Փաստ ինֆո

Ես Արցախի Հանրապետության քաղաքացի, Արցախի Հանրապետության ԱԺ պատգամավոր եմ, որ 2020թ.-ից խնդրում, աղաչում, պաղատում էր ժողովրդի անունից՝ միջազգային հանրությանը, միջազգային կառույցներին՝ կանգնացնել հային ատող, հայասպան, բռնապետ Ալիևի ձեռքը, թույլ չտալ սպանել ու կեղեքել մեր երեխաներին: Ցավոք, այդ միջազգային հանրությունը, որ այսօր խոսում է մարդկային կյանքերի մասին՝ իբրև բարձրագույն արժեք՝ լուռ էր, խուլ էր, ոչինչ չէր տեսնում և ոչինչ չէր լսում: Այս մասին ԵԱՀԿ ԽՎ պատվիրակներին ուղղված ակցիայի ընթացքում ասաց Արցախի ԱԺ պատգամավոր Մետաքսե Հակոբյանը:

«Աշխարհի լուռ համաձայնության ներքո երեք տարի շարունակ Արցախի Հանրապետությունում հայը կեղեքվում էր, մորթվում էր միայն այն բանի համար, որ ընդամենն ապրում է իր հայրենիքում: Երեք տարի շարունակ ադրբեջանցի զինվորը նույնիսկ հրադադարից հետո շարունակում էր գերեվարել մեր հայրենակիցներին, մեր պատանիներին, մեր երեխաներին, շարունակում էր սպանել ու խոշտանգել:

Երեք տարիների ընթացքում մեր գերիների թիվը ոչ թե նվազեց, այլ՝ ավելացավ»,- ասաց Մետաքսե Հակոբյանը՝ հավելելով. «Ուր է այն միջազգային հանրությունը, որոնց ներկայացուցիչներն այսօր պետք է ընթրեն Հայաստանի մայրաքաղաքի սրտում»:

Հակոբյանն ընդգծում է, որ այսօր բռնի տեղահանվել, եկել են Մայր հայրենիք՝ թողնելով իրենց տներում գերեզմանները, սրտերն ու հոգիները՞ Նրա խոսքով՝ այսօր հայտնվել են մի իրականությունում, որտեղ խախտվում են բոլոր իրավունքները, այդ թվում՝ Մՙայր հայրենիքում:

«Մեր միակ կոչն ու պահանջն է այսօր բոլոր միջազգային կառույցներին՝ մեկ անգամ գոնե բացեն իրենց ականջներն ու աչքերը, բռնեն բռնապետի ձեռքից, կարողանանք վերադառնալ մեր տները և, որ ամենակարևորն է, մեր հայրենակիցների վերադարձը, որոնք այսօր անօրեն Բաքվի բանտերում են»,- նշեց նա:

Աղբյուր` Փաստինֆո