Փաստ ինֆո

Մարգարայի անցակետի կառուցման երկրորդ փուլի աշխատանքների համար ՊԵԿ-ի հետ պայմանագիր ստորագրած «ԱՐՏԿՈՆ» ընկերությունը 2 տարի՝ 2020 թ-ի դեկտեմբերի 31-ից մինչև 2022 թ-ի դեկտեմբերի 31-ը ներառված է եղել գնումների գործընթացին մասնակցելու իրավունք չունեցող ընկերությունների, այսպես կոչված՝ «սև ցուցակում»։

«Թրանսփարենսի Ինթերնեշնլ» հակակոռուպցիոն կենտրոնի ծրագրերի ղեկավար Վարուժան Հոկտանյանը «Փաստինֆոյի» հետ զրույցում շատ հատաքրքրական որակեց այն փաստը, որ «սև ցուցակից» դուրս գալուց հետո ընկերությունը նման խոշոր պայմանագիր է կնքել ՊԵԿ-ի հետ, այն էլ՝ մեկ անձից կատարվող գնումների ընթացակարգով։

Հիշեցնենք, որ Մարգարայի անցակետի կառուցման երկրորդ փուլի աշխատանքների համար ստորագրված պայմանագիր գերազանցում է 620 մլն դրամը։ Ընկերությունը պարտավորվում է շինարարական աշխատանքները կատարել 90 օրում, աշխատանքներն, ըստ պայմանագրի, պետք է ավարտվեն 2023 թ-ի դեկտեմբերի 25-ին։ Ընդ որում՝ այս ընկերությունը մրցույթի չի մասնակցել, այլ ՊԵԿ-ն է նրան ընտրել ու հարյուրավոր միլիոնների գործարք կնքել։

Մեկ անձից նախորդ գնման պայմանագիր ՊԵԿ-ը ստորագրել էր հունիսի 20-ին. նույն «Արտկոն» ՓԲԸ-ի հետ կնքվել է 250 միլիոն 621 հազար դրամի պայմանագիր՝ Մարգարայի անցակետի կառուցման աշխատանքների առաջին փուլի համար։

Հոկտանյանն ընդգծեց, որ ընկերությունը «սև ցուցակում» հայտնվել էր «Գնումների մասին» օրենքի 1 մասի 6-րդ կետի համաձայն, այսինքն՝ խախտել էր պայմանագրով նախատեսված կամ գնման գործընթացի շրջանակում ստանձնած պարտավորությունը, որը հանգեցրել է պատվիրատուի կողմից պայմանագրի միակողմանի լուծմանը։

Անդրադառնալով մեկ անձից կատարված գնման հիմնավորմանը՝ փորձագետը նշեց, որ մատնանշվել է «Գնումների մասին» ՀՀ օրենքի 23 հոդվածի 2-րդ կետը՝ արտակարգ կամ չնախատեսված այլ հրատապ իրավիճակը։

«Ինձ համար անհասկանալի ու տարօրինակ է, թե ինչու է չնախատեսված կամ հրատապ, ի՞նչ է, վաղը բացո՞ւմ են հայ-թուրքական սահմանը։ Առնվազն, հարց է ծագում՝ որտեղի՞ց են որոշել, որ հունվարի 1-ից դա լինելու է։ Կարծում եմ, շատ լպրծուն հիմնավորում է, նման հիմնավորումը լինում է սովորաբար տարերային աղետների դեպքում, երբ անսպասելի մի բան է տեղի ունենում։ Բայց սա այդպիսի իրավիճակ չէ։ Հետևաբար, պետք է հասկանալ, կա՞ գաղտնի պայմանավորվածություն, որ հունվարի 1-ից բացվելու է սահմանը»,- նկատել է Հոկտանյանը։

Դիտարկմանը, թե վարչապետն ու ԱԳ նախարարը հույս են հայտնել, որ մինչև տարեվերջ կբացեն սահմանը՝ Հոկտանյանն արձագանքեց՝ հույս հայտնելով գնում չեն անում։ «Դա ընդունված չէ, և, ի վերջո՝ պայմանավորվածությունը, որ 3-րդ անձանց համար պետք է սահմանը բացվի՝ շատ վաղուց էր ձեռք բերվել, ավելի քան մեկ տարի առաջ։ Հետևաբար, բավական շատ ժամանակ կար ու կարելի էր հանգիստ ու առանց շտապելու կառուցել սահմանը, ոչ թե հրատապության կարգով անել։

Իհարկե, սա կասկածելի է, կարելի է ենթադրել, որ էլի մի ծանոթ ընկերության են պատվիրակել։

Օրինակ, Ավինյանի երդմնակալության դեպքում հայտարարում էին, որ քիչ օր էր մնացել ու չեն հասցրել մրցույթ կազմակերպել, բայց այստեղ այդ պատճառաբանությունը տեղին չէ։ Ավելին, քաղաքապետի երդմնակալության ժամանակ ներկայացնում էին, որ այդ օրը նոր կորոշվի՝ «Հանրային ձայնի» ավագանու անդամները կգան նիստին,թե չեն գա։ Այստեղ էլ գուցե իսկապես կա պայմանավորվածություն, որ հունվարին բացվում է սահմանը, իսկ եթե միայն «հույս են հայտնում», ապա դա բավարար պատճառ չէ մեկ անձից գնում անելու համար։ Հույսի վրա հիմնվելով՝ նման գնում չեն անում։ Ենթադրում եմ, ինչ-որ բան հայտնի է իրենց, բայց իրենք հանրությանը տեղյակ չեն պահում, որովհետև սովորաբար նման հիմնավորումը կիրառում են տարերային աղետների կամ լուրջ տեխնոգեն աղետներ դեպքում, երբ պետք է հրատապ ինչ-որ բան արվի, իսկ սա ոչ արտակարգ, ոչ էլ չնախատեսված իրավիճակ ես չէի համարի։

Կարծում եմ, հանգիստ կարող էին ժամանակին մրցույթ հայտարարել ու կառուցել»,- նշել է «Թրանսփարենսի Ինթերնեշնլ» հակակոռուպցիոն կենտրոնի ծրագրերի ղեկավար Վարուժան Հոկտանյանը։

Աղբյուր` Փաստինֆո