Փաստ ինֆո

Սեպտեմբերի 19-ի վաղ առավոտյան սովորականի պես Գրիգորին զանգել է կնոջը՝ Ռուզաննային, հարցրել տնեցիների որպիսությունից, երեխայից։ Ժամեր անց, երբ ադրբեջանական ահաբեկչական ստորաբաժանումները շփման գծի ողջ երկայնքով հարձակման են անցել, Գրիգորիի հետ կապվել այլևս ոչ մեկը չի կարողացել։

«Որ հասկացանք պատերազմ է, հաղորդագրություններ էի գրում, բայց պատասխան չէի ստանում․․․ Ամսի 20-ին ասացին, որ զոհվել է․․․ Գրիգորին դիտակետում էր, երբ ինքնաթիռը ռմբակոծել է հենց դիտակետը»,-«Փաստինֆո»-ին պատմում է կինը՝ Ռուզաննան։

Գրիգորի Հայրապետյանը 23 տարեկան էր, պաշտպանության բանակի պայմանագրային զինծառայող։ Հաթերքում՝ իր հայրենի գյուղում էր ծառայում։

Կինը հիշում է՝ ամուսնությունից մեկուկես տարի անց որոշում են գնալ Ռուսաստան՝ այնտեղ ապրելու։ Երկու ամիս չանցած՝ վերադառնում են։
«Չկարողացավ էնտեղ մնալ։ 2022թ․ հոկտեմբերին գնացել էինք, դեկտեմբերի 1-ին հետ եկանք Արցախ։ Զգում էի, որ ոչ մի կերպ չի համակերպվում իր հողից հեռու մնալուն․․․ Այնքան ծանր էր տանում, որ մեզ էլ վերցրեց ու վերադարձանք գյուղ՝ Հաթերք։ Շատ ինքնամփոփ էր տեսակով, բայց զգում էի, թե ինչքան շատ է սիրում գյուղը, հարազատներին, ընկերներին։ Բոլորին յուրովի էր սիրում, ամեն մեկի համար անհանգստանում․․․ Իսկ Հաթերքն իր համար ամեն ինչ էր։ Երբեք չի սիրել, չի ցանկացել քաղաքում ապրել․ աղմուկ ընդհանրապես չէր սիրում»,-պատմում է կինը։

Գրիգորին ու Ռուզաննան դուստր ունեն՝ Սոֆիան։ Փոքրիկը 1 տարեկան 9 ամսական է։ Ռուզաննան մեր զրույցի ամբողջ ընթացքում ջանում էր չհուզվել, ուժեղ պահել իրեն՝ չնայած նրան, որ երկու օրում կորցրել է երկու շատ հարազատ մարդկանց՝ ամուսնուն ու եղբորը․․․

«Եթե Սոֆիան չլիներ, ես շատ ավելի ծանր կտանեի այս ամենը, շատ ավելի ծանր․․․ Հիմա պրում եմ միայն հանուն աղջկաս, նրա շնորհիվ․․․»,-հուզմունքը զսպել է փորձում տակավին երիտասարդ տարիքում այրիացած Ռուզաննան ու հույս փայփայում, որ գոնե եղբոր մարմինն Արցախից տեղափոխել կստացվի․․․

Էդուարդին հողին են հանձնել հայրենի գյուղում՝ Մաղավուզում, քանի որ դիակը պահելու ոչ մի պայման չկար՝ հոսանքի բացակայության պատճառով դիահերձարանների սառնարանները չէին աշխատում։ Ծնողները սպասում են, թե Կարմիր Խաչը երբ կկարողանա Հայաստան տեղափոխել նրա դին․․․

Աղբյուր` Փաստինֆո