Փաստ ինֆո

ՀՀ նախկին վարչապետ Հրանտ Բագրատյանի նկատմամբ ընտրված խափանման միջոց բացակայելու արգելքը վերացվել է։

«Փաստինֆո»-ի հաղորդմամբ՝ Երևանի ընդհանուր իրավասության քրեական դատարանում՝ դատավոր Մանվել Շահվերդյանի նախագահությամբ, այսօր կայացել է Հրանտ Բագրատյանի գործով առաջին դատական նիստը։

Հրանտ Բագրատյանին, հիշեցնենք, մեղադրում են բռնության կոչեր անելու մեջ, որոնք, ըստ իրավապահների, արվել են ապրիլի 4-ին՝ ԱԺ մոտ «Միասին» շարժման հրավիրած հանրահավաքում ունեցած ելույթի ժամանակ։ Ելույթում Բագրատյանը նշել էր ․ ««Այդ ընթացքում իրենք բաժանել են 200 մլրդ դրամի կամ 500 մլն դոլարի պրեմիա: Ծախսել է 28 մլրդ, արա, 28 մլրդ-ն ի՞նչ ես արել, 1 մլրդ-ը չէի՞ր կարող դնել բանակի վրա… 5 տարում մահանում է 36 հազար մարդ, այդ թվերի մեջ մտած չեն Covid-ն ու զոհվածները: Չենք ծննդաբերում: Եթե 2017-ին ունեցել ենք 18 հազար իրավական հանցագործություն, անցյալ տարի ունեցել ենք 37 հազար: Ինչի՞ եք կոտորվում: Եթե 2017-ին կյանքի միջին տևողությունը Հայաստանում եղել է 76 տարի, իր օրոք 5 տարում դառել է 72 տարի: Արա, ինչի՞ եք մեռնում, վերացրեք էդ մարդուն, վերջացրեք, արա՛: Վերացրե՛ք այդ իշխանությունը ձեր ուժով, թափով: Այս ի՞նչ ինքնասպանություն է, որ ազգը գնում է»։ Քրեական հետապնդումը Բագրատյանն ինքը շինծու է համարում։

Այսօր նախնական դատալսումների ընթացքում դատարանը նախ ճշտեց դատավարության մասնակիցների ինքնությունը, ապա, քննարկման առարկա դարձվեց Բագրատյանի նկատմամբ քրեական հետապնդումը դադարեցնելու մասին պաշտպանների միջնորդությունը։ Միջնորդության հիմքում պաշտպանները դրել են այն հանգամանքը, որ քրեական գործի հարուցման համար օպերլիազորի ներկայացրած աղբյուրը չի համարվում առերևույթ հանցանքի մասին պատշաճ հաղորդում, ըստ այդմ, ոչ պատշաճ առիթի հիման վրա քրեական վարույթ չէր կարող նախաձեռնվել և քրեական վարույթը ենթակա է կարճման, Բագրատյանի նկատմամբ քրեական հետապնդումը՝ դադարեցման։ Միջնորդության լուծումը դատարանը հետաձգեց։ Հաջորդիվ քննարկման առարկա դարձվեց խափանման միջոցի հարցը։ Հանրային մեղադրողը նշեց, որ խափանման միջոց բացակայելու արգելքը վերացնելու կամ փոխելու հիմքեր չկան, պետք է մնա անփոփոխ նախաքննության ընթացքում կիրառված խափանման միջոցը, մինչդեռ, պաշտպան Հովհաննես Քոչարյանն ընդգծեց՝ չի նշվում, թե ինչու պետք է կիրառվի։ Նրա խոսքով՝ քրեական հետապնդումը տևել է չորս օր, գործի նյութերում առկա չէ որևէ տվյալ, որ Բագրատյանը կարող է լքել ՀՀ-ն կամ նոր հանցանք կատարել, մինչդեռ, խափանման միջոցը հենց այնպես չեն կիրառում, այն որոշակի ռիսկեր չեզոքացնելու համար է, ըստ այդմ, խափանման միջոցը ենթակա է վերացման։ Հրանտ Բագրատյանը նշեց՝ իր համար վիրավորական է խափանման միջոցի կիրառումը։
«Ձեր առջև կանգնած է Հանրապետության հիմնադիրներից մեկը, ինձ զանգել են՝ գնացել եմ։ Մի կողմ թողնենք գործի էությունը, եկեք հասկանանք՝ ում հետ ոնց են խոսում։ Իմ էությունը չի ընդունում, երբ

ասում են՝ խափանման միջոց։ Ես իմ խոսքի տերն եմ։ Ես հասկանում եմ և՛ դատարանի, և՛ իմ հեղինակությունը։ Ես վիրավորական եմ համարում խափանման միջոցի առկայությունը»,- նշեց Բագրատյանը։
Դատարանը որոշեց վերացնել Բագրատյանի նկատմամբ ընտրված խափանման միջոցը։

Հեղինակ՝ Իզաբել Սահակյան

Աղբյուր` Փաստինֆո