Փաստ ինֆո

Ադրբեջանի կողմից 2023 թվականի սեպտեմբերի 19-ին սանձազերծված ռազմական գործողությունների և Լեռնային Ղարաբաղում տեղի ունեցած պայթյունի հետևանքով Հայաստան տեղափոխվելուց հետո տարբեր բուժհաստատություններում բուժում է ստանում 92 քաղաքացի։ Նրանցից 11-ի վիճակը շարունակում է մնալ ծանր, իսկ երեքինը՝ ծայրահեղ ծանր։ 19 հիվանդներ շարունակում են բուժումը արտասահմանում։ Նրանց մոտ նկատվում է առողջական վիճակի դրական դինամիկա։

«Արմենպրես»-ի հաղորդմամբ՝ ՀՀ կառավարության հումանիտար կենտրոնում կազմակերպված մամլո ասուլիսի ժամանակ այս մասին հայտնեց առողջապահության նախարարի տեղակալ Արտակ Ջումայանը՝ հավելելով, որ վերջին շաբաթների ընթացքում ավելի քան 150 բուժառու է դուրս գրվել հիվանդանոցներից՝ իրենց բուժումը շարունակելով ամբուլատոր օղակում։ ԼՂ-ից տարհանված ընտանիքներում ծնվել է 150 երեխա։ Այս պահին բռնի տեղահանված  57200 քաղաքացի արդեն իսկ կցագրվել է քաղաքային պոլիկլինիկաներում և գյուղական ամբուլատորիաներում։ Նրանք քրոնիկ հիվանդությունների, երեխաների պատվաստման և հղիների հաշվառման դեպքում ամբողջությամբ ծառայություններ կստանան պետպատվերի շրջանակում։

«Բժշկական տարբեր կենտրոններում այս պահին բռնի տեղահանվածներից աշխատանքի է անցել 100 հոգի։ Պետպատվերի շրջանակում 676 բուժաշխատողներ ուղարկվել են մասնագիտական զարգացման կրեդիտավորման։ Առողջապահության նախարարության ուղղորդմամբ՝ մարզային բժշկական հաստատություններում առկա թափուր հաստիք զբաղեցնելու դեպքում,  ի հավելումն սահմանված աշխատավարձի, մեր հայրենակիցներին կտրամադրվի ամսական նվազագույն աշխատավարձի մասով ՀՀ օրենքի առաջին հոդվածով սահմանված՝ ամսական աշխատավարձի եռապատիկ չափով աջակցություն մինչև վեց ամիս ժամկետով։ Մանրամասների համար մարդիկ կարող են դիմել առողջապահության նախարարության անձնակազմի կառավարման վարչություն կամ զանգահարել 060 80 80 03 համարով։ Տեղեկություններ կարելի է ստանալ նաև նախարարության «Ֆեյսբուք»-ի էջից»,- ասաց առողջապահության փոխնախարարը։  

Աղբյուր` Փաստինֆո