Փաստ ինֆո

54 համարի երթուղին սպասարկող «Գազելում» դիմակ չկրելու հարցի շուրջ առաջացած վիճաբանության ժամանակ Արման Հունանյանի սպանության համար Գարեգին Բաղդասարյանն արդարացվել է։

Երևանի ընդհանուր իրավասության քրեական դատարանը՝ դատավոր Վահագն Մելիքյանի նախագահությամբ, հրապարակված դատավճռով՝ արարքը վերաորակելով որպես առողջությանը ծանր մարմնական վնաս պատճառել։ Դատարանը որպես պատիժ է նշանակել ազատազրկումը՝ վեց տարի ժամկետով։ Արարքի նման վերաորակման հետ պաշտպանության կողմը թեև այդքան էլ համաձայն չէ՝ պնդելով, որ Բաղդասարյանն անհրաժեշտ ինքնապաշտպանություն է ցուցաբերել, սակայն սպանության մեղադրանքով արդարացումը գոհացնող արդյունք են համարում։ Փաստաբան Ալեքսանդր Կոչուբաևը «Փաստինֆո»-ի հետ զրույցում նշեց, որ պաշտպանության կողմն ամբողջ դատավարության ընթացքում զարգացրել է անհրաժեշտ պաշտպանության վիճակը, քանի որ, ըստ պաշտպանի, գործի քննության ընթացքում հաստատվել է, որ տուժողը նախահարձակ է եղել մեղադրյալի նկատմամբ, տուժողը, պարանոցից և վզի հատվածից խեղդող հնարքներ կատարելով, ծեծի է ենթարկել մեղադրյալին, ինչից հետո միայն, ըստ փաստաբանի, մեղադրյալը «շվեյցարական դանակով» հարվածել է։ Ընդ որում, «շվեյցարական դանակը» ոչ թե դանակ է, այլ՝ դանակ, պատառաքաղ, բացիչ, գդալ, այսինքն՝ որսորդական կիրառության է։

«Գործի քննությամբ այս փաստական տվյալները հաստատվել էին։ Նաև գործի նյութերում առկա է փորձագետի եզրակացություն, համաձայն որի՝ տուժողը ստացել է երեք կտրող-ծակող վնասվածքներ, որոնցից միայն մեկն է պատճառական կապի մեջ մտնում մեղադրյալի հարվածների հետ։ Այսինքն՝ մնացած երկու հարվածը տուժողը ստացել է դեպքից 12 ժամ առաջ»,- նշեց փաստաբանը՝ հավելելով, որ այս պայմաններում իհարկե կցանկանային ավելի համարձակ դատական ակտ, այն է՝ ամբողջ ծավալով արդարացում, բայց սա էլ գոհացնող արդյունք է, քանի որ առաջին ատյանի դատարանին գոնե կարողացել են ապացուցել, որ սպանության հանցակազմը բացակայում է․ «Հենց մեղադրյալն ինքն ասում էր՝ դատեք ցանկացած հոդվածով, միայն դա չլինի սպանություն»։ Միևնույն ժամանակ վճիռը պաշտպանության կողմին այդքան էլ չի բավարարում, ըստ Կոչուբաևի՝ եթե անձը նման դաժան ծեծի է ենթարկվում, անհրաժեշտ պաշտպանությունը անձի բացարձակ իրավունքն է, ինչին էլ դիմել է Բաղդասարյանը։

«Այստեղ խնդիրը, անկեղծ կլինեմ, դատարանի մեջ չէր, գործ ունենք՝ անհրաժեշտ պաշտպանության ինստիտուտի համակարգային խնդրի հետ։ Այսինքն՝ այդ ինստիտուտը, թեև նախատեսված է Քրեական օրենսգրքով, բայց իրավակիրառ պրակտիկան ծայրահեղ քիչ է կիրառվել։ Գուցե 5-6 դատական գործ գտնենք կամ ոչ, որտեղ անհրաժեշտ պաշտպանություն է կիրառվել։ Սա պրակտիկայում չկիրառվող իրավական ինստիտուտ է և մենք բախվեցինք համակարգային խնդրին։ Եթե չլիներ այդ համակարգային խնդիրը, այսօր Գարեգին Բաղդասարյանը կլիներ ազատության մեջ, բայց արդյունքը գոհացնում է մեզ»,- նշեց Կոչուբաևը՝ հավելելով, որ Բաղդասարյանը երեք տարի արդեն անազատության մեջ է, կարող է առաջիկա մի քանի ամիսների ընթացքում վաղաժամկետ ազատ արձակվել։

«Բացի այդ, վեց տարիները փաստարկված չէր, քանի որ Բաղդասարյանի արարքում ծանրացնող որևէ հանգամանք չկա, իսկ հոդվածը, որը, ըստ դատավորի կիրառելի է, պատասխանատվություն է նախատեսում 5-6 տարի և, եթե պատիժն ըստ դատավորի լիներ իրավաչափ, պետք է կիրառվեր 5 տարի, իսկ Բաղդասարյանը՝ պետք է ազատ արձակվեր նիստերի դահլիճից, քանի որ պատժի կեսից ավելին արդեն կրել էր և չափազանց դրական էր բնութագրվում ՔԿՀ-ում, ակնհայտ է, որ վաղաժամկետ ազատ էր արձակվել»,- նշեց փաստաբանը՝ հավելելով, որ առողջությանը ծանր վնաս պատճառելու հանցակազմը կրկին վիճելի է և այդ բանավեճը կտեղափոխվի վերաքննիչ դատարան։

Հիշեցնենք, որ դեպքը տեղի է ունեցել 2021թ. ապրիլի 14-ին՝ Երևանի Պարոնյան-Լեո խաչմերուկում` 54 համարի երթուղին սպասարկող «Գազելում»: Վիճաբանությունն առաջացել է դիմակ չկրելու հարցի շուրջ ծագած վիճաբանության ժամանակ: Մասնավորապես, 39-ամյա Արման Հունանյանը դիմակ չկրելու համար դիտողություն է արել միկրոավտոբուսում գտնվող մի կնոջ, Գևորգ Բաղդասարյանը միջամտել է, ինչը վերաճել է վիճաբանության ու վերջինը իր մոտ գտնվող դանակով հարվածներ է հասցրել Հունանյանի կրծքավանդակին` պատճառելով մահ: 2021թ. ապրիլի 20-ին 57-ամյա տղամարդը՝ Գարեգին Բաղդասարյանը, ներկայացել է վարույթն իրականացնող մարմին և տվել խոստովանական ցուցմունք: Նրան մեղադրանք է առաջադրվել՝ ՀՀ քրեական օրենսգրքի 104-րդ (սպանություն) հոդվածի 1-ին մասով, նրա նկատմամբ որպես խափանման միջոց է ընտրվել կալանավորումը:

Հեղինակ՝ Իզաբել Սահակյան

Աղբյուր` Փաստինֆո