Փաստ ինֆո

ԵՄ-ի համար անկյունաքարային նշանակություն ունի Հայաստանի՝ դեպի Արևմուտք թեքվելը։ Քանի որ ՀՀ ներկա իշխանությունները փորձում են որդեգրել հենց այդ ուղեգիծը, ուստի զարմանալի չէ, որ Եվրոպան զգալի ջանքեր է գործադրում՝ այդ թվում միջամտություն ցուցաբերում ներքին գործընթացների վրա, մասնավորապես, սատարման հայտարարություններով հանդես գալիս։ Այդ մասին «Փաստինֆո»-ի ետ զրույցում ասաց քաղաքագետ Արա Պողոսյանը։

Ինչպես արդեն տեղեկացրել ենք՝ ԵՄ արտաքին հարաբերությունների բարձր հանձնակատար Ժոզեպ Բորելը երեկ հայտարարել է, թե պետք է շատ զգոն լինեն Հայաստանի անկայունացման ցանկացած փորձի հանդեպ։ Ընդ որում՝ նա նշել է, որ դա վերաբերում է նաեւ Հայաստանին ներքին իրավիճակին, որն իր մեջ, ըստ էության, ներքաղաքական կյանքին միջամտելու ազդակներ է պարունակում։

Քաղաքագետ Արա Պողոսյանը «Փաստինֆո»-ի հետ զրույցում նկատել է՝ «ԵՄ-ն տարիներ շարունակ իր կողմից ֆինանսավորվող ՀԿ-ների, անհատների միջոցով ներգործել ու ներգործելու է Հայաստանի վրա։ Արտաքին ուժեր ՀՀ ներմուծելու կարիք չունի, քանի որ տարիներ շարունակ իր համար հենարան է ստեղծել և դա պարբերաբար օգտագործելու է՝ տարբեր ՀԿ-ների միջոցով իր քաղաքականությունն առաջ մղելու համար։ Վերջերս էլ Բրյուսելում ԵՄ-Հայաստան քննարկում է կայացել, որը կրում էր «ՀՀ ռազմավարական զարգացումը» խորագիրը, բայց այնտեղ Հայաստանը ներկայացնում էին մարդիկ, ովքեր հանդիսանում են ԵՄ ազդեցության գործիքները ՀՀ տարածքում։ Եթե ելնենք խորագրից, ապա ենթադրվում է, որ տարբեր շերտերից փորձագետներ, քաղաքագետներ պետք է լինեին, բայց միայն եվրոպական ազդեցությունը տարիներ շարունակ ՀՀ-ում սփռող մարդիկ էին»։

Մեկ այլ նկատելի երևույթի վրա է ուշադրություն հրավիրում Պողոսյանը․ ՀՀ-ում բազմիցս անցկացված բողոքի ակցիաների ժամանակ հանկարծ հայտնվող «անկախության համար պայքարողներ»-ի, որոնք հայտարարում էին, թե պայքարում են «ռուսական ազդեցության ուժերի» դեմ։

«Այսինքն ձևավորվել է մի նարատիվ, թե, ովքեր համաձայն չեն իշխանությունների հետ, ուրեմն, իբր, ռուսամետներ են, ռուսական նարատիվներն են տարածում։ Դա հասարակությանը պառակտելու հերթական ձև է, որ մշակվել է արևմտյան տարբեր ինստիտուտների կողմից»,-շեշտում է քաղաքագետը։

Իրականում, ըստ մեր զրուցակցի, ՀՀ ներկա վարչակագի իշխանության մնալը ձեռնտու են բոլոր արտաքին ուժերին՝ Եվրոպային, ԱՄՆ-ին, Ադրբեջանին, Թուրքիային և անգամ Ռուսաստանին։ «Այն, ինչ հնարավոր է ստանալ այս իշխանություններից, ըստ էության, դժվար է ստանալ այլ իշխանություններից, որոնք առաջին հերթին ելակետ կունենան ազգյաին -պետական շահերը։ ՀՀ ներկա վարչակարգը ձեռնտու չէ միայն հայ ժողովրդին։ Նրանք հիմա էլ հայտարարել են, թե, իբր, որ պահին ազգային ու պետական շահերը հակադրվեն, պետք է գերակայի պետականը։ Տեղի են ունենում այնպիսի նարատիվերի փոփոխություններ, որ նախկինում հնարավոր չէր անգամ պատկերացնել։ Դա անգամ քաղաքագիտական առումով է նոնսենս»,-ասում է Պողոսյանը և ավելացնում՝ պետությունն ազգի համար գործիք է, ոչ թե նպատակ։

Վերադառնալով Հայաստանին սիրաշահելու ԵՄ փորձերին՝ քաղաքագետի նկատում է՝ ոչինչ չտվող հայտարարությունները շարունակվելու են նաև այսուհետ։

«Երբ Ադրբեջանը ռազմական գործողություններ էր սկսել Հայաստանի դեմ, հիշենք, թե Եվրոպան ինչպես էր պահում իրեն․ հիշենք՝ ինչպես էին հայտարարում, թե Ադրբեջանի դեմ ընդունվելիք սանկցիոն քաղաքականությունն արդյունավետ չի կարող լինել։ Հիմա, երբ համեմատաբար հանգիստ է, հանկարծ որոշում են սպառնալից հայտարարություններ հնչեցնել, փրկիչ են ուզում խաղալ։ Վստահ եմ, որ եթե Ադրբեջանը ՀՀ դեմ կրկին ռազմական գործողություններ սկսի կամ ադրանքների դիմի, Եվրոպան նորից հիշելու է, որ Ադրբեջանն իրենց համար էներգետիկ գործընկեր է, չի կարելի նրան ենթարկել սանկցիաների»,-եզրափակեց Արա Պողոսյանը։

Աղբյուր` Փաստինֆո