Փաստ ինֆո

Նոյեմբերի 17-ին լրանում է Կոռուպցիայի կանխարգելման հանձնաժողովի նախագահի և մի շարք անդամների լիազորությունների ժամկետը, մրցութային խորհուրդ պիտի ձևավորվեր, սակայն մեծամասնությունը մերժեց մեր թեկնածուին՝ մրցութային խորհրդի կազմում ընդգրկվելու համար և ընտրեցիք մեծամասնության թեկնածուին, բայց օրակարգում բացակայում է մրցութային խորհրդի կողմից անհրաժեշտ թեկնածուների ընտրության և պառլամենտի ներկայացման հարցը։ Այս մասին այսօր գումարված հերթական քառօրյա նիստի ընթացքում ասաց «Հայաստան» խմբակցության քարտուղար Արծվիկ Մինասյանը։

«Այս հանձնաժողովը փաստորեն մատնվում է անգործության ամսի 17-ից հետո, քանի որ քվորման խնդիր է լինելու։ Ի՞նչ վիճակում է թեկնածուների ներկայացման ընթացակարգը կա՞ն թեկնածուներ, որոշում կա՞ և, եթե կա, ապա ինչո՞ւ օրակարգում չկա այս հարցը»։
ՀՀ ԱԺ նախագահ Ալեն Սիմոնյանը տեղեկացրեց, որ օրենքը մինչև 5 տարբեր ընտրության հնարավորություն է տալիս և հանձնաժողովն աշխատում է։ «Հանձնաժողովն աշխատելու է, օրենքով նախատեսված ժամկետներում ընտրությունը կկատարվի և թեկնածուները կներկայանան ԱԺ»։

Մինասյանի դիտարկմամբ՝ պետք է լրացուցիչ անգամ հարցն ուսումնասիրվի, որովհետև «իմ դիտարկումներով ամսի 17-ից այս հանձնաժողովը կկազմալուծվի, քանի որ քվորման խնդիր կա»։ Սիմոնյանն արձագանքեց, թե չի կազմալուծվի, բայց առաջարկն ընդունելի է ու կարելի է հարցը քննարկել։

Աղբյուր` Փաստինֆո