Փաստ ինֆո

Ադրբեջանը փորձել է մյուս պատվիրակությունների ժամանումը Հայաստան կանխել, բայց ինչպես տեսնում եք՝ չեն հաջողել։ Այս մասին լրագրողների հետ զրույցում ասաց ԱԺ «ՔՊ»-ական պատգամավոր, Արտաքին հարաբերությունների մշտական հանձնաժողովի նախագահ Սարգիս Խանդանյանը։

«Ես կարծում եմ՝ շատ դժվար է մի ռեժիմի ներկայացուցիչների, որոնք ԼՂ-ում էթնիկ զտում են րականացրել, առնվազն հոգեբանորեն գալ և ներկա լինել Հայաստանում վեհաժողովի։ Այո, պատճառաբանություններ են փնտրում և ես գիտեմ, որ փորձեր են կատարել մեր մյուս գործընկերների, մյուս պատվիրակությունների ժամանումը Հայաստան կանխել, բայց ինչպես տեսնում եք՝ չեն հաջողել»,- ասաց Խանդանյանը։

Ինչ վերաբերում է Ռուսաստանի Դաշնության պատվիրակության չմասնակցելուն, ապա Խանդանյանը նշում է, որ իսկապես չգիտի, թե ինչու պատվիրակությունը չի եկել, պատճառներ չի տեսնում։

«Իհարկե, պետք է խոստովանեմ, որ մի շարք եվրոպացի գործընկերների կողմից որոշակի ազդակներ եղել են՝ ՌԴ պատվիրակության վերաբերյալ, օրինակ, Կանադայում տեղի ունեցած նստաշրջանին, նախորդ ամառ Մեծ Բրիտանիայում տեղի ունեցած նստաշրջանի ժամանակ։ Այդ երկրները պարզապես վիզաներ չեն տրամադրել պատվիրակություններին, բայց մեր դեպքում ՌԴ պատվիրակությունը նման խնդիր չունի»,- նշեց նա՝ հավելելով, որ սա նաև խոսակցության հարթակ է և հնարավորություն էր, որ ներկա գտնվեին և իրենց դիրքորոշումը հայտնեին՝ տարածաշրջանային հարցերի վերաբերյալ։

Անդրադառնալով Իրանի հետ փոխհարաբերություններին, ապա Խանդանյանի կարծիքով՝ Հայաստանը Իրանի հետ շատ լավ է աշխատում։ Նրա խոսքով՝ Իրանի կողմից դժգոհություններ չեն հնչել Արևմուտքի հետ Հայաստանի քաղաքական շփումների ակտիվացման հետ կապված:

«Իրանը շատ հստակ իր դիրքորոշումներն է հայտնում Հայաստանի տարածքային ամբողջականության պահպանման վերաբերյալ, սահմանների անձեռնմխելիության մասին: Կարծում եմ՝ նորմալ գործընթաց է, մենք շատ լավ աշխատում ենք Իրանի մեր գործընկերների հետ»,- նշեց նա:

Աղբյուր` Փաստինֆո