնել, և գրավոր, բացատրել ենք, օրինակ ենք ծառայել, ամեն ինչ արել ենք։
Ես կարծում եմ, հիմա հերթը ՀԱՊԿ-ինն է։ ՀԱՊԿ երկրները պետք է արձագանքեն, ոչ թե ապրեն ինչ-որ երևակայական փուչիկի մեջ, կա իրենց իրականությունը և կա իրականություն, որի մեջ ապրում ենք մենք։ Այդ իրականությունները չեն համընկնում, ու դա խնդիր է»։

Դիտարկմանը, թե հնարավոր է, որ նման իրավիճակում ՀԱՊԿ-ը դուրս գա այնտեղից՝ Սիմոնյանը պատասպանեց. «Իսկ դուրս գալն էլ ինչպե՞ս է լինում։

ՀԱՊԿ-ն ունի պարտավորություններ, որոնք չի կատարում։ Երբ Հայաստանը դիմում է ՀԱՊԿ-ին՝ նշում է կետեր և ՀԱՊԿ-ն անգամ քաղաքական գնահատական չի տալիս, ապա իրենք իրենց գործողություններով, հայտարարություններով, խոսույթով ապացուցում են, որ այդ կառույցը խնդիր ունի։

Իրենք ասում են, որ դիտորդական առաքելություն են պատրաստվում ուղարկել՝ չհստակեցնելով, թե որտեղ են ուղարկելու այդ առաքելությունը։ Տպավորություն են փորձում թողնել, որ ինչ-որ գործողություններ են անում, ինչ-որ ձևով օգնում են։
Թող հայտարարեն, որ Հայաստանի և Ադրբեջանի սահման գոյություն ունի; Չի կարելի ասել, որ էդտեղ սահման չկա, բայց ՀԱՊԿ-ը կա։ Եթե այդտեղ սահման չկա, ապա ՀԱՊԿ-ը սահման չունի, եթե ՀԱՊԿ-ը սահման չունի, ապա գալու՝ կանգնելու տեղ չունի։
Ավելին, եթե գան, կանգնեն 50-100 կմ այն կողմ ու ասեն՝ սա էր մեր սահմանը, բա հետո ի՞նչ ենք անելու։ Իրենք 1 շաբաթ հետո գնալու են, բա մեր պետությունն ի՞նչ է անելու։ Ո՞ւր են գալու՝ կանգնեն, Երևա՞ն, Ջերմո՞ւկ, ո՞ւր։

Դուք չե՞ք տեսնում ՀԱՊԿ-ի անդամ պետություններ ղեկավարների խոսույթը։

Ես կարծում եմ՝ հայկական հանրության մեջ՝ ոչ ընդդիմության, ոչ իշխանութան մեջ այլևս հարց չկա այս հարցի շրջանակներում։ Ակնհայտ է, որ կան քաղաքական շահեր, ու այդ շահերը գործել են հայ ժողովրդի շահերի դեմ»։

Աղբյուր` Փաստինֆո