Փաստ ինֆո

Արցախից բռնի տեղահանվածների մի մասն արդեն հնարավորություն ունի ՀՀ-ում շարունակելու իր մասնագիտական գործունեությունը՝ տարբեր կառույցներում։ Ընդ որում, բռնի տեղահանված արցախցիներին աշխատանքի ընդունելու պատրաստակամության մասին ի սկզբանե բարձրաձայնել են հենց պետական կառույցները, սակայն տարբեր պետական հիմնարկներ տարբեր մոտեցում են ցուցաբերում՝ արցախցիներին կանգնեցնելով փաստի առաջ՝ իբր չունեն ՀՀ քաղաքացիություն։

Խնդրին արդեն իսկ անդրադարձ կատարվել էր՝ ՆԳՆ-ում պարեկային ծառայությունում բռնի տեղահանված արցախցիների աշխատանքի անցնելու հարցի համատեքստում։ ՆԳՆ փոխնախարար Արփինե

Սարգսյանը լրագրողների հետ զրույցում պատճառաբանել էր, որ Պարեկային ծառայությունում աշխատանքի անցնելու համար Արցախից տեղահանված քաղաքացիները պետք է ՀՀ քաղաքացիություն ունենան, իսկ արցախցիներին տրված «կապույտ անձնագրերը» ճամփորդական անձնագրեր են։ Ի դեպ, այդ նույն «ճամփորդական անձնագիրը» տարիներ շարունակ խնդրահարույց չի համարվել, ավելին, ՊԲ նախկին հրամանատար Ջալալ Հարությունյանի՝ ՀՀ ՊՆ-ում բարձր պաշտոն զբաղեցնելու համար ևս խոչընդոտ չէ։

Պարեկային ծառայությունը, սակայն, միակը չէ։ ՀՀ Դատական դեպարտամենտը, որն առաջին իսկ օրերից պատրաստակամություն էր հայտնել աշխատանքի ընդունել տեղահանված արցախցի դատական ծառայողներին՝ ՀՀ-ում գործող դատարաններում առկա թափուր հաստիքներում, այս պահին դեռևս որևէ դատական ծառայողի աշխատանքի չի ընդունել։ ՀՀ դատական դեպարտամենտից «Փաստինֆո»-ի հետ զրույցում ասացին, որ ինչպես բոլոր պետական մարմիններում, այնպես էլ՝ Դատական դեպարտամենտում, օրենքով սահմանված կարգով կարող են աշխատանքի անցնել։ Նկատի ունենալով, որ բռնի տեղահանված արցախցիներին դեռևս նոր է տրվել փախստականի կարգավիճակ և նրանք դեռևս չեն հասցրել ստանալ ՀՀ քաղաքացիություն՝ այս պահին դեռևս աշխատանքի անցած անձինք չկան։

ՀՀ Քննչական կոմիտեում աշխատանքի անցած՝ բռնի տեղահանված քննիչներ ևս այս պահին չեն աշխատում, բայց, ինչպես «Փաստինֆո»-ի հարցին ի պատասխան հայտնեցին ՀՀ քննչական կոմիտեից՝ զգալի թվով դիմորդներ ունեցել են, որոնցից կեսից ավելին անցել են մրցույթի առաջին՝ թեստավորման փուլը։ Սա նշանակում է, որ ՀՀ քաղաքացիության արգելքի խնդիր չի եղել, քանի որ փաստաթղթերն ընդունել են ու հնարավորություն տվել մասնակցելու հետագա ընթացակարգին։

«Մրցութային գործընթացը դեռևս ընթացքի մեջ է․ չի ավարտվել, ինչով պայմանավորված՝ թվային տվյալներ չեմ կարող հիմա տրամադրել»,- ասացին ՔԿ-ից։

ՀՀ առողջապահական համակարգում արդեն դրական տվյալներ կան․«Փաստինֆո»-ի հետ զրույցում ՀՀ առողջապահության նախարարությունից հայտնում են, որ Արցախից բռնի տեղահանված շուրջ 100 բուժաշխատող արդեն աշխատանքի է տեղավորվել ՀՀ առողջապահական ոլորտում՝ մարզերում և Երևանում։

«676 բուժաշխատող պետպատվերի շրջանակներում այս պահին մասնագիտական զարգացման կրեդիտավորման դասընթացի է մասնակցում, որի 472-ը՝ միջին բուժաշխատողներն են, 204-ը՝ ավագ»,- հայտնեցին ՀՀ առողջապահության նախարարությունից։

Հեղինակ՝ Իզաբել Սահակյան

Աղբյուր` Փաստինֆո