Փաստ ինֆո

Մանվել Գրիգորյանի ֆիզիկական ոչնչացումը բերեց Արցախի այսօրվա կորստին։ Այս մասին դատարանում հայտարարեց Նազիկ Ամիրյանը՝ ներկայացնելով իր պաշտպանական ճառը։ Նշենք, որ ԵԿՄ նախկին նախագահ, ԱԺ նախկին պատգամավոր Մանվել Գրիգորյանի և Նազիկ Ամիրյանի գործով դատաքննությունը մոտենում է ավարտին։ Նախորդ նիստերի ընթացքում հանրային մեղադրողը միջնորդել է մեղավոր ճանաչել Մանվել Գրիգորյանին և՛ Նազիկ Ամիրյանին՝ Ամիրյանի նկատմամբ որպես պատիժ նշանակելով ազատազրկումը՝ 7 տարի ժամկետով։ Պաշտպան Գուրգեն Գրիգորյանը ճառով միջնորդել է հետմահու արդարացնել Մ․ Գրիգորյանին և Ն․ Ամիրյանին, թեև թերհավատորեն է վերաբերում, որ այս դատարանը կարող է արդարացնել նրանց։

Երևանի ընդհանուր իրավասության քրեական դատարանում՝ դատավոր Մնացական Մարտիրոսյանի նախագահությամբ, այսօր կայացած նիստի ընթացքում ճառով հանդես եկավ Նազիկ Ամիրյանը՝ արձանագրելով, որ իրեն մեղսագրվում է մի արարք, որն ինքը չի կատարել, մասնավորապես, մեղադրանքում նշված զենք զինամթերքն օրինական է, իր և ամուսնու՝ Մանվել Գրիգորյանի անունով գրանցված, երկար տարիներ այդ զենքերը չեն տեղաշարժվել, եղել են նույն սենյակում, որտեղ հայտնաբերվել է, իսկ ինչ վերաբերում է Լճափնյա 28 և 30 հասցեներում հայտնաբերված զենքերին, ապա ինքը չի էլ հասկանում, թե ինչ կապ ունի դրա հետ, նշում է՝ ենթադրելով մեղադրանքի ծավալ չեն լցնում, գուցե վարույթն իրականացնող մարմինը չի պատկերացնում այդ զենքերի քաշը և իր կողմից այդ զենքը տեղափոխելու անհնարավորությունը։ Նրա խոսքով՝ հանրության ականջին հնչեղ լինելու և հանրությանը ցնցելու համար նախաքննական մարմինը մի ամբողջ հեքիաթ է կառուցել։

Ինչ վերաբերում է հայտնաբերված տասնյակ ավտոմեքենաներին, ապա Ամիրյանը վստահեցնում է, որ դա որևէ կապ չի ունեցել իր հետ, իրեն պատկանող ավտոմեքենաները միշտ սպասարկել են իրեն և կայանված են եղել Էջմիածին քաղաքում՝ Ալավերդյան հասցեում։ Ամիրյանը նաև բարձրացրեց միակողմանի քննության հարցը, ըստ նրա՝ չեն դատակոչվել կարևոր վկաները, ինչպես նաև՝ տեղեկացրեց, որ նախաքննության ընթացքում եղել են ցուցմունքներ, այդ թվում՝ Ռուբիկ Գևորգյանի, որոնք հետագայում հաշվի չեն առնվել։ Բացի այդ, չի հարցաքննվել նաև Նետաձգության ֆեդերացիայի քարտուղարը, որի մասին ցուցմունքում նշել է Արմեն Հակոբյանը։

«Ինչու չի հարցաքննվել։ Ենթադրվում է, որ կկանխվեր «տուշոնկա շոուն», քանի որ մեղադրանքի կողմը հիմնվել է միայն մեղադրական շարադրանքի եզրակացության վրա, բաց է թողել քրեական գործի առկա ապացույցները, ուստի, վերը նշված փաստերը մնացել է առանց քննության»,- նշեց Ամիրյանը։

Ամիրյանը ճառում նաև արձանագրեց, որ կապ չունեն նաև Արցախի Հանրապետության տարածքում տան խուզարկությամբ հայտնաբերվածի հետ, քանի որ 1997թ այնտեղ չեն ապրում, այն որպես տարածք հատկացվել էր զորամասի տարածք այցելող բարձրաստիճան զինվորականների այցելության համար․ «Այդ տունը 2016թ ծառայել է որպես շտաբ, որտեղից ղեկավարվել են առաջնագծում եղած կամավորները, որոնց շնորհիվ Արցախի սահմանները մնացին անառիկ։ Դրա համար էլ երևի դատում են Մանվել Գրիգորյանին, նա թույլ չտվեց Արցախը հանձնել Ադրբեջանին»։

Նազիկ Ամիրյանն ընդգծեց, որ իր և Մանվել Գրիգորյանի նկատմամբ հարուցված քրեական գործը կրում է քաղաքական բնույթ, նպատակն էր՝ Մանվել Գրիգորյանին հեռացնելու քաղաքական գործընթացներից, կազմաքանդել երկրի պահպանման համար ամենակարևոր օղակներից մեկը՝ ԵԿՄ-ն, որն իր արդյունավետությունը ցույց տվեց Քառօրյա պատերազմում, երբ մի գիշերում մեկ բրիգադով համալրեց առաջին գիծը, այն էլ՝ պատերազմն անցած մարդկանցով, օգնեց կանգնեցնել թշնամու առաջխաղացումը։

«Պարզ է, որ Մանվել Գրիգորյանի ղեկավարությամբ ԵԿՄ գոյությունը 2020թ 44 օրյա պատերազմի ժամանակ կատարելու էր նույն բանը, պարզ չէր լինի պատերազմի ելքը, ուստի, Արցախի հանձնման փաստը՝ ԵԿՄ գոյության պայմաններում խառնելու էր բոլորի խաղաքարտերը»,-նշեց Ամիրյանը՝ միջնորդելով իր և Մանվել Գրիգորյանի նկատմամբ արդարացման դատական ակտ կայացնել։

Հիշեցնենք, որ Մանվել Գրիգորյանի նկատմամբ հետապնդումներն իրականացվեցին 2018թ ՀՀ-ում իրականացված իշխանափոփոխությունից հետո։ 2018թ․ հունիսին ԱԱԾ-ն խուզարկություններ կատարեց Մանվել Գրիգորյանի տանը, ապա հրապարակեց տեսանյութ՝ հայտնաբերված՝ զինծառայողների համար նախատեսված պահածոների, զենքերի և ավտոմեքենաների վերաբերյալ, ինչը հանրության շրջանում բավականին մեծ աղմուկ բարձրացրեց։ Հետագայում, սակայն, Գրիգորյանի և նրա կնոջ նկատմամբ քրեական հետապնդումներն իրականացվեց բոլորովին այլ գործի շրջանակներում։ Մանվել Գրիգորյանը մեղադրվում էր ապօրինի զենք-զինամթերք պահելու, ավելի քան 101 միլիոն դրամի գույք յուրացնելու, ավելի քան 1 միլիարդ դրամի հարկերի վճարումից խուսափելու, պետական միջոցներից ավելի քան 1 միլիարդ դրամ վատնելու և շորթմամբ 37 միլիոն դրամ արժողությամբ գույքի հափշտակություն կազմակերպելու մեջ: Նրա և իր կնոջ՝ Նազիկ Ամիրյանի վերաբերյալ քրեական գործը դատարանում էր 2019թ-ից, Մանվել Գրիգորյանը շուրջ երկու տարի գտնվել է կալանքի տակ, թեև պաշտպանները մշտապես բարձրաձայնում էին Գրիգորյանի՝ կալանքի հետ անհամատեղելի հիվանդությունների, արտերկրում բուժում ստանալու անհրաժեշտության մասին, իսկ դատական նիստերն ընթանում էին առանց նրա մասնակցության, քանի որ վերջինս ի վիճակի չէր լինում մասնակցել նիստերին։ Տևական ժամանակ կալանքի տակ գտնվելուց հետո, ի վերջո, երբ արդեն Գրիգորյանի վիճակը ծայրահեղ ծանր էր գնահատվում, դատախազության նախաձեռնությամբ հրատապ նիստ է հրավիրվել և քննարկվել է Գրիգորյանի առողջական վիճակի հիմքով նրա նկատմամբ ընտրված խափանման միջոց կալանքն այլընտրանքային խափանման միջոցով փոխարինելու հարցը։ Դատարանը 2020թ Մանվել Գրիգորյանի խափանման միջոց կալանքը փոխարինեց չհեռանալու մասին ստորագրությամբ, որից հետո, սակայն, Գրիգորյանը երկար չապրեց։ 2020թ․ նոյեմբերի 19-ին Մանվել Գրիգորյանը մահացավ։

Հեղինակ՝ Իզաբել Սահակյան

Աղբյուր` Փաստինֆո