Փաստ ինֆո

Ֆրանսիական Bastion զրահամեքենաների Հայաստան առաքման պատմության մեջ Ադրբեջանն անխնա կերպով գտնում է նորանոր մեղավորներ։ Այս անգամ Ադրբեջանը մեղադրում է Վրաստանին, ով համաձայնել է, որ զրահատեխնիկան իր տարածքով՝ Փոթի նավահանգստով գա և մտնի Հայաստան։ Ադրբեջանն արդեն գործի է գցել իշխանական քարոզչամեքենաներն ու Վրաստանի վրա ցեխ շպրտելու գործին են լծվել։

«Մեջքից դանակի հարված» վերնագրված Minval.az-ի համապատասխան հոդվածում Վրաստանի համաձայնությունը՝ զրահատեխնիկայի Հայաստան առաքման համար տարանցիկ երկիր դառնալ, պայմանավորում են տարբեր հանգամանքներով։ Նշում են, որ Վրաստանը գուցե այդ քայլին գնացել է՝ «մշակելու» ԵՄ անդամության իր թեկնածությունը։

Միաժամանակ Ադրբեջանում Վրաստանին հիշեցնում են, որ իբր թե հենց Ադրբեջանի օգնությամբ Վրաստանը կարողացավ դիմակայել ռուսական էներգետիկ շանտաժին։

«Վրաստանի տարածքով Ադրբեջանից Թուրքիա անցնող հաղորդակցությունները՝ դրանք խողովակաշարեր ու երկաթուղիներ են, ապահովում են և՛ աջակցություն Վրաստանի տնտեսությանը, և՛ անվտանգության երաշխիքներ»,-նշում են ադրբեջանական հոդվածում (բնականաբար մեսիջ ուղարկելով այդ երկրին ու որոշակիորեն սպառնալով զրկել այն առավելություններից, որոնք ընձեռել են Վրաստանին/խմբ.)։

«Որոշել եք Ադրբեջանի շահերի հաշվի՞ն սիրաշահել Ֆրանսիային»,-հարցադրում է անում ադրբեջանական լրատվամիջոցի հոդվածագիրը։

Վրացական կողմին հիշեցնելով, որ իբր իրենց պատկանող Լոռին «նվիրավերվել է» Հայաստանին, միևնույն ժամանակ կեղծ մեղադրանքն ներկայացնելով, թե իբր Հայաստանը հավակնություններ ունի Ջավախքի նկատմամբ, հոդվածագիրը դիմում է Վրաստանի իշխանություններին.

«Հայերը այսօր փորձում են վրացական եկեղեցիները ներկայացնել իբրև հայկական, իսկ վաղը այն հողերը, որոնց վրա «հայկական եկեղեցիներ» են հայտնաբերվել, կհայտարարվեն «պատմական հայկական»։ Եվ այս դեպքում, «Բաստիոն» զրահատեխնիկան, որը Վրաստանը սիրով թույլ է տվել իր տարածքով առաքել Հայաստանը, կարող են շատ լավ օգտագործել իր դեմ։ Եվ հետաքրքիր է, թե այդ ժամանակ Թբիլիսիում ումից է օգնություն խնդրելու»։

Ուշագրավ է, որ փաստերն ու իրողությունները աղավաղելով՝ ադրբեջանական մեդիան ճիշտ նույն նենգամտությունն է ներկայացնում, որով ոչ թե Հայաստանը, այլ հենց Ադրբեջանն է կեղծ «իրողություններ» ստեղծում ու հետո պահանջներ դնում, թե այսինչ բնակավայրում ինչ-որ ժամանակահատվածում ադրբեջանցիներ են ապրել, ու հետևապես այդ հողերը իրենցն են։

Առավել քան ծիծաղելի են նաև պնդումները, թե Հայաստանը վրացական եկեղեցիները յուրացնում է, քանի որ դրա ճիշտ հակառակն է տեղի ունեցել Վրաստանում՝ բոլոր հայկական եկեղեցիները փակվել, անգամ դինամիտով են պայթեցվել կամ գոնե վրացականացվել են տարիներ շարունակ... և դժվար է պատկերացնել, որ Հայաստանը «Բաստիոն» զրահատեխնիկայով գրոհի Թբիլիսին՝ վերադարձնելու իրապես հայկական եկեղեցիները։

Աղբյուր` Փաստինֆո