Փաստ ինֆո

Դատախազությունը Հայաստանի պետական սիմֆոնիկ նվագախմբի գլխավոր դիրիժոր Սերգեյ Սմբատյանին վերադարձնում է 100 մլն դրամ գրավի գումարը։ Տեղեկությունը «Փաստինֆո»-ի հետ զրույցում հաստատեցին ՀՀ գլխավոր դատախազությունից։

Նշենք, որ գրավի գումարը վերադարձնելը ոչ թե բարի կամքի դրսևորում է, այլ՝ օրենքով սահմանված պահանջ և պայմանավորված է՝ նրա նկատմամբ քրեական հետապնդումն արդարացնող հիմքով դադարեցնելու որոշման հետ։

Ավելին, չի բացառվում, որ պաշտպանական կողմը կբարձրացնի նաև վնասի փոխհատուցման պահանջ, քանի որ իրավապահները, փաստացի, քրեական հետապնդում են իրականացրել, ավելի քան մեկ ամիս կալանքի տակ պահել անձին, առավել ևս՝ համաշխարհային ճանաչում ունեցող դիրիժորի՝ առանց հիմքերի, ու հիմա ստիպված արձանագրում են, որ մեղսագրվող արարքը Սերգեյ Սմբատյանը չի կատարել և հենց այդ հիմքով դադարեցրել են քրեական հետապնդումը։ Այս համատեքստում առավել ուշագրավ է այն, թե ինչպես է առաջին ատյանի դատարանը, Սմբատյանին կալանավորելու որոշում կայացնելով, հաղթահարված համարել հիմնավոր կասկածի շեմը, եթե հենց վարույթն իրականացնող մարմնի համար ապացույցներ չեն եղել, բայց այս հարցին անդրադարձ կկատարվի հետագայում։

Հիշեցնենք, որ Իսրայելում ՀՀ նախկին դեսպան Արմեն Սմբատյանը ու նրա որդին`Հայաստանի պետական սիմֆոնիկ նվագախմբի գեղարվեստական ղեկավար և գլխավոր դիրիժոր Սերգեյ Սմբատյանն օգոստոս ամսին ձերբակալվել, ապա՝ կալանավորվել էին 10 տարվա վաղեմության ենթադրյալ խարդախության վերաբերյալ գործով, որը քննվում է շուրջ երեք տարի։ Իրավապահները նրանց մեղադրում էին առանձնապես խոշոր չափերով խարդախությամբ առանձնապես խոշոր չափերի` շուրջ 966 մլն դրամի հափշտակության մեջ:

Մասնավորապես` պաշտոնապես ՀՀ Գլխավոր դատախազության տարածած հաղորդագրության համաձայն, քրեական վարույթով պարզվել էր, թե արտակարգ և լիազոր դեսպան Ա.Ս.-ն, վերջինիս որդի, դիրիժոր Ս.Ս.-ն և գործարար Ա.Պ.-ն 2012 թվականին Հայաստանի Հանրապետության կառավարությանը ներկայացրել են 800 մլն դրամ արժողության «Գրքի աշխարհ» բազմաֆունկցիոնալ համալիր կառուցելու կեղծ ներդրումային ծրագիր և խարդախությամբ հափշտակել «Երևանի Պ.Չայկովսկու անվան միջնակարգ երաժշտական դպրոց» ՊՈԱԿ-ին անհատույց օգտագործման իրավունքով տրամադրված, Երևանի Կողբացի 36 հասցեում գտնվող հողամասից առանձնացված 300 քմ մակերեսով, 166 մլն 103 հազար դրամ արժողությամբ հողամասը: Հետագայում Արմեն և Սերգեյ Սմբատյանների խափանման միջոց կալանքը փոխարինվել է գրավով, իսկ կարճ ժամանակ անց Սերգեյ Սմբատյանն արդարացվել է։

Հեղինակ՝ Իզաբել Սահակյան

Աղբյուր` Փաստինֆո