Փաստ ինֆո

«Գագիկ Խաչատրյանի առողջական ներկայիս վիճակը, վատթարացումը պետության մեղավորությամբ է, նախկինում՝ քննչական մարմինների և դատախազության, հիմա՝ դատարանի»․դատարանը հետաձգեց Գագիկ Խաչատրյանին արտերկրում բուժում ստանալու թույլտվության վերաբերյալ միջնորդությունը

Երևանի ընդհանուր իրավասության քրեական դատարանում՝ դատավոր Արթուր Մկրտչյանի նախագահությամբ, այսօր կայացել է ՊԵԿ նախկին նախագահ Գագիկ Խաչատրյանի և Կարեն Խաչատրյանի վերաբերյալ գործով դատական նիստը, որի ընթացքում քննարկվեց Գագիկ Խաչատրյանին՝ բուժման նպատակով բուժման մեկնելու հարցը։

Նշենք, որ գործը գտնվում է դատաքննության փուլում, վկաների հարցաքննությունը մոտենում է ավարտին։ «Փաստինֆո»-ի թղթակցի հաղորդմամբ՝ այսօրվա նիստին, սակայն, չի ներկայացել Գագիկ Խաչատրյանը։ Նրա պաշտպան Երեմ Սարգսյանը միջնորդություն ներկայացրեց՝ խնդրելով բուժման նպատակով արտերկիր մեկնել, համապատասխան բուժում ստանալուց հետո վերադառնալ ՀՀ և ներկայանալ նիստերին։ Սարգսյանը միջնորդությանը կից ներկայացրեց նաև Խաչատրյանի առողջական վիճակի վերաբերյալ համապատասխան փաստաղթղթեր, համաձայն որի՝ կյանքին վտանգ սպառնացող լուրջ խնդիրներ կլինեն, եթե հաստատվեն այդ խնդիրները։

«Գագիկ Խաչատրյանի առողջական վիճակի ներկայիս վիճակը, վատթարացումը պետության մեղավորությամբ է։ Նախկինում, եթե դա քննչական մարմինների, դատախազության մեղավորությունն էր, հիմա՝ դատարանի»,- նշեց Սարգսյանը՝ արձանագրելով, որ ակնհայտորեն բացասական դինամիկ է․ «Բացասական դինամիկան մենք մինչև որտեղ ենք սպասում, որ լինի։ Այսինքն, այն անդառնալի կետին ենք սպասում, որ լինի, ասենք՝ վայ, չգիտեինք»։ Փաստաբան Ամրամ Մակինյանը ևս միացավ և պնդեց միջնորդությունը՝ խնդրելով այն բավարարել։
Դատախազ Գևորգ Սարգսյանն առարկեց միջնորդության դեմ՝ նշելով, որ այն ենթակա է մերժման, քանի որ փաստաթղթերում առկա չէ տվյալ առ այն, որ ՀՀ-ում հնարավոր չէ բուժել այդ հիվանդությունները։ Փաստաբան Երեմ Սարգսյանն էլ հակադարձեց՝ դեռևս նախաքննության փուլից առնվազն երեք փաստաթուղթ կա, որով արձանագրվել է, որ ողնաշարի վիրահատությունը ՀՀ-ում հնարավոր չէ կատարել, դրանից հետո արդեն դատարանի նախաձեռնությամբ է դատաբժշկական փորձաքննություն իրականացվել, որով ևս հաստատվել է։

«Մեղադրանքի համար բացարձակ կարևոր չէ, թե այստեղ ինչ փաստ է, կարևորը ձգձգելն է, տարիներով, բայց այդ տարվա ընթացքում առողջական վիճակը վատթարանում է»,-նշեց փաստաբանը՝ հավելելով, որ հասկանալի չէ՝ ինչու են անհանգստանում, կարծում են՝ կգնա, չի գա․ «Ոչ թե անհանգստացնում եք, այլ՝ թույլ չեք տալիս։ Ձգձգում եք, որ առղջական վիճակն ավելի վատանա։ Ունենք քրեական գործ, ոչինչ որ հիվանդ ես, նիստեր կանենք»։

Սարգսյանը նաև հիշեցրեց, որ, երբ դեռ կալանքի տակ էր, ՔԿՀ-ից գալիս էին հիվանդանոց և զոռով ներկայացնում դատարան։

Փաստաբան Երեմ Սարգսյանը ևս մեկ միջնորդություն ներկայարցեց՝ խնդրելով թույլատրել Գագիկ Խաչատրյանին դեկտեմբեր ամսին մեկնել Գերմանիա՝ վիրահատության համար։ Այս միջնորդության դեմ ևս դատախազը առարկեց։ Դատարանը որոշեց հետաձգել միջնորդությունների լուծումը, ապա նաև՝ դատական նիստը։ Դատական նիստի ավարտից հետո լրագրողների հետ զրույցում պաշտպան Երեմ Սարգսյանը նկատեց՝ Գագիկ Խաչատրյանը նախկինում մեկնել է արտերկիր բուժման և վերադարձել, ըստ այդմ, ռիսկ չկա, որ Գագիկ Խաչատրյանը կարող է չվերադառնալ։ Միևնույն ժամանակ փաստաբանն արձանագրեց՝ թե դատարանը, թե դատախազը կաշկանդված են։

«Նիստերից մեկի ժամանակ մենք միջնորդեցինք, որպեսզի Խաչատրյանը 12 օրով մեկնի արտերկիր, դատարանը բավարարեց մեր միջնորդությունը,և մի քանի ժամ անց դատախազը միջնորդեց, որ Խաչատրյանի նկատմամբ նաև ստորագրությունը որպես խափանման միջոց ընտրվի, դատարանն առանց քննարկելու որոշում է ստորագրությունը խափանման միջոց ընտրել»,- հիշեցրեց փաստաբանը։

Հիշեցնենք, որ Գագիկ Խաչատրյանը և Կարեն Խաչատրյանը մեղադրվում են պետական գործունեության ընթացքում թույլ տված ենթադրյալ պաշտոնեական դիրքի չարաշահման, գույքի վատնման և պաշտոնեական կեղծիքի համար։

Ըստ մեղադրանքի՝ ՊԵԿ նախկին նախագահ Գագիկ Խաչատրյանը, իր ազգականներին նյութական օգուտ տալու անձնական շահագրգռվածությունից ելնելով, պաշտոնեական դիրքը ծառայության շահերին հակառակ օգտագործելով, իրենից ծառայողական կախվածության մեջ գտնվող տեղակալի՝ Տիգրան Տարիելի Բարսեղյանի, ինչպես նաև պաշտոնատար և այլ անձանց մասնակցությամբ, ՀՀ օրենսդրության և ՀՀ կառավարությանն առընթեր ՊԵԿ կողմից կնքված պայմանագրի դրույթների խախտմամբ, ապահովել է ՀՀ պետական բյուջեի հանդեպ 79.372.897.900 ՀՀ դրամ պարտավորությունների դիմաց «Հայգազարդ» ՓԲ ընկերության կողմից ՀՀ պետական եկամուտների կոմիտեում 2011թ. ապրիլի 18-ի պայմանագրով գրավադրված «Հիդրոապարատ» ԲԲ ընկերության 132.615 հատ բաժնետոմսերի շուկայականից էապես ցածր գնով՝ 34.328.964 ՀՀ դրամով իրացումը քրոջ և եղբոր որդիների՝ Ռուբիկ Գասպարյանի և Արամ Խաչատրյանի մասնակցությամբ հիմնադրված «Մոնդո Դի Մոբիլի» ՍՊ ընկերությանը, իսկ ներդրում կատարելու վերաբերյալ մրցույթի անցկացման պարտադիր պայմանը նշված ընկերության հետ կնքված 2012թ. հուլիսի 2-ի բաժնետոմսերի առուվաճառքի պայմանագրում չներառելու հետևանքով ապահովել է «Մոնդո Դի Մոբիլի» ՍՊ ընկերության ազատումը 5.000.000 եվրոյին համարժեք 2.624.000.000 ՀՀ դրամ ներդրում կատարելու պարտավորությունից: Նշված գործողությունների հետևանքով խախտվել է պետական մարմինների բնականոն գործունեությունը, խաթարվել է պետական բյուջեի նկատմամբ առկա պարտավորությունների դիմաց գրավադրված գույքի իրացման գործընթացը, անհավասար պայմաններ են ստեղծվել իրացման գործընթացի հնարավոր այլ մասնակիցների համար, որի արդյունքում պետությանը պատճառվել է 34.328.964 ՀՀ դրամի, իսկ կազմակերպությանը՝ 2.624.000.000 ՀՀ դրամի նյութական վնաս, որն առաջացրել է ծանր հետևանքներ: Նույն գործով մեղադրյալի կարգավիճակում է նաև նրա եղբորորդին՝ Կարեն Խաչատրյանը։ Գագիկ և Կարեն Խաչատրյանները մեղադրանքը չեն ընդունում։

Հեղինակ՝ Իզաբել Սահակյան

Աղբյուր` Փաստինֆո