Փաստ ինֆո

ՈՒ՞ր հասանք՝ սեփական զրո կետով արտաքին հարաբերություններում Հայաստանը զրոյական մակարդակի հասցրած ՀՀ ներկա վարչապետին արդեն ալիևի օգնականներն են հրահանգ տալիս։ Ասենք՝ ադրբեջանի նախագահի օգնական, աշխատակազմի արտաքին քաղաքականության բաժնի ղեկավար ոմն Հաջիև։

Վերջինս իրեն իրավունք է վերապահում դաս տալ Հայաստանին, այսինքն, ՀՀ ղեկավարին, թե՝ բավական է Եվրոպայի և Ամերիկայի դռները բախես, խաղաղության արմատները, սերմերը մեր տարածաշրջանում են, այլ ոչ թե Վաշինգտոնում, Բրյուսելում և Փարիզում։
Ի՞նչ է սա նշանակում և ալիևն ի՞նչ մեսիջ է իր օգնականի միջոցով փոխանցում Հայաստանի ներկա իշխանության ղեկավարին։ Այն ղեկավարին, որին իշխանության բերելու հարցում թուրքադրբեջանական տանդեմն իր ներդրումն է ունեցել։

Ըստ էության, ալիևի օգնականի միջոցով ՀՀ իշխանությանն ուղղակի առաջարկվում է՝ «խաղաղությունն առաջ տանելու և լուրջ հաջողությունների հասնելու համար բանակցել ուղղակի Ադրբեջանի հետ»։ Ոչ Եվրոպան, ո՛չ Ամերիկան, ո՛չ էլ Ռուսաստանը թող չխառնվեն։
Հայաստան և ադրբեջան։

Ի՞նչ է սա, եթե ոչ իսկական ծուղակ՝ ուր կոպտագույն կերպով է գործելու «ուժեղի դեմ միշտ էլ թույլն է մեղավոր» հայտնի ասացվածքը։ Ընդ որում, ինչպես պատմության մեջ է միշտ եղել՝ թուրքական սուտ, քաղցր խոսքերն ու խոստումներն անպակաս են։

Պարզվում է՝ «Ադրբեջանը լավ մտադրություններ ունի»։

Որևէ մեկը կարո՞ղ է պատկերացնել ադրբեջանի լավ մտադրությունները Հայաստանի նկատմամբ՝ առանց հիշելու Եվրոպայի կենտրոնում՝ Բուդապեշտում խաղաղապահ առաքելություն իրականացնող մարդասպան Ռամիլ Սաֆարովին, ապրիլյանի ժամանակ՝ Քարամ Սլոյանի հանդեպ իրականացրած վանդալիզմը, 44-օրյայի բարբարոսությունները, 2022-ի սեպտեմբերի 13-ի ջերմուկյան դեպքերը, 2022-ի դեկտեմբերին սկսված և այս տարվա սեպտեմբերին Հայկական Արցախի և արցախցիների հանդեպ ադրբեջանի իրականացրած ցեղասպանությունը․․․ Էթնիկ զտումը։ Ընդ որում, թվարկումը վերաբերվում է միայն 21-րդ դարին։

Այս ամենը նկատի ունենալո՞վ է ադրբեջանի նախագահի օգնականն ասում՝ «Մեր երկրի ինքնիշխանությունն ապահովվել է, տարածաշրջանում ստեղծվել է նոր ստատուս-քվո»։

Վերջինս նախկին ստատուս-քվոն անարդար էր և անընդունելի էր համարում, իսկ ներկան՝ արդար։ Այսպիսով ադրբեջանի իշխանությունը շատ հստակ մեսիջ է հղում փաշինյանական իշխանությանը, ասելով՝ ուզեք-չուզեք՝ մենք այստեղ ենք, ձեր կողքին և շուտով գալու ենք։

Այսինքն, օգնականի միջոցով՝ գալու եղանակներն է ճշտվում։

Սա չի՞ նշանակում, որ Հայաստանը թուրքադրբեջանական տանդեմի նոր հարձակման առաջ է կանգնած, ընդ որում, բոլոր կողմերից միայնակ մնացածի կարգավիճակում։

Նկատենք, որ ՌԴ ԱԳՆ խոսնակ Զախարովային եթե Փաշինյանն իրեն ուղղություն տալու դեպքերում պատասխանում էր, այս դեպքում լուռ է։

Աղբյուր` Փաստինֆո